سنین سئوگین
شور موغامیندا کؤک سالان قرارسیزلیغین
سونسوز بیر روماتیزمی‌دی،
بایاتی قاجار اذانیندا سیزلایان
ابدی یالقیزلیغین دیز سانجیسی‌دی.
سنین اوزون ساچلارین
دارا آسیلمیش قیسا عؤمورلرین
انتحار ایپی‌دی،
هؤروکلرینده‌کی جان آلان دویونلر
معصوم دویغولارین
بویونلارینا باغلانمیش
اهر جاده‌سی‌دی.
باخیشلاری‌نین عشوه‌لی گونشی
گنجلییین اوزه‌رینده تیکیلمیش
آسما کؤرپودور،
خیاودا دوغار
گون باتمادان اؤنجه باتار.
