بو داغدا گزمه
آی کؤنلومون دلی جئیرانی،
قریبلشدیرر سنی داریخما چنی
گؤزلرینده دولوب داشار شفقین شبنمی
ازر سنین کوسکون ال – آیاغینی
بورانین کسکین داشلاری!
سحرین سرین یئلی
اویاندیریر اسنه‌ین میناره‌لری
سوزولور یوخولو گونبزدن آشاغی
اسیر مسجیدین قاپیسی آغزیندا
سوپورور، آپاریر خاطیره‌لر بولاغینا
یئره تؤکولموش توخومالی گونلرین
خیردا چؤره‌ک‌لرینی.
گولومسه‌ییر «فریدون پورناصح»
ال آتیر جئبینه
بیر اووج یاشیل ماهنی‌لار سپیر
اوچوب گئده‌ن آنلارین ایزلرینه،
عینالی‌نین یالقیز کهلیک‌لرینه.
ایلان اوچاندا جمعه گونو
اسن یئل باخیر
قایادان دیرماشیب گئده‌ن
کهلیک اوتو یارپاقلاری‌نین قوخوسونا
اونا الوداع دئییب فیسیلداییر
گون باتیمی‌نین قولاغینا.
« آی داغ‌لار سنده گؤزوم وار
آی منده درده دؤزوم وار
خبر وئرین یار گلسین
آی اوره‌گیمده سؤزوم وار»
