هر نه ایستر دوز یولا چکسین یازیق یزدان بیزی
قددیمیز قویمور آچیلسین توولاییر شیطان بیزی.
شیطانا چاتمیر گوجو بیزدن دؤنوب یاردیم دیلر
کاش هئچ خلق ائتمهیئیدی خالق منان بیزی.
یوخ دئین لجبازلیغی شیطانه کی قویسون یئره
نه اؤزو دوشسون عذابه نه بیزی سالسین گیره
بو نه لجبازلیقدی کی دونیانی قاتمیش بیر- بیره
باغ جنت بوش قالیبدیر گؤزلهییر نیران بیزی.
تکجه ابلیس قویماییر اینسانی گئتسین دوز یولا
دوز دئییر شیطانلاری نیراندا چاتسین قول- قولا
بیر اشارهیله اونون هر زادینا قوشسون هولا
باغ رضوانه چاغیرسین ائیلهسین مهمان بیزی.
نئیلهییردین آی جانیم بو آغزی گؤیچک شیطانی
توولایا یولدان چیخاردا بختی یاتمیش اینسانی
بو نئجه ابلیسدی سندن چوخ فزوندور ایمکانی
اولمایا بو سؤز یالاندیر آلدادیب موللان بیزی!
ساده بیر نحو ایله وئرسین یاندی- قیندی شیطانا
حورینی وئرسین بیزه، آرواددا گئتسین غیلمانا
دیغلاداق شیطانی باغرین دؤندهرک لاپ آل قانا
قورخورام ایشلر دؤنه آخر یاپا غیلمان بیزی.
1364 – کرج
خیرالله حقبیگی (ساپلاق) ۱۳۲۲نجی گونش ایلینده آذربایجانین هریس ماحالیندا اکینچی بیر عائلهده دونیا گؤز آچمیشدیر. بیر چوخ آذربایجانلی عائلهلر کیمی آتاسینین آذربایجان دمکرات فرقهسینین سیرالاریندا اشتراک ائتدیگی اوچون تهرانا کؤچمک مجبوریتینده قالیر. بو شهرده دیپلم آلیر و ارتشده استخدام اولور. آنجاق سیاسی دوشونجهیه مالک اولدوغو اوچون بو ایشدن آزاد ائدیلیر.
ساپلاق بیر خالق سئور و آزادلیق اوغروندا دؤیوشن آذربایجان شاعری کیمی بهمن انقلابینادک چوخلی ساتیریک شعرلر مولفیاولور. اونون شعرلرینین اکثریتینی خرافات علیهینه اولان اثرلر تشکیل ائدیر. انقلابدان سونرا «هریسدن بیر سس» (۱۳۵۸) و «من گونش وورغونویام» (۱۳۶۹) آدلی غیر ساتیریک اثرلری چاپ اولور. آنجاق اونون صنعت منلیگینین گؤزگوسو اولان ساتیریک اثرلرینین اکثریتی هئچ وقت ایشیق اوزو گؤرمور.
ساپلاق انقلابدان سونرا سیاسی و صنفی فعالیتلرله مشغول اولور؛ کرج شهرینده بیر سیرا دوستلارینین اشتراکیلا «فرخی یزدی» آدینا ادبی انجومنین قوروجولاریندان اولور و ایللر بویو بو ادبی انجومنین اداره هیاتینده چالیشیر و نهایت ۱۳۸۸-جی ایلین خرداد آیینین ۸-جی گونو یاشادیغی کرج شهرینده حیاتلا وداعلاشیر.
عزیز خاطیرهسینه عشق اولسون.
