منیم اوشاقلیغیمدا
کؤهنه دفتریمیزین کاغاذلاری،
بیرآز کیریش،
بیرده سوپورگه دسته‌سیندن
قوپاریلان چؤپلریمیز
اولوردو بردیوانیمیز.
هئچ دوشونمزدیک
نه یولونموش سوپورگه‌نی
نه ده کیریشلی تومانیمیزی!
اوشاقلیغیمدا
دونیانین ان اوزون کوچه‌سی ایدی
«موللاحسن» کوچه‌سی؛
او کوچه‌ده ده ان ده‌یرلی یئریمیز
«قوربان‌عمی باققالی»میز!
منیم اوشاقلیغیمدا
«زینب خانلاراووا»یی بیزه گتیرن
آنتئنده کی قابلاما قاپاغیمیز،
تاپدیغیمیز یئنی دونیامیز ایدی
برفکلی باکی کانالیمیز!
منیم اوشاقلیغیمدا
اویونوموزودو
جولایا آتدیغیمز او باداملاریمیز،
جولاداکی تک یا دا جوت اولان
بیزیم شانسیمیز
اولوردو اودوزوب یا دا قازانجیمیز!
منیم اوشاقلیغیمدا
ایچینی پالچیقلا دولدوردوغوموز
کانادا قاپاغیمیز،
آلتینی سورتمک اوچون ده
کوچه‌نین آسفالتی اولوردو زومباتامیز؛
هم اونون آلتی صاف اولوردو
هم ده بیزیم بارماقلاریمیز،
سونرا دا او قاپاق اولوردو
بیزیم لاب بتریندن سققه‌میز!
منیم اوشاقلیغیمدا
فیلیم کیمی اولوردو
اوینادیغیمیز قوناق باجیمیز،
مریم اولوردو خانیمیم
روقیه ایله معصومه ده اوشاقلاریمیز؛
لاواشین قیمتیندن ده هئچ
اولماز ایدی خبریمیز؛
ایفطاردان سونرا دا
ساواش اویونو اولوردو
کیشون کیشونوموز؛
هئچ آنلامازدیق
فیشه‌دن ده بتر گئده‌جک
بو قیسا عؤمروموز!
