گنجلیکده اینسان ایستر محلله‌نین لاب بتر آدامی اولسون. اولان! بوش وئر محلله‌نی، ایستر خاورمیانه‌ده تک اولسون بااا. ایستر ائله بیر ایش گؤرسون کی دونیادا هامی بارماغی ایله اونا-بونا گؤستریب دئسین:
– باخ! بو اودو هااا
گنج‌کن بیز ده «باخ، بو اودو هااا»نی هئی دوشوندوک، اؤلچو-بیچ ائله‌دیک، سونرا گئنه دوشوندوک، سونوندا «آهان، ائوره‌کا» دئییب تاپدیق …
دوستلارلا درویش اولماغا قرار وئردیک. دئدیک درویش اولاق، عجئیبان- قولی ایشلر گؤرک. یوخسا سحر صوبحدن آنامیزین زور ایله گئدیب سنگگ آلماق، بیزیم اوچون هانسی شؤه‍رتی قازاندیرا بیلردی کی؟ اونون یئرینه طی‌الارض ائله‌‌یه بیلردیک.
سیز آلله اؤزوز قضاوت ائله‌یین، ائوه چؤرک آلماقلا محلله‌ده هامینین انگینی ایه‌ بیلردیک، یوخسا ایکی ثانیه ایچینده دونیانین او بیری اوجونا اوچماقلا.
هله هاراسیدی؟ اؤز-اؤزوموزه دوشونموشدوک، درویش اولساق، ایکی ووجودا صاحاب اولماغی دا اؤیرنه‌ بیلریک. ایکی ووجودوموز اولسایدی اگر، بیریسینی آنامیز سحر تئزدن سنگک آلماغا گؤنده‌رردی، عینی آندا دیگری ده گئدردی میشقانا، مادونا ایله قول-بویون اولاردی، سیلوئستئر ائستالونه ده اونا حسرتله باخاردی، ایشاره بارماغی ایله بیزیم ایکینجی کوپیامیزی جمشید آریایا گؤستریب دئیردی:
– باخ، بو اودو هااا
سید حمزه‌ده، هله مقبره‌الشعرا دئیه بیر یئر تیکیلمه‌میشدی. کوچه‌نین دیبینده اسکی بؤیوک بیر ائو واریدی. او دؤنملرده او‌ قدیم ائو، شاه‌نعمت‌آلله ولی موریدلرینین خانقاهی ایدی.
خانقاه دئییرم هااا، بالاجا بیر یئر اولدوغونو سانمایین. سن ائله راحات-راحات باشینی ساللاییب، بوغدا تایلاری چی‌یینلرینده «آی چکیلین بشیر گلیر» دئییب حسن سوخدو‌ دییرمانی‌نا گیرن کیمی، اورا دا گیره بیلمزدین. سیفاریشین، پارت-پورتون اولمالیدی. یوخسا قاپینین زیلینی چالدیغینیزدا، آچیق قاپی گیریشیندن ده داها گیئنیش بیر آدام، سنین ایچری گیرمه‌یینه ایزین وئرمزدی، اورا دورتولمک اوچون، او دییرمانین قاپیچیسی‌نین هئچ بیر یئریندن بیرجه جیریق تاپا بیلمزدین.
درویشلر خلسه‌یه گئتمک اوچون سماع مجلسی قورموشدولار. بیر- ایکیسی قاوال چالیردیلار، گئری قالانی دا، باشلارینی «لا اله» دئدیکلرینده ساغا، «الا آلله» دا سولا دؤندریردیلر. درویشلی‌یین ییرینجی صینیف اؤیرنجیلری اولان و هئر ایله پئری قانمایان بیزلر ده، اوردا ائله‌جه اوتوردوغوموز یئرده سئیری-آفاق و انفس ائله‌ییردیک. فقط ائله هوروت-هوروت اطرافا باخیردیق، مال کیمی ایره‌لی سوییه‌ ده اولان درویش‌لری ایز‌له‌ییردیک. گوزله‌ییردیک گؤرک، بس آخی نه زامان هر بیر درویش کولونلاشیب ایکی دنه اولاجاق؟
یانیمدا سیسقا بیر درویش، الینده قاوال اوتورموشدو، سسیقالیغیندان بللی ایدی کی چوخلو موصیبت‌لر گؤروب، ریاضت‌لر چکیب اؤزونو او اوست نؤقطه‌یه قدر چاتدیرا بیلمیشدی. قاوالین ریتمی ایله باشینی ساغا-سولا ساللاییردی.
چوخ موصیبت گؤرن سیسقا درویش، بیر موددت قاوال چالیب اوخوماغینا داوام ائتدی. ان سون اوندان بیر «لا اله» سسی چیخدی، آمما سونرا «الا آلله» سسینی هئچ ائشیتمه‌دیم، آنجاق اونون یئرینه اوجا بیر «دارانق ق ق ق» سسی قولاغیمی جینگیلدتدی.
یازیق، باشینی قاپی چرچه‌وه‌سینه ائله چیرپمیشدی کی، اولدوغو یئرده روحلار عالمینه طی‌الارض ائله‌میشدی، او عالم‌ده ده شاه نعمت‌آلله ولی‌‌ ایله بیرلیکده، سنگک- پئندیره دؤشه‌میشدی. اونا باخدیغیمدا، اوزونده هم ناراحاتلیق ایفاده‌سی وار ایدی هم ده اوتانقاچلیق. چوخ احتیمال، او یازیغین اوتانماغی آلدیغی سنگه‌یی شاه‌نعمت‌آلله ولی ایله تیخیب بوش ال ایله ائوه دونه‌جه‌ییندن ایدی، ناراحاتلیغی دا باشینی قاپی چرچه‌وه‌سینه چیرپدیغیندان. آمما هر حالدا او موصیبتدن سونرا، درویشلیکده بیر سوییه داها یوخاری‌یا اوجالمیش اولمالی ایدی.
دوستوم صابیر گؤز ایشاره‌سی ایله، سانجی ایچینده قیوریلان آدامی منه گؤستریب دئدی:
-باخ، بو اودو هااا
اؤزومو تزه‌دن اونا ساری دؤندریب بو سفر دیققت‌له باخدیم. طرفی تانیدیم.
بیر نئچه گون قاباق، اونو ولی‌عصرین منکرات شعبه‌سینده گؤرموشدوم. دئمه سیسقا درویش، گئجه‌نی بیزیمله بیرلیکده کئچیرن تومن‌کش شوفئری ایمیش.
مونکرات اونو، زینا اوستو اؤز ماشینی ایچینده توتوقلامیشدی.