یازار: عزیزنسین
چئویرن: اسماعیل شیخلی
کؤچورن: علی آغ‌گونئیلی
«بورج ایچینده اؤلمک ایسته میین اؤلموش ائششیین سون مکتوبودور.»
سئویملی دوستوم!
منی بورادا قویماغا یئر تاپمادیلار. گوناهلاریم او قده‌ر چوخ‌ایمیش کی، جهنمده ده منه یئر اولمادی. هله‌لیک بورادا قالسین دئیه منی جهنمین‌دیبینه آتدیلار.
ساغ واختی بیزی جهنمله قورخودوردولار، اما بورا دئدیکلری قده‌رده پیس یئر دئییلمیش. بورانین نئجه بیر یئر اولدوغونو سنه سؤیله‌ییم.
دئییلدییی کیمی جهنم بیردن اود توتوب یانیر، بیردن ده سویویوب بوز اولور. منیم ساغ واختی یاشادیغیم آلت قاتداکی زیرزمی ائویم یایدا اود توتوب یاناردی، قیشدا دا بوزا دؤنردی، بورادا ائله‌دیر. اؤزون بیلرسن کی زیرزمی ده کی ائویمیزه هئچ یئردن هاوا گلمزدی، بورادا ایسه جهنمه یئنی بیر گوناهکار گلنده هئچ اولماسا قاپی آچیلیر و ایچری بیر بالاجا هاوا گلیر. داها دوزونو دئسک جهنمین هاواسی منه ضرر وئرمه‌دی، عکسینه دادیما چاتدی. او دونیادا یاشایاندا ها آرزولاردیم کی، یایلاغا گئدیم؛ اما قسمت اولمادی. ایندی ائله بیل بورایا یایلاغا گلمیشم. بورادا نه میلچک وار نه تاختا بیتی. نه بیره وار، نه ده قونشولاریمین های ـ کوی گورولتوسو. نه گنجلرین بیر ـ بیرینی هارایلاماسی ائشیدیلیر، نه ائششک آنقیرتیسی، نه ده ساتیجیلارین باغیرتسی. فیکیرلش، قارداشیم، فیکیرلش، بورادا قزئت ده یوخدور. یئییب یاتیرام، بوینوم شیشیر. دونیاداکی ائویمیزده بیرده اوست قات دا یاشایانلارین گورولتو – پارتیلتیسی واردی، بورادا ائله بیر ایشکنجه هئچ کسین آغلینا بئله گلمیر.
دونیادا سویوقدان تیرـ تیر اسمکدن ایچیم دونموشدو. بورادا ایسه سوموکلریم یئنیجه ایسینیر. زبانیلره: «یالواریرام، بیرآزدا اوستومه اود آتین» ـ دئدیکده، چاشیب قالیرلار.
دئییردیلر کی، بورادا یئر چوخ داریسقالیقدیر، آداملار بیر ـ بیرینین اوستونه قالاقلانیب کیمی آغلاییر. کیمی باغیریر. هانی بونلار؟ هئچ بیری یوخدور. اینان کی، بورا بیزیم ائو کیمی دار دئییل. ایکی گؤزلو بالاجا منزلیمیزده آنام، قاینانام ، بئش اوشاق، آروادیم و من، دوز دوققوز آدام یاشاییردی. اینسانلیقدان کنار اولار دئیین، جهنمی او قده‌ر ده داریسقال یاراتماییبلار.
سئوگیلی قارداشیم! بورانی سنه تعریفلمکله سؤزومو قورتارا بیلمه‌رم. بیزیم کیمیلری چوخدان اؤلوب جهنمه گلملی ایمیش، آنجاق بیلمه‌میشیک. بورادا راست گلدیییم ایکی آرکاداشدان سوروشدوم:
ـ بئله بیر یئره گلدیینیزی نه اوچون ایکی بارماق کاغیذلا خبر وئرمه‌میسینیز؟
بیری:
– تالان می وار؟ ـ دئدی ـ ایسته ییرسن دونیاداکیلارین هامیسی خبر توتسون و آخیشیب گلسینلر، بورانین دا دادی دوزو قاچسین؟
او بیری :
ـ من سنه مکتوب یازدیم ـ دئدی ـ ائله بیل بیزیم پوچتالاردان خبرین یوخدور. آنکارادان «گلیرم قارشیلا» – دئیه ایلدیریم سورعتی‌له تئلگرام وورسان، تئلگرام سندن ایکی گون سونرا گلیب چاتاجاق. من سنه مکتوب یازدیم، اما پوستاچی سن اؤلندن سونرا مکتوبو ائوینیزه گتیریب.
هه، قارداش آز قالمیشدی اونودوم بورانین ان بؤیوک یاخشیلیغی ائوصاحیبی وکرایه نشین اولماماسی‌دیر. اؤزون بیلیرسن کی، صاف واختی هئچ بیر ائوده دؤرد آیدان آرتیق یاشایا بیلمیردیم. ائو کرایه‌سین اؤده‌یه بیلمه‌دیییمیزدن اله کئچن بیر ایکی پارا شئیلریمیزی آلار، قالان باراخانامیزی باییرا آتاردیلار. بورادا ائو صاحیبی ائودن قوواجاق دئیه قورخو کئچیرمیرلر. نه کیره وار، نه اؤده‌مک وار، نه ده قووولماق. ایسته‌دییین کیمی یاشا، یات.
تاسف‌لر اولسون کی، بوراداکی راحاتلیغیم دا اوزون سورمه‌دی. زبانیلرگوندن – گونه شیشیب، صاحبی – اختیار بیر سیاست آدامی کیمی گؤبک باغلادیغیمی گؤرونجه بؤیوکلردن بیرینه «بو نه جور آدام‌دیر، نه اوددا یانیر، نه ده سویوق دا دونور، قیزارمیش دمیرله داغلادیغجا اوخای دئییب لذت آلیر.» ـ دئیه شکایت ائتدیلر. او بؤیوک ده او دونیادان، تهلوکسیزلیک مدیریتیندن بونون سببینی سورشموش و منیم دوغوم حاقینداکی شهادتنامه‌می ایسته‌میشدیلر. تهلوکسیزلیک اداره‌سیندن گلن جواب دا « یئر اوزونده اونون چکمه‌دییی بیر ایشگنجه قالمادیغیندان هر جور عذاب ـ اذیته اؤیرشمیشدیر. جهنمده هاواسینی دییشمیش و اورایا وردیش ائتمیشدیر. اگر سیز اونا اذیت وئرمک ایستییرسیزسه جنته گؤندرین. راحاتلیق اونو اینجیدیر. راحاتلیغا اؤیرشمه‌دیی اوچون اورا دا بند اولا بیلمز. اونا وئریلجک ان بؤیوک جزا آنجاق بو اولا بیلر» ـ دئیه یازمیشدیلار.
سئویملی قارداشیم! دونیادان بو جاواب گلندن سونرا چکدییم اذیت‌لری سنه یازماقلا قورتارماز. منی در حال جهنمدن جنته آتدیلار. بورا منیم کیمی راحات حیاتا آلیشمییانلارین یئری دئییل. چوخ اذیت چکیرم.
جنت دئییلن یئرین نئجه بیر یئراولوغونو بیلیرسن می؟ قیسا جا اولاراق دئییم: هرهانسی مخالفت پارتیاسی حاکمیته کئچمزدن اول، حاکمیته کئچرکن مملکتی نه حالا سالاجاقلارینی نئجه دولاندیراجاقلارینی اولجه‌دن وعده ائتدیکلری کیمی، بورادا دا چوخولو وعده‌لر وئریرلر. بورادا نه قده‌ر سیخینتی جکدییمیزی اؤزون دوشون. گلن ایل، اگر یاغارلیق واختی سئل اولماسا، هاوا قوراق کئچمه‌سه، محصول بول اولاجاق، یاشاییش دوزه‌له‌جک.
من بوندان یاخشی وضعیتی تصورومه گتیره بیلمیرم. جنت دئدیکلری یئر، قوجانین میخاناسینا بنزه‌ییر. آنجاق فرقی بودورکی ، بورادا شراب‌لار کوپ‌لرده‌دیر، شوشه‌لرده دئییل. هر طرفدن شیرها شیر آب کوثر آخیر. ایسته‌دییین قده‌ر دولدور ایچ. هم ده بورادا پول ـ پارا ایسته‌ین یوخدور. آغاجلارین آلتی عاشیقله معشوقلارین مسکنی‌دیر. حوری‌لر بیر یاندا، قیلمانلار بیر یاندا ،کئفینده‌دیر.
سن اونو بیل کی، بورادا اینسانین راحتلیغیندان پارتلاماسی اوچون هر جوره شرایط وار.
بئله راحات شرائطده یاشاماغا وردش ائلمه‌دیییم اوچون داریخیرام، جهنمین دیبینه گئتمه‌یه حاضیرام. ایلک گونلر بورادا قالماییم، نه‌لر چکدیک‌لریمی بیلمه‌سین‌لر دئیه اؤزومو ساخلادیم و دوشوندوم کی، بلکه یئنی‌دن جهنمه قایتارالار، چوخلارینا دئدیم، اما بو جنت دئییلن یئر او یئرلردن دئییل، قارداشیم.
بومکتوبو آلان کیمی اوراداکی بوتون دوستلارا خبر وئر، قوی اونلار منیم کیمی آخماقلیق ائلمه‌سینلر. هر حالدا بیزیم دوستلاردیر، بیلیرم جهنمه گلجکلر، جهنمده راحات دولاندیقلارینی هئچ کسه بیلدیرمٍه‌سینلر. آرا ـ سیرا کلک ایشلتسینلر.
-آه، اوف، آه، اوف ـ دئیه باغریب چیغیرسینلار. یوخسا اونلاری دا منیم کیمی جنتین بیر گوشه‌سینه آتسالار، ایش بیتدی.
کئچن گون بوردا بیزیم مملکتدن اولان بیرسی ایله راستلاشدیم. چوخدان اؤلوب.
ــ مملکتده نه وار نه یوخ ؟ ــ دئیه سوروشدو.
ــ هئچ بیر شئی یوخدور ــ دئدیم.
ــ دئمک هر شئی دییشمیشدیر ــ دئدی.
ــ خیر هئچ شئی دییشمیشدیر.
ــ حامام؟
ــ کوهنه حاماملار‌دیر. تاریخی ده‌یری وار. دئیه‌سن اوچورمورلار. گؤزله‌ییرلرکی، اؤزــ اؤزونه اوچسون.
ــ بس تاج
ــ کوهنه تاج‌دیر. اودا تاریخی اولدوغو اوچون ده‌یمیرلر. آنجاق تئز ـ تئز قالایلاییرلار.
ــ بئله. بکری مصطفی ایندی نه ایشده‌دیر؟
ساغیما سولوما باخدیم.
ــ قورخما، ـ دئدی ـ بورالاردا ائله شئی‌لر یوخدور.اوره‌یین نه ایسته‌ییرسه دانیش
وردیش پیس شئی‌دیر قارداش. من قورخاقلیغا وردیش ائله‌دیییمدن هئچ نه دئیه بیلمه‌دیم. باشیمی آشاغی سالیب دایاندیم. بونو گؤرونجه :
ــ بااای ی ی… ــ دئدی
من ده :
ــ بااا ا ی ی ی… ــ دئدیم.
سئویملی قارداشیم، ائششک آریسی!
بلکه بو سنه یازدیغیم سون مکتوبدور. دوستلاریما دا دوشمنلریمه ده سالاملاریمی سؤیله. بورالاردا ایشلر باخ بئله‌دیر، اورالاردا نئجه‌دیر، اونو بیلیرم.
ــ باااای ی ی…
ــ باااا ی ی ی…
هلبت بیرگون بیر ـ بیریمیزه قووشاریق. کدرله گؤزلریندن اؤپوره‌م.
اؤلموش ائششک.
سون
