یازار: عزیزنسین
چئویرن: اسماعیل شیخلی
کؤچورن: علی آغ‌گونئیلی
سئویملی ائششک آریسی!
بیلرسن کی من ساغلیغیمدا دا یئریمی ده‌ییشمه‌یی وئجیمه آلمازدیم. هاردا یوخوم گلدی، اورادا دا یاتاردیم. ائوده، حبسخانادا، جزا ائوینده، هتئلده، کوچه‌ده، چمنلیکده، ایچری‌ده، باییردا، هاردا اولسا یاتاردیم. قهوه‌خانادا، ائوده، استول اوستونده، دیزیمین اوستونده. آنجاق یئرینی ده‌ییشمه‌یی باجارمایانلارا یئرینی یادیرغاماغی بیلمه‌ین آدام‌لارا غبطه ائدیردیم. اصلینده بو بیر قوروپ امتیازلی شخص‌لره عاید اولان خصوصیت‌دیر. اؤز یئری ـ یواسی اولمایان آدام‌لار اوچون فرقی یوخدور. هارا گلدی اونا وردیش ائدیرلر. اونلارین: «بو یئرده یاتا بیلمیرم» دئمه‌یه حاقلاری یوخودور. بونو آنجاق وارلیلار ائده بیلر. ان مجلل هتئلده بئله یاتسالار سحر تئزدن گرنشه ــ گرنشه اویانیب: «بوگئجه یاتا بیلمه‌میشم، یئریمی ده‌ییشنده همیشه بئله اولور»دئین وارلیلار سویله‌یه بیلرلر.
قبیریمده بئله اولدو. یادیمداندی. اوشاقلیقدا «آلتیم تورپاق اوستوم تورپاق» دئیه بیر دینی ماهنی اوخویوردوق. بورادا یاتاندا همین ماهنینی خاطیرلادیم. آلتیمداکی نملی تورپاق یوموشاق بیر دؤشک، اوستومده کی نملی تورپاق ایسه حزین بیر یورغان ایدی. یئریم پیس دئییلدی، آمما یوموشاق یئریمه بیر شئی باتیردی. الیمی همین شئیه اوزاتدیم. ائله بو واخت:
ــ اویون آچما ـ دئیه آلتیمدان کیمسه دیللندی.
اؤلو اولماسایدیم، بو سسدن قورخاردیم. آما اؤلولر قورخمازلار. گؤردوم کی، آلتیمدا بیر اؤلووار.
ــ سن بورادا نه ائدیرسن؟ بورا منیم مزاریمدی.
ــ دئ گؤروم، سنین بوردا نه ایشین وار ؟ بورا منیم قبریمدیر.
ـــ بورایا من اؤزوم گلمه‌میشم. منی بورایا باسدیریبلار.
ــ منی سندن ایکی گون اول بورایا باسدیریبلار. دئمک قبیر منیمدیر.
ــ ائله سه بس منی باسدیراندا نییه سسینی چیخاریب، دئمه‌دین بورا منیمدیر؟
ــ دیریلر اؤلولرین سسینی ائشیتمیرلر.
ــ ساغلیغیمیزدا سسیمیزی چیخارتمادیق، اؤلندن سونرا دا سوسوروق.
ــ یاشامایانلار ساغلیغلاریندا دا سسلرینی چیخاردا بیلمیرلر.
اهالینین سایینی حسابلایاندا آدیمیزی سیاهییه یازسالار دا اؤلو کیمی حیات کئچیردیییمیزدن سسیمیزی دیریلر ائشیتمیردیلر.
ـــ باشا دوشدوم. سیز ده منیم کیمی آنادان اولاندان اؤلو کیمی یاشاییب اؤلنلردنسینیز.
ــ ائله اولماسایدی، بیزی تورشویا قویولان خیار کیمی ایسته‌دیکلری یئره دولدورا بیلمزدیلر.
ـ من ائله بیلریدیم اؤلندن سونرا «وارلی، کاسیب» دئیه آییر سئچکیلیک اولمایاجاق.
ـ اولمایاجاق. آنجاق ایندی یوخ سوموکلریمیز چورویندن سونرا.
ـ خواهش ائدیرم منه باتان شئیی چکین الینیزدیمی بالدیرینیزدیمی بیلمیرم، اویانا قویون.
ــ اگر بو ناراحاتلیغا دؤزمورسن سه، اؤزونه آیری قبیر دوزلتدیریدین.
ـ اگر سیز منه باتان شئیی اویانا قویسانیز ناراحات اولارسینیز؟
ــ من بونا آلیشمیشام، ناراحات دئییلم. ساغلیغیمدا گئجه‌لر بیر کیچیک ائوده یئددی آدام یاتاردیق. کیمین نه‌یینه نه باتاردی‌سا، فیکیر وئرمیردیک. بورا اورادان چوخ راحاتدیر. هئچ اولماسا بیر قبیرده یئددی یوخ، اوچ آدام یاتیریق.
ـ نئجه اوچ آدام ؟ اوچونجوسو کیمدیر؟
ـ منیم آلتیمدا دا بیر اؤلو وار.
ــ نه دئییرسینیز؟ جانیم، باری بیلیرسینیزمی آلتینیزداکی اؤلو کیمدیر؟
ــ بیر قادین‌دیر
ــ نییه بیزیم هامیمیزی بیر مزارا دولدوروبلار؟
ــ نه اولاجاق، ایندی هر شئی کیمی قبیر یئرلری ده تاپیلمیر. اونا گؤره بیر قبیری آیری ـ آیری آدام‌لارا خلوتی بیر نئچه دفعه ساتیرلار. اونا گؤره ده سئل‌یوتکا کیمی بیزی اوست ـ اوسته ییغیرلار.
درینلیکلردن ویزیلتی کیمی بیر سس گلیردی:
ــ هر قبره اوچ ـ دورد اؤلو باسدیرماسالار، شهر قبیرستانلیغا دؤنر، هئچ کئچمه‌یه یئرده اولماز. دونیادا هئچ دیری‌لره یئر تاپیلمیر، اؤلولره یئر هاردان آلسینلار؟
آلتیمداکی اؤلودن:
ــ بو دانیشان آدام کیمدیر؟ ـ دئیه ــ سوروشدو
ــ آلت قاتداکی خانیم‌دیر.
ــ نییه سسی ائله ویزیلتی کیمی گلیر؟
منیم سئوالیما آلتداکی اؤلو ویزیلتییا بنزر سسله جاواب وئردی:
ــ چونکی من بیر خاطایام.
ــ نه ؟ خاطا ندیر؟
ــ دقتورلارین خاطاسییام. ائشیتمه‌میسینیزمی بیر آتالار سؤزو یارانیب:
«دوقتورلارین خاطاسینین اوستونو قبیر اؤرتر» دوقتورلارین الیندن خاطا چیخدی منی اؤلدوردولر. خاطالارینین اوستوآچیلماسین دئیه درحال گتیریب تورپاغا باسدیردی‌لار. اونا گؤره ده سسیم ویزلتی کیمی چیخیر. اؤلولر سون آنلارینداکی سسلری ایله دانیشیرلار. من اؤلن واخت سؤز سؤیله‌میه حالیم قالمامیشدی، طاقسیزلیکدن سسیم ویزیلتی کیمی چیخیردی. نئجه اؤلمه‌ییمی بیلمک ایسته‌ییرسسینیزمی؟
ــ البته
قادینلا منیم آرامدا اولان آدام:
ــ رجا ائدیرم دانیشمایین، بسدیر، ـ دئدی ـ من آروادیمین دیر‌دیریندان یاخا قورتاریب اؤز بئینیمی دینلمک اوچون اؤلوب بورایا گلمیشم، بورادا دا سیز قاباغیما چیخیبسینیز. منی بورایا باسدیراندان بری دوز بئش کره نئجه اؤلدویونوزو دانیشیبسینیز.
ـ دردینی سؤیله‌مک ایسته‌ین قادین جاواب وئردی:
ــ آما اوست قاتا یئنی گلن بی منی دینله‌مک ایسته‌ییر، سن ایسته‌میرسن قولاق آسما.
هئچ منیم فیکیریمی بیلمه‌دن قادین ویزیلداماغا باشلادی:َ
ــ گؤزلریم پیس گؤروردو. بیز کاسیب آداملاریق. آدلی ـ سانلی بیر گؤزحکیمی‌نین شخصی معالجه‌خاناسینا پولوم اولمادیغی اوچون گئده بیلمه‌دیم. دولت خسته خاناسیندا یاتاسی اولدوم. خسته‌لری بیر اوتاغا دولدوردولار. یئدی ـ سگیز آدام ایدیک. بیر طب باجیسی: «هایدی، پئنت گئنه !» دئیه اوستوموزه قیشقیردی. من: «گؤز معالیجه‌سینه گلمیشم» – دئدیم. بیر باشقاسی: «منیم شکریم وار» ـ دئدی. او بیری ایسه «رئنت گئن ندیر جانیم، ـ دئدی ـ « من خسته یانینا گلمیشم » آنجاق چوخ اؤتکم اولان خانیم هئچ بیریمیزه قولاق آسمادی. «رئنت‌گئن معاینه‌سیندن کئچمه‌دن خسته‌لییی تعیین ائتمک ممکن اولماز. اگر سیز مندن یاخشی بیلیرسینیزسه داها بورایا نییه گلیبسینیز؟ بورا دولت خسته‌خاناسیدیر. سیزی پولسوز معالیجه ائله‌ییریک. سیز ده ناز ساتیرسینیز. تئز اولون» ـ دئدی. بیزی آرخادان ایتله‌ییب رئنت گئن اوتاغینا سالدی. خسته یانینا گلن آدام قاباقدا ایدی. اوندان فیلم، یعنی لئنت اوچون پول ایسته‌دیلر. «نه فیلم بالام، بیز کینویا گلمیشیک، یوخسا خسته خانایا ؟» ـ دئدی. سونرا باشا سالدیلارکی، رئنت گئن ائله‌مک اوچون لئنته پول لازیمدیر. وئردی.
رئنت‌گئن معاینه‌سیندن کئچدیم. حکیم رئنت‌گئن لئنتینه باخیب: «چکه‌جه‌ییک» ـ دئدی. قیشقیرماغا باشلادیم. دوقتور منی ساکیتلشدیردی. «قورخمایین، مورفین ووراجام، هئچ آغریسینی بیلمییجکسن. » نه‌یی چکیرسینیز؟ هئچ گؤزده چکیلرمی؟». «گؤزونوز یوخ، دیشیینیزی چکه‌جم.» بوتون خسته‌لیک‌لری تؤره‌دن چوروک دیش‌دیر. خسته‌خانانین دیش حکیمی چوروک دیش عوضینه ساغلام بیر دیشیمی چکدی. ایکینجی اوچونجو دیشیمی چکنده گؤردوم کی، یوخ، قارداش، بو منیم دیشلریمی کرمین دیشلری کیمی چکیب قورتاراجاق. «نئچه دیشیمی چکه‌جکسینیز؟» دئیه ـ سوروشدوم.« هامیسینی، دیش‌لرینین هامیسینی چکمه‌سم پروتئز قویا بیلمه‌رم کی. » ـ دئدی. من آستا ـ آستا باغیراراق گؤز معالیجه‌سینه گلدیییمی باشا سالماغا چالیشدیم. حکیم منیم خسته‌لیک کاغیذیما باخیب ـ «یلاهی ـ دئدی ـ قادینین آدینین احمد اولدوغونو ایلک دفعه گؤرورم ». «احمد ندیر؟ احمدی هاردان چیخارتدنیز؟ ـ دئدیم. «من هاردان چیخارتمامیشام، خسته‌لیک کاغیذیندا بئله یازیلیب» دئدی. آیدین اولدوکی، احمد آدلی چوروک دیشلی بیر خسته‌نین کاغیذی ایله منیمکی قاریشیق دوشوب، اونا گؤرده ده منیم ساغلام دیشلریم چکیلیب. «دیشلریم حاییف دئییلمی؟» دئدیم. «حاییف و وای احمدین حالینا» ـ دئیه دوکتور جاواب وئردی. – «او آدامین دیشلری چوروک اولدوغوندان بؤیرکلرینده التهاب وار. ایندی اونا سیزین یئرینیزه گؤزلوک وئریبلر. گؤزلوک بؤیرکلری یاخشی ائله‌مز. سیزین‌سه ساغلام دیشلرینیزی چکدیک، آمما بیر ائله خاطا اولماییب. اول ـ آخیر بو دیشلر چورویه‌جک و چکیله‌جکدی.» من آغلایا ـ آغلایا، باغیرا ـ باغیرا اوردان چیخیب گئدرکن، دهلیزده یوموشاق قلبلی بیر حکیم یانیما گلیب: «باغیشلایین ـ دئدی ـ نه اولوب؟» منی ساکیتلشدیرمه‌یه چالیشدی. من باشیما گلنلری دانیشان کیمی ویزیت ورقینی وئریب: «خسته‌خاناما گلین سیزی معاینه ائدیم»ـ دئدی. ائرته‌سی گون گئتدیم. بو آدام عصب حکیمی ایمیش. «منیم عصبلریم خسته دئییل، گؤزلریم پیس گؤرور» دئدیم. دوکتور: «عصب خسته‌لییی او بیریلرینه بنزه‌مز»، ـ دئدی.ـ «سیز هئچ ایندییه کیمی دلی اولدوغونو بیلن بیر دلی گؤروبسونوزمو؟ بوتون خسته‌لر خسته‌لییی‌نین نه اولدوغونو دئییرلر، آمما دلی‌لر دلی اولدوغلارینی بویونلارینا آلمیرلار. اونا گؤره ده سیزده خسته‌لی‌یینیزین نه اولدوغونو بیلمیرسینیز.» جراحیه باشلادی. عصب حکیمینین عملیاتیندان سونرا معلوم اولدوکی، منده دامار خسته‌لییی وار. عصب حکیمی منی داخیلی خسته‌لیکلر حکیمی اولان بیر دوستونون یانینا گَؤندردی. او، قانیمی معاینه‌یه گَؤندردی؛ قانیمدا نسه تاپان دوکتور چاشدی. «بیرده قانی آنالیز ائتمه‌لی‌ییک» _ دئدی. اصل فاجیعه ده بوندان سونرا باشلادی. چونکی ایکینجی آنالیزدن سونرا حکیم یازییا باخیب: «عذر ایسته‌ییرم سیزده ظؤهره‌وی خسته‌لیک وار » – دئدی.
بو، رذالت ایدی. منیم کیمی ناموسلو بیر قادیندان بو خسته‌لیک؟! کیشیم بیلسه نه اولار؟ ائه باشیما گلنلرین هانسی بیرینی سؤیله‌ییم. بیلیرسینیزمی نه اولموشدو؟ لابراتورییادا منیم آنالیزیمله باشقاسی قاریشمیشدی. ظؤهره‌وی خسته‌لییی اولان بیر کیشی‌نین آنالیزی ایله منیمکینی ده‌ییشیک سالمیشدیلار. ایندی بو ایشین ایچیندن چیخا بیلرسن‌سه چیخ گؤروم نئجه چیخاجاقسان. او دوقتور سنین، بو دوقتور منیم، داوا – درمان، آخیردا دا بیر گؤزلوک آلماق عوضینه بورایا گلیب چیخدیم. اؤلومومدن بیرآز اول حکیملر دونیادا نه قده‌ر خسته‌لیک وارسا، هامیسینی منده تاپمیشدیلار. دؤولت اداره‌لرینده آداملاری، قولوقچولار نئجه اؤتورها ـ اؤتور سالیرسا، منی ده حکیملر ائله‌جه اؤتور ها اؤتوره سالدیلار. ائله ضعیفله‌میشدیم کی، سسیم میلچک ویزیلتیسینا دؤنموشدو. اؤلمه‌ییمه چوخ شادام، شوکورکی اؤلوب جانیمی قورتاردیم.
قادینین دئدیک‌لرینه او قده‌ر کدرلندیم کی اؤلو اولماسایدم آغلایاجاقدیم، آما اؤلولر آغلامازلار.
سئویملی ائششک آریسی!
ایندی اوره‌ییندن نه‌لر کئچدییینی دویان کیمی‌یم. دوشونرسن کی، «اؤلولرآغلاماز، اؤلولر یئمز، اؤلولر قورخمور، اؤلولر دانیشمیر، اؤلولر یاتمیر، دئمک اؤلولر نؤوبه چکن عسگرکیمی بیر شئی‌دیر، ائله بیر ـ بیریمیزه بنزه‌ییریک.»
سنی اوره‌ییم یامان ایسته‌ییر سن نئجه ؟
قالاتا پانتون کؤرپوسونون یانیندا ماوی – یاشیلا چالان خلیج سولارینا مندن سالام سؤیله. ائمینؤنو میدانینا چیخان یئرده یئنی جامی طاغی وار، اورادان کئچنده منی یادینا سال. ساغلیغیمدا یالنیز اورادا اؤزومو سربست حیس ائدردیم. چونکی ساغلیغیمدا سربستلیین نه اولدوغونو بیلمیردیم، اونو یالنیز کیتابلاردا اوخودوم. یئنی جامی طاغی نین آلتیندا دوروب، مئهین سرینلییینی بدنیمده حیس ائتدیکده «دئیه‌سن سربستلیک، آزادلیق دئییلن شئی ائله بودور» دئیه دوشونردیم.
مکتوبومون سونوندا دنیزلره باتان زهرلی عئینیندن کدرله اؤپورم. سئویملی ائششک آریسی!
دوستون
اؤلموش ائششک.
