آت گئتسین
خیرالله حق بیگی – ساپلاق
(۱۳۲۲-۱۳۸۸)
اؤتور پروانه‌نی، شمعی گول خندانی آت گئتسین
بوراخ زولف چلیپانی رخ جانانی آت گئتسین
او قدری یازدیلار آخر یورولدو سوسن و سونبول
باشارسان یاز ائلین دردین گولو ریحانی آت گئتسین
گؤرورسن بی‌عدالتلیک توتوب دونیانی سرتاسر
گؤتور ال آی جانیم دای بولبول شیدانی آت گئتسین
کامان قاشدان قارا گؤزدن بیر عؤمرو یازدی شاعرلر
لبی غنچه بئلی اینجه گؤزل جیرانی آت گئتسین
اؤتور وصف گولوستانی یاز آج انسانلارین دردین
یادا گؤز یوم حقیقتدن بوتون انسانی آت گئتسین
قلم قیمتلی‌دیر گؤزله سنی چاشدیرماسین ناحق
اگر چی وئرسه‌لر دونیانی اول دونیانی آت گئتسین
اگر کئچسن حقیقتدن سنه جنت اولور دونیا
اؤزون آت اودلارا اول روضه‌ی رضوانی آت گئتسین
بهانه ائیله‌ییب زیبانی زشتی چیخما عفت‌دن
چؤله آت اؤیله بیر زشنی او جور زیبانی آت گئتسین
بوراخ زولفو آچیق یاز سؤزلری خلقی گیجللتمه
سؤزو یورغانه بوکمه پرده‌نی یورغانی آت گئتسین
اگر میزان سؤزه ترصیع و تقطیع و ملمع‌دیر
وبالی بوینوما قورخما او جور میزانی آت گئتسین
کلامی دولماپیچ ائتمه دئمه توشیح و تضمین‌دیر
قوناق گلسه سنه حوری او جور مهمانی آت گئتسین
پاس آتمیش توپلار آغزیندان قوپور یانغین قوپور توفان
یاز ایندی جبهه‌لردن اؤزگه بیر عنوانی آت گئتسین
اونودسان جبهه‌نین دردین قاراباغ دردینی آتسان
بوراخ تبریزی زنجانی آذربایجانی آت گئتسین
یازاندا بعضی مطلب‌لر گئدیر ذووقوم قاچیر ذهلم
دلی شیطان دئییر دور دفتری دیوانی آت گئتسین.
(۱): ساپلاق ۱۳۲۲نجی گونش ایلینده آذربایجانین هریس ماحالیندا اکینچی بیر عائله‌ده دونیا گؤز آچمیشدیر. بیر چوخ آذربایجانلی عائله‌لر کیمی هله یئنی‌یئتمه یاشلاریندان عائله‌سی‌ایله بیرلیکده تهرانا کؤچمک مجبوریتینده قالیر. بو شهرده دیپلم آلیر و ارتش‌ده استخدام اولور. آنجاق بیر مدتدن سونرا بو ایشدن آزاد ائدیلیر. ساپلاق بیر خالق سئور و آزادلیق اوغروندا دؤیوشن آذربایجان شاعری کیمی اسلامی انقلابادک چوخلی ساتیریک شعرلر مولفی‌اولور. اونون شعرلرینین اکثریتینی فاناتیزم علیهینه اولان اثرلر تشکیل ائدیر. انقلابدان سونرا “هریس‌دن بیر سس” (۱۳۵۸) و “من گونش وورغونویام” (۱۳۶۹) آدلی غیر ساتیریک اثرلری چاپ اولور. آنجاق اونون صنعتکار کیملیگی اولان ساتیریک اثرلری‌نین اکثریتی هئچ وقت ایشیق اوزو گؤرمور. ساپلاق انقلابدان سونرا کرج شهرینده بیر سیرا دوستلارینین اشتراکیلا “فرخی یزدی” آدینا ادبی انجمنین قوروجولاریندان اولور و ایللر بویو بو ادبی انجمنینن اداره هیاتینده چالیشیر.
تانینمیش ساتیریک شاعریمیز، اؤز کسگین اثرلری‌ایله شعریمیزین یئنی “صابر”ی آدلانان خیرالله حق‌بیگی (ساپلاق)، ۱۳۸۸ینجی اوزون خسته‌لیکدن سونرا، کرج شهرینده وفات ائتدی. آذربایجانیمیزین شاعیر اوغلونون خاطره‌سینی عزیز ساخلاماق مقصدی ایله بیر اثرینی عزیز اوخوجولارا تقدیم ائتدیک.
یک پاسخ
چوخ ساغ اولسونلار ایشیق چی و ایشیق سالان دوستلاریمیز کی ساپلاق کیمی قدرتلی شاعیرلریمیزین یادینی یادلاردا ساخلاییرلار. بئله – بئله گوزل ایشلره عشق اولسون.