اوره‌ییمده بیر خودآفرین یانیر
مرحمتینی گتیر
سؤندور مئشه‌لریمین
یانغینینی!

یوخ، یوخ
هئچ دوخونما آماندی
سن ده یانارسان
آرازباریمین اودوندا!
قوی ساوالانین قارلاری
اریییب آخسینلار
یول آچسینلار
کؤنلومون آلوولانان دره‌لرینه!

بوراخ دویغولاریمین
کؤزرتیسی دؤکولسونلر،
ونییار دره‌سینده
سؤنسونلر!

سن منیم آجیلاریما دا هئچ ده‌یمه
قوی آخسینلار سیزلایا-سیزلایا
قوووشسونلار آجی چایی‌نا!

اومیدیمین یوواسینا دا دوخونما
قوی کول‌لری سهنده چاتیب
اورمونو سلاملاسینلار،
مرحم اولسونلار
قورو دنیزین یاراسینا
سونسوزادک اویوسونلار!