یازار: عزیزنسین
چئویرن: اسماعیل شیخلی
کؤچورن: علی آغ‌گونئیلی
سئویملی دوستوم ائششک آریسی!
آرتیق قورخوم یوخدور. هئچ بیر جانلینین گله بیلمه‌دییی یئره چاتیب دایاندیم؛ قاباقدا بیر اؤرتوک واردی. اوستونده «گئری‌یه بیلیط یوخدور» سؤزلری یازیلمیشدی. آداملار نؤبه‌یه دورموشدولار. من ده نؤبه‌یه دوردوم. قاباقداکی‌لارین نه ائتدیکلرینه باخدیم. قاباقدا دایانان مامور نؤبه‌ده‌کی‌لردن نسه سوروشور، آلدیغی جاوابا گؤره قیشقیریردی:
ــ بیرینجی…
ــ پارتئره…
ــ جنت…
ــ لوژایا…
ــ‌لییکس یئره…
آداملار،گئتدیکلری یئره اویغون کاغیذلار وئریردی. بیلیط پایلاییردی. بیلیط آلان آداملار دسته‌لره بؤلونوردو. الینده‌دینک اولان بیر آدام باغیریردی:
ــ تاختالی کؤیه بییر…
نوبه منه چاتدی. مامور:
ــ کاغیذینیزی وئرین، ــ دئدی.
ــ نه کاغیذ؟
ــ ضمانتینیز یوخدورمو؟
ــ یوخدور.
ــ ضمانتینیز یوخسا، ایچری بوراخا بیلمریک.
سونرا قارشیسیندا کی کاغیذلاری قاریشدیردی. بیر یازیلی کاغیذ و بیرده فوتوگراف تاپدی. کاغیذی اوخودو. بیر فوتوگرافا بیرده منه باخدی:
ــ هه ه ه ه…هیم م م م…آیدیندیر دئمک‌سیزسینیز.
ــ بلی منم
در حال سسینی قالدیریب قیشقیردی. منی گلن زبانییه گؤستردی:
ــ آپارین! بو شوبهه‌لی و تهلوکه‌لی آدامدیر. ایچری بوراخساق عالمی بیرـ بیرینه قاتاجاق. آپارین‌دیندیرین بونو.
زبانی منی آپاردی. بیر قاپیدان ایچری ایتله‌دی. بورادا مندن باشقا هئچ کس یوخ ایدی. بیردن ایکی ال قیرخ آیاق کیمی بیلکلریمدن یاپیشدی.
ــ کیمسینیز؟ ـ دئیه سوروشدو.
ــ عدالتین دمیر پنجره‌سی.
بو عدالت باشقا عدالت ایدی. بیزیم بیلدیییمیز عدالت دئییلدی. ایلاهی عدالت ایدی.
ـ تاختالی کؤیه یوخ، لاپ جهنمین دیبینه ده گئتسن سنی تاپاجاییق، عدالتین قوللاری اوزوندور.
ایکی زبانی منی قوللاری آراسینا آلیب ایلاهی عدالتین قاپیسینا آپاردی. قاپی‌دا گؤزلری باغلی بیر قادین الینده تره‌زی دایانمیشدی.
ــ بو قادین نه ساتیر ؟ ـ دئیه سوروشدوم.
ــ عدالت چکیر ـ دئیه جاواب وئردیلر.
ــ گؤزلرینی نیه باغلاییبلار؟
ــ حاق ایتمه‌سین ـ دئیه ـ بو قادین پومالیدیر. قدیم پومالی…
ائله بو واخت مباشیر:
ــ اؤلموش ائششک !!! ـ دئیه باغیردی.
محکمه‌یه گتیردیلر. وردیش ائله‌دیییم اوچون هئچ نه سوروشمادان کئچیب. مقصیرلر کورسوسونده اوتوردوم. صدر سوروشدو:
ــ آدین؟
ــ اؤلموش ائششک
ــ بابانین آدی؟
ـ عدالت بی، سوروشدوقلارینیزین هامیسینی بیلیرسینیز، بو نه نؤمره بازلیقدیز.
ـ فورمال قایدالاری پوزما.
ــ باش اوسته.
ــ هاردا آنادان اولموسان؟
ــ دئیه سن یورغان ـ دوشکده.
ــ تاختالی کؤیه نه مقصدله گلمیسن؟
ــ آزادلیق اوچون.
ــ نه‌ده اتهام ائدیلدییین آیدیندیرمی، سنه؟ سن گونشه سو آتماقدا تقصیرلندیریلیرسن؟ صنعتین نه‌دیر؟
ــ هردن بیر فورصت تاپاندا یازیرام.
ــ نه یازیرسان ؟
ــ هاوادان، سودان، اوندان ـ بوندان.
ــ آیدیندیر. سنین موقصیرلییین حاقیندا الده اولان معلوماتدا دا گؤستریلیرکی، هاوادان، سودان، اوندان ـ بوندان یازیرسان.
ــ یازمامیشام. یازارام، یازاجاغام.
ــ هامیسی بیردیر. یازدین، یا خود یازاجاقدین، یازماق ایستییردین، عئینی شئیلر‌دیر.
ــ اوراسی ائله‌دیر. اما هاودان، سودان یازماق ایستییردیم.
ــ آیدیندیر. هاوا تجارت دئمکدیر. تجارت ایسه دئمک… دئمکدیر ائله دئییلمی ؟
ــ بلی ائله‌دیر بی افندیم.
ــ آیدیندیر. هاوایا، دولاییسی ایله اونا ـ بونا حقارتله باخمیسان دوز دئمیرم؟
-بلی ائلمیشم.
ــ بونا گؤره بئش ایل جزان وار. ایندی کئچک «سودان یازاجاق‌لارینا»
ــ کئچک.
ــ سودان یازاجاقدیم دئمکده مقصدین نه‌دیر؟ مملکتده سووارمی؟ آنجاق نیطقلر. نیطقه نه وئریرلر؟ دئمک سن اونون ـ بونون شخصیتینی تحقیر ائتمیسن، ائله دئییلمی؟
ــ بئله چیخیرکی ائتمیشم.
ـ چوخ یاخشی، بئش ایلده بونا جزا دوشور. یادیندا ساخلا، جمعی اون ایل. کئچک او بیریلرینه. اوندان ـ بوندان یازارام، دئدین. او، بو کیمدیر؟ دئمک حقارت ائله‌میسن؟
ـ بئله چیخیرکی، ائله‌میشم.
ـ بئش ایلده بونا. دئمک اون بئش ایل. حسابی ایتیرمه.
ــ آیدیندیر.
ــ باشقا نه یازیرسان ؟
ــ یازیرام، افندیم.
ــ یازیرسان، یازیرسان، بوینونا آل
ــ مکتوب یازیرام.
ــ بئله دئمک مقصر مکتوبلاری او بیرینه یازیر ائله‌دیر یا یوخ ؟
ــ بلی.
ــ بئش ایل ده بونا دئمک اییرمی ایل.
ــ بونلار اوزون چکه‌جک ؟
ــ بو نه دئمکدیر؟.کئچک ایندی ده دوشوندوکلرینه باشینداکیلارلا حقارت ائتدینمی ؟
ـــ…!!
ــ جاواب وئر، ائتدینمی؟
ــ ائتمه‌دیم افندیم.
ــ بوینونا آل!
ـ ائتمه‌دیم، افندیم
پچیلداشماغا باشلادیلار… سونرا قراری اوخودولار.
ــ مقصرین گناهلاری تصدیق اولوندوغونا گؤره اییرمی ایل آغیر جزایا محکوم ائدیلسین. آنجاق گناهلارینی خیالیندا ائتییینه، یعنی آغلیندان کئچیردییینه گؤره جزاسیندان ایکی یاریم گون آزالدیلسین. یعنی اون دوققوز ایل اوچ یوز آلتمیش ایکی گون یاریما ائندیریلسین، جزاسینی چکمک اوچون جهنمه سورگون ائدیلسین، اگر جزا مودتینی چکیب قورتارماغا عؤمورو چاتماسا، واریث‌لری اونون عوضینه همین جزانی چکیب تاماملاسینلار. اگر بو جزا مقصری ساکیتکلشدیرمه‌سه قیل کؤرپودن کئچیریلسین.
قرار بیر سسله قبول اولوندو.
ــ قرار اوخوندوقدان سونرا الهی عدالت محکمه‌سی‌نین صدری سوروشدو :
ــ سؤزون وارمی ؟
ــ آللاهی چاغیریرام.
ــ بئله اولماز. حقوقو جهتدن دانیش!
یعنی دئدیییمی باشا دوشموردو، ایسته ییردی کی، اوزون، دولاشیق جمله‌لرله دانیشیم.
ــ تاختالی کؤی جزا قانونلارینین هانسی ماده‌سینه گؤره محکمه‌نی گیزلی آپارماق، هانسی جزا مجله‌سی‌نین هانسی بندینه اساسا…
ـــ کس سسینی محکمه آرتیق قرارینی وئرمیشدیر.
ــ یاشاسین عدالت! یاشاسین فانارپاخچا ! ــ دئیه باغیردیم.
بئله بئله ایشلر، سئویملی ائششک آریسی. سیزین طرفلرده نه وار، نه یوخ؟ بیزیم محله‌نین زیبیل‌لرینی آپاردیلارمی؟ یئنه سولار کسیلیر؟ الکتریکینیزده اول کی کیمی ان آزی هفته‌ده اوچ، دورد دفعه اولمور، ائله می؟ کوچه‌لره کانالیزاسییا سویو آخیب چاتیر،گؤلمچه‌لر یاراتدیغی حالدا صحنیه اداره‌لری یئنه خسته‌لیکلرین قارشیسی آلیندی دئیه یازیرام؟ یئنه اول کی کیمی باش ناظر خالقی آلداداراق فیلان شئیین قیمتی باهالانمایاجاق دئیه وعده وئریب، سونرا دا وارلیلارا اشاره ائدیب همین اوجوز شئی‌لری آلدیردیقدان سونرا بیردن ـ بیره قیمتی بیره اون آرتیریب وارلیلارا میلیونلار قازاندیریرمی؟ سیزدن اؤترو نه قده‌ر داریخدیغیمی تصورونه گتیره بیلمزسن. عزیز گؤزلریندن اؤپورم.
« اؤلموش ائششک »
