بیر گون مارس‌دا یاشایان بیلیم آداملارینی داریخما باسدی. «نه ائده‌ک، نه ائتمه‌یک؟» دئیه اؤز آرالاریندا سالیب چیخدیلار، سونرا یئر کوره‌سینی آراشدیرما قرارینا گلدیلر.
یئر اوزونده هارا گئتمه‌لری اوچون ده گئجه‌یاریسی بیر روح چاغیرما سئانسی قوردولار.
چیزدیکلری کاغاذین دؤوره‌سینه اوتوروب ال- اله وئردیلر. هامیسی گؤزلرینی یوموب آیه‌الکرسی اوخودولار.
بیردن پاپاغی یاناکی، پیژامه اینینده بیر روح، گویلو‌- گوپباز کاغاذین اورتاسینا دوشدو «شهر تبریز است و جان قربان جانان می‌کند» دئیه اوزایلی بیلیم آداملارینا سسلندی.
اوچ گؤزلو باش‌عالیم، جئبیندن بیرآز تریاک چیخارتدی. تریاکی پیژامه‌لی روحا وئریب اوندان تشککور ائله‌دی. سونرا بیر- ایکی دوعا اوخویوب اونون اوستونه پوفله‌دی‌، تزه‌دن روحلار عالمینه گئری دؤنمه‌سینی ایسته‌دی.
تبریز، آذربایجان شهری اولدوغو اوچون اوزایلی‌لار نئچه هفته اوتوروب تورکجه یازیب دانیشماغی اؤیرندیلر. سونرا اهل عیاللاریندان وئدالاشیب گمیلرینه میندیلر.
بیریسینین خانیمی «منه پوسته‌لی قورابیه گتیر» او بیری‌نین اوشاغی «بابا منه تبریزدن لوکا گتیر» دئیه اوزایلی بیلیم آداملارینین اللرینه اوزون بیر لیسته وئردیلر.
ولیعصر خییاوانیندا خانیم قیزین بیرینه راست گلدیلر. اونا یاخینلاشیب خانیم باغیشلایین «قربان‌جانی آختاریریق، سیز بیلرسیز او هاردادی؟» دئیه اوندان سوروشدولار.
خانیم قیز جواب وئردی: «وآلله بیزیم محلله‌ده دئییل»، سونرا «من هئج ایندی‌یه قدر اوزایلی گورمه‌میشم. سیزینله بیر رسیم چکه بیلرم‌می؟» اونلاردان خاهیش ائله‌دی.
قیز چکدیگی رسمی اینستاقراما قویدو وآلتیندا «من و آدم فضایی‌ها» یازدی.
اوچ گؤزلو اوزایلی، یولداشلارینا «بو آدام تورکجه یازمیر، دئمک بورالی دئییل، ائله اونا گؤره ده قربان‌جانی تانیمیر، گئده‌ک آیری بیر محلله‌یه» دئدی.
گجیل قاپیسیندا قوشبار قولی، اوزاقدان اونلاری گؤروب اوجا سسله اؤز یانینا چاغیردی. «قیدش! یاخجیسیز؟ نمنه آختاریسیز؟» دئیه سوروشدو.
اوزایلی‌لار، قربان‌جانی آختاردیقلارینی و قربان‌جان‌نین، تبریز حاققیندا هر شئیی بیلدیگینی سؤیله‌دیلر.
قوشبار قولی «بونلاری کیم سیزه دئییب؟» سوروشدو.
اوزایلی‌لار «بو سؤزلری پیژامه‌لی روح بیزه دئدی» جاواب وئردیلر.
قوشبار قولی «من قربان جانی تانیییرام» دئدیگینده, اوزایلی‌لار سئویندیلر. قولی سوروشدو:
– هله دئیین گؤروم نئچه؟
– نمنه نئچه؟
اویان- بویان، چکیش- بکیش، سونوندا قولی، ایکی دنه قوشبار قوشو ایله دئییشدیریب یازیق اوزایلی‌لارین گمیلرینی اللریندن چیخارتدی.
سونرا دا «سیز گئدین، من قربان جانا دئیرم صاباح سیزین یانیزا گلر» دئییب اونلاری، اللرینده‌کی قوشبار قوشلاری ایله یولا سالدی.
قولی، تزه آلدیغی اوزای گمیسینین ایچینه گیردی. گمینین آنباریندا، اویان- بویانی قورجارایاندا یئر کوره‌سینه قاچاق گلن، پیژامه‌لی روحو تاپدی.
روح اونو گؤرجک «شهر تبریز است و جان قربان جانان می‌کند» دئدی.
قوشبار قولی اونون قولاغینین دیبینه بیر دنه مؤحکم شاپالاق یاپیشدیریب «گئده اوز دیلینده دانیش بااا» دئدی.
قولی، قاچاق گلن روحو قوشلارین قفسینه اؤتوردو. قفسین اوستونده « فارسی دانیشان شاعیر روح، ۷۵۰ مین تومن» قیمت یازیب ویترینه قویدو.