بو شه‌هرین گونشی
سایمازلیق تپه‌لرین آرخاسیندا باتیب؛
قالین بیر زینا یورغانی اؤرتموش
بورانین آخشام اوستوسونو.
تبریزین ییرتیق غرورو گیزله‌نیبدیر
امیره‌قیزین پوزولموش بکارتینده.
جومه گونو
بیج بیر اوشاغا حامیله اولوب
محلله‌میزین قایغیسیز آغ‌ساققالی.
گجیل قاپیسینی دؤیورم
قاپینی یاریمچیق آچیر ترانزیستورلو رادیو
سویوق الینی اوزادیر
الیمی توتوب، ایسینیر؛
یاوشجا ایکینجی ال
بیرآخشام ماهنیسی قولاغیما پیچیلداییر
کدر نغمه‌لی نفسی اللریمی دوندورور
رادیو سوسور
قاپی قاپانیر.
دومان ایچینده
بیر الیمله خانسار ایلانین بوغازیندان توتورام؛
نفسیمله ایکی باشینی دا
دالبادال ایچیمه چکیرم؛
داش‌ماغازالار باشیما فیرلانیر
قلیان شوشه‌سی ایچیندن
محرم قفه‌چی منه دئیینیر:
-بو قدر دومانا
دایانامازسان- دئییر،
کؤپوک ایچیندن شوشه‌یه توپورور.
قلیانین سویو پاققا-پاق‌لا
جومه نامازی‌نین خطبه‌لرینی اوخویور؛
سودا بوغولان محرمی
کؤمور ایچینده یانان ارک قالاسینی ایزله‌ییرم،
باشیم گیجه‌لیر…
یک پاسخ
چوخ گؤزل شعیر اوخودوم، لذ آلدیم، یاشاسین شاعیری، یاشاسین پایلاشانی.
زینا یورقان ترکیبینده زینا نه آنلام داشییر؟