یازار: عزیزنسین
چئویرن: اسماعیل شیخلی
کؤچورن : علی آغ‌گونئیلی
ایکی گؤزوم ائششک آری‌سی!
یارالینی بئشیک‌داشلی آدی ایله تاکسی ماشینینا آتدیلار. منی ده دیری آدام کیمی یارالی‌نین یانینا اوزاتدیلار. تعجیلی یاردیم ماشینی‌نین شوفئری ایله کؤمکچیسی ده تاکسی شوفئری‌نین یانیندا اوتوردولار. یعنی ماشیندا اوچ جانلی دیری اولوب- اولمادیغینی معلوم اولمایان بیر یارالی و بیر ده منیم مئییدیم واردی.
– بو ایستی‌ده اؤلو اییلنه‌جک – دئدی.
– بیر شئی اولماز – دئیه تعجیلی یاردیم شوفئری اونا جاواب وئردی.
– بئله ایستی‌ده مئیید اییلنر؟ گؤرمورسن‌می جسد چوخدان قورویوبدور.
دوز دئییردی. اؤزوم ده حیس ائدیردیم کی، یاواش- یاواش قورویوب قاخا دؤنوردوم. بایـیرداکی ایستی بیر یاندان موتورون ایستیسی ده بیر طرفدن منی قورودوردو. ماشینین دمیرلری ده قیزمیشدی. باشا دوشوردوم کی، بیر آز دا بئله گئتسه، امللی- باشلی قوورولاجاقدیم. ماشیندان قوروموش یوخ قوورولموش جسد دوشوره‌جک‌دیلر.
ماشین بیر دایاناجاقدان کئچیردی. اورادا سونو گؤرونمه‌ین دؤرد جرگه نؤوبه واریدی، بیردن قیشقیریق قوپدو.
– قویمایـین یازیغین اوره‌یی کئچدی، هوشونو ایتیردی!
یول تنظیم ائله‌ین مأمور بیزیم تاکسینی ساخلادی. نؤوبه‌ده گون ووروب هوشونو ایتیرن کؤک بیر کیشینی ده بیزیم ماشینا آتدیلار. ایندی ماشینین دال طرفینده بیز اوچ نفر اولدوق. بیر اؤلو، بیر یارالی، بیر ده هوشونو ایتیرمیش کیشی. بیردن هوشونو ایتیرن دیللندی:
– اؤزومو هوشومو ایتیرمیش‌لییه وورماسایدیم، دوغرودان دا هوشومو ایتیره‌جکدیم.
تاکسی شوفئری کؤک کیشی‌نین یالاندان اؤزونو هوشونو ایتیرمیش‌لییه وورماسینا چوخ عصبلشدی. بیزیم شوفئر اونو ساکیتلشدیردی:
– عصبلشمه، بئله ایستی‌ده سوکان آرخاسیندا عصبلشمک یاراماز.
تاکسی شوفئری بورنوندا دئیینیردی. بیری «جان» دئسه «جانین چیخسین» – دئیه اوستونه یئرییه‌جم. شیشمان آدام دا گوهزهنین بیری ایمیش، آغزی آچیلمیشدی، هئچ سسین کسمیردی. او دئییردی کی، هوسکار شوفئرلیک کورسونا گیرمیش، اوچ یوز آدامدان آنجاق اوچ نفری کورسو قورتارا بیلمیش کی، اونون بیری ده بو اؤزو ایمیش. شوفئرلیک امتحانیندان چتین شئی ایری- اویرو یولدا سانجیلمیش پایالارین آراسیندان کئچمکدیر. گره‌ک ماشینی ائله سوره‌سن کی، پایالارا توخونمایاسان. کؤک کیشی دانیشدیقجا تاکسی شوفئری باشینی ترپه‌دیب عصبی‌لیکله «نیرچ»، «نیرچ»، «نیرچ» دئییردی. بیردن کؤک کیشی:
– ماشینی پایالارین آراسیندان کئچیرمک هر شوفئرین ایشی دئییل- دئدی.
بونو ائشیدن تاکسی شوفئری قیزیشمادیمی:
– نه؟ من کئچیره بیلمه‌رم؟ من ها! اوغلان من ماشینی پایالارین آراسیندان کئچیریم، سن ده تاماشا ائله!
تعجیلی یاردیم شوفئری:
– کئچیره‌رسن آسلانیم، کئچیره‌رسن گؤزونو یئییم – دئیه اونو ساکیت‌لشمه‌یه چالیشدیقجا، او داها دا قیزیشدی:
– یعنی دئییرسن چتین ایشدیر؟ باجارمیرسان؟ آی های من ماشینی سیرکده‌کی کیمی فوکستیروت اوینادارام و پایالارین آراسیندان کئچیره‌رم. کؤک کیشی ده قیزیشمیشدی.
– آرخاداش! سنین ماشینی کئچیره بیلمه‌یینه شوبهم یوخدور. آما بو چوخ چتین ایشدیر، اذیت چکرسن.
گونون ایستیسی، موتورون ایستیسی، قیزمیش دمیرلرین ایستیسی شوفئرین بئینینه وورموشدو.
– اذیت چکرم؟ باجارمارام؟ من سنین کیمی‌لری پایا یئرینه قویار و ماشینی ائله سوره‌رم کی، روحونوز دا اینجیمز.
– آرخاداش، سنه بیر سؤز دئمه‌دیک کی، من دئدیم کی، سینه‌سینه دؤین شوفئرلر ده بو ایشی گؤره بیلمزلر.
– بونو منه دئییرسن؟ سینه‌سینه دؤین شوفئر ائله منم. ماشینی ایکیجه بارماق یئرین اوستو ایله ائله سوره‌رم کی، خبرینیز اولماز.
– چوخ چتین…
– سن بونا باخ، هله بیر دانیشیر دا مرج گله‌رم، سنینله آرخاداش اؤزو ده بیره- بئش قویورام، نه دئییرسن؟
– آ کیشی…
– آرتیق- اسکیک سؤز لازیم دئییل، مرج‌لشمک؟
– آرخاداش…
– آرخاداش- زاد بیلمه‌رم. بئش من قویورام، بیر ده سن، نه دئییرسن؟
– آی آرخاداش…
– اوزون ائله‌مه، دئدیم قورتاردی. من ماشینی لاپ قیل کؤرپودن کئچیریم, سن ده گؤر.
شوفئر اؤزوندن چیخدی. بحثه گیریبمیش کیمی قازی آرتیردی. ماشین ائله بیل قانادلانیب اوچوردو. بیز هامی‌میز «آللاه سن ساخلا»- دئیه یالوارماغا باشلادیق.
– هه، بیر سن قوی، بئش ده من. بیره- بئش. نئجه‌دیر، راضی‌سان؟
موتور نریلده‌ییردی. یول‌لار کله- کؤتور ایدی. شوفئر اؤز هونرینی گؤسترمک اوچون گئتدیکجه سورعتی آرتیریردی، ماشین‌لارین ساغیندان، تراموایلارین سولوندان، یوک ماشین‌لاری‌نین قاباغیندان، آوتوبوس‌لارین یانیندان گولـله کیمی اؤتوب کئچیردی. نئچه دفه آز قالدی دیره‌یه چیرپسین. تراموایـین یانیندان قیل یاریب کئچدی.
– ایکیجه بارماق یئر اولسون، کئچه‌جم. بیره- بئش قویمایان ناموس‌سوزدور. نه دئییرسن؟ لاپ قیلین اوستوندن ده کئچه‌جم.
– ایناندیق، قارداش ایناندیق. کئچیره‌رسن، گؤردوک کی، کئچیره‌رسن.
شوفئر قیزیشدیغیندان هئچ نه ائشیتمیر، گؤزو هئچ نه گؤرموردو. دالیمیزجا پولیس‌لر دوشموشدولر. نه قده‌ر سیغنال وئریردیلرسه شوفئر ساکیتلشمیر. ائله تئز- تئز:
– نه دئییرسن؟ بیره- بئش قویورام. راضی‌سان؟- دئیه باغیریردی! – کیشی‌سن چیخ مئیدانا.
ماشینین گولـله کیمی گئتدییینی گؤره‌نلردن بیری صالاوات چئویردی. او بیری‌لری‌نین رنگی ساپ- ساری سارالدی، قورخودان چنه‌لری شاققیلدادی و دیل‌لری سؤز توتمادی کی، صالاوات چئویرسینلر. ایچری‌ده‌کیلر یالوارماغا باشلادیلار.
– آی قارداش، آمان‌دیر یاواش سور.
– سن مرجی اوددون…
– آللاه خاطیرینا سرعتینی آزالت…
– سؤزومو گئری گؤتورورم.
شوفئر دئییلنلره قولاق آسمیردی. تکرلرین آلتیندان چیخان داش‌لار گؤیده ویژیلدایـیردی. کؤک کیشی یالوارماغا باشلادی.
– ساخلا من بورادا دوشمه‌لی‌یم.
شوفئر هئچ کسه قولاق آسمیر، قیرمیزی، یاشیل ایشیق‌لارا دا فیکیر وئرمیردی. قاباغینا کئچنی قوش دسته‌سی کیمی اطرافا داغیداراق توز- دومان ایچینده ماشینینی‌سوروردو.
– بیر- بئشه راضی‌سان‌می؟
بئینینه آت تپمیش شوفئر هئچ دایانانا اوخشامیردی. ایلاهی هئچ اولماسا سن کؤمک اول، قوی موتور یاتسین، تکر پارتداسین، یا دا بئنزین قورتارسین. ایشین ترسه‌لیییندن بونلارین هئچ بیری اولموردو. آدام تپه‌سینده هر ایکی یوز آددیمدان بیر ماشینین یا تکری پارتدایـیب یا بنزین توکه‌نیر یا سو قورویور یا دا یاغی قورتاریر، آما ایندی… شوفئر ایسه…
– بیره بئش- دئیه باغیریر، سوکانی ساغا- سولا هرله‌ییردی.
هئچ ماجرا فیلم‌لرینده ده بئله قووهاقوو اولمور. پولیس‌لر، قانگئستئرلر ده بو سورعتله ماشین سوره بیلمیرلر. ماشینین تکرلریندن، موتوروندان ایندییه قده‌ر ائشیتمه‌دیییم سسلر چیئخیردی:
– فیررر… زینگ… فیس‌س‌س… چاک… چوک…
ایچری‌ده‌کیلر ساغا- سولا آتیلیر، بیری او بیری‌نین بئلینه مینیر، او بیری‌نین قوجاغینا یـیخیلیردی.
من یوک یئرینده ایدیم. آمما نئجه اولورسا بیلمیرم گؤزومو آچاندا اؤزومو سولدا پنجره‌نین یانیندا گؤردوم. ماشینین سیلکه‌لنیب نه حالا دوشدویونو اؤزون تصورونه گتیر. ماشین بیردن دایاندی، ایچری ده گورولتو قوپدو. باشیما بیر شئی دیدی. ماشین اوّل قاباغا سونرا دالی- دالی گئری گئتدی.
بیردن باخیب گؤردوم کی، ماشین اورتادان ایکی‌یه بؤلونوب، لاپ اورتادا بیر تئلفون دیره‌یی دیم- دیک دورور. دیره‌ک ماشینی اورتادان ایکی بیچمیشدی. من بو گورولتودن تزه‌دن اؤلدوم. آما اوّل‌دن اؤلموش اولدوغوم اوچون سسیمی چیخارتمادیم. قریبه‌لر اؤلنده ایکی اؤلورلر کی، امللی- باشلی اؤلسونلر. یاشایاندا یاری‌جان یاشایـیب‌لار، هئچ اولماسا اؤلنده ایکی قات اؤلسونلر.
کؤک کیشی سره‌سم کیمی دانیشماغا باشلادی:
– آمان آللاه، بیز ماشینا مینهنده اورتادا دیره‌ک یوخ ایدی، ایندی بو هارادان تاپیلدی؟
تاکسی شوفئری‌نین آیاق‌لاری آنا قارنینداکی اوشاغین آیاغی کیمی قارنینا یـیغیلمیشدی، بوزوشوب قالمیشدی. آما یئنه باغیریردی:
– بیره- بئش وئریرم… بیره- بئش. تانیدین منی؟ سنه دئدیم کی، ایکیجه بارماق یئر اولسون ماشینی اورادان سوروب کئچیره‌رم. گؤردون؟
باختیمدان بو دفه قضا شهرین اورتاسیندا اولموشدو. پولیس‌لر تؤکولوب گلدیلر. هامیمیزی باشقا بیر تاکسی‌یا دولدوردولار. بیر نؤو تورپاغین آلتینا گیرسم ده یعنی اؤلموش اولسام دا یئرله علاقه‌می کسه بیلمیردیم. بو اینسان‌لاردان دیری واختی چکدیک‌لریم آزیمیش کیمی ایندی ده مئییدیمی اینجیدیرلر.
سالامات قال قارداشیم ائششک آری‌سی. سنه خوش‌بخت‌لیکلر و جان‌ساغلیق‌لاری آرزولایـیرام.
اؤلموش ائششک
