یازار: عزیزنسین
چئویرن: اسماعیل شیخلی
کؤچورن: علی آغ‌گونئیلی
سئویملی دوستوم ائششک آرسی!
کئچن مکتوبومدا دوختورلارین خاطاسی اوزه‌رینده میلچک ویزیلتیلی سسله دانیشان اؤلموش بیر قادینین باشینا گلن احوالاتلاری یازمیشدیم. اونون دئدییینه گؤره حکیملر خسته‌لری بیرـ بیرلرینه اؤتوره ــ اؤتوره اؤلدورنه قده‌ر اوندان ال چکمیرلر. قادین بو سؤزلری دئیرکن باشقا بیر آرواد سسی ائشیتدیک:
– چوخ دوز دئییر من ده اؤلمه‌سئیدیم دوکتورلارین الیندن جانیمی قورتارا بیلمییه‌جکدیم.
بو قادین ساغ یانیمیزداکی قونشوموز ایدی. او دا باشینا گلنلری سؤیله‌دی:
– منیم جانیمدا بیر آغیری، بیر‌سیزیلتی وار ایدی کی، الله دوشمنیمه ده گؤسترمه‌سین، نفسیمی آلا بیلمیردیم. آغری گاه چکیلیر، گاهدا گوجلنیردی. دولت خسته‌خاناسیندا بیر حکیم، یعنی پروفئسور منی معاینه ائدیردی، اما جراحیه عملیاتی آپارماق ایسته‌میردی. منی گئت ـ گله سالدی. آخیردا اورادا ایشله‌ینلردن بیری الله اوندان راضی اولسون، منی باشا سالدی کی،سیز بورایا بوش ـ بوشونا گلیب ــ گئدیرسینیز. اگر ایسته‌ییرسن کی، پروفئسور سنی یارسین، اوندا اونون اؤز شخصی خسته خاناسینا گئت. اورادا بیر معالجه اوچون ایکی یوز‌لیره آلیر. پلو وئردیک. پروفئسور منی گؤررــ گؤرمز کؤهنه خسته کیمی تانیدی و خسته‌خانادا یاتمالی اولدوغومو سؤیله‌دی. سن دئمه دولت خسته‌خاناسینا پروفئسورون شخصی معاینه اوتاغیندان کئچیلیرمیش. پروفئسور: «اون بئش گونلوک معالیجه بیر نتیجه وئرمسه، جراحییه باشلاریق.» ــ دئدی. اون بئش گون عوضینه ایکی آی یاتدیم، بیر شئی چیخمادی. بئله اولدوقدا پروفئسور منی باشقا بیر حکیمین یانینا گؤندردی. بو قایدا ایله اؤتور ها اؤتور باشلادی. حکیملرین الینده قالدیم. آخیردا بیر دوکتور منه «کارتیزون» دئییلن درمان وئردی. بو درمانی ایچنده آغری بیر بالاجا آزالیر، سونرادان داها شدتله باشلاییردی. علاج اولمادی منه، آخیردا جراحین یانینا گؤندردیلر. منی گؤندرن حکیم جراحی تعریفلمه‌یه باشلادی: «بونون اللری قیزل‌دی. دونیادا تایی یوخدور. بو ائله جراح‌دیرکی، هئچ خسته‌لییی اولمایانلاردا اونون یانینا گئدیب اؤزلرینی کسدیرمک ایسته‌ییرلر.» او زامانا قده‌ر ائوده- ائشیکده نه‌ییمیز واردی‌سا، ساتیب سویموشدوق. الیمیز ده اولوب ــ قالانی دا شخصی خسته‌خانایا وئریب، جراحیه اوتاغینا گئتدیم. عملیات زامانی ناپکوز وئریب منی یاتیرتدیلار. ائله اویاتانام کی، هله ده یاتیرام. من اؤلندن سونرا دوکتورلار باشیما توپلاشیب نه‌دن اؤلدویومو آیدینلاشدیرماغا چالیشدیلار.
من اونلارین دانیشیقلارینی ائشیدیردیم، اما اؤلو اولدوغومدان اونلار منی ائشیده بیلمیردیلر. من دوکتورلارین نه قده‌ر بیلیکلی اولدوقلارینی آنلادیم. چونکی اونلار در حال منیم اؤلمه‌ییمین سببینی تاپدیلار. اونلارین دئدیییندن باشا دوشدوم کی، بدنینه کارتیزون وورولان خسته‌نین بدنیندن همین درمانی چیخارتمادان جراحییه عملیاتی آپارماق اولمازمیش. جراحییه عملیاتدان اول منیم خستلیک تاریخچه‌سی یازیلان کاغیذیمی اوخومادیغیندان مسئله‌نی بیلمه‌میشدی.
قادین سؤزونو قورتارار- قورتارماز باشیمین اوستونده گورلتو قوپدو. اوستومده کی تورپاغی قازیردیلار. آلتیمداکی اؤلو: – بیرینی ده باستیریرلار – دئدی.
یئنی گلنین قبرینی درین قازمادیلار. یئری اوچ ـ دورد قاریش ائشدیلر اوستونه بیر ـ ایکی بئل تورپاق سپیب گئتدیلر. یئنی گلن سوموکلری چیخمیش قوجا بیر کافتار ایدی. «سکسن یئددی یاشیم وار. » – دئییردی.
قادین یئنه ویزیلدادی:
– بیر قبیره ده دؤرد آدام یئرلشرمی؟
آلتیمداکی کیشی اونا جاواب وئردی:
– دیری اولاندا یاشادیغیم ائو بو قبیردن کیچک ایدی. آما بیز یئددی آدام اورادا یاشاییردیق.
اوستومده کی دیللندی:
– دوغوم ایشلرینه نظارت قویولماسا انسانلار تؤره‌ییب دونیایا سیغمایاجاقلار ــ دئدی.
بو مسئله اطرافیندا اوزون بیر موباحیثه‌میز باشلادی.
آلتیمداکی آدام:
– دوغوم اوزه‌رینده نظارت یارادیلماسی مسئله‌سی قوجالارین دونیادا داها چوخ و راحات یاشامالاری اوچون ایره‌لی سوردوکلری بیر فیکیردیر. اونلار بو واسیطه ایله هر شئیی اؤز اللرینده ساخلاماق ایسته‌ییرلر. اوستوموزده کی سکسن یئددی یاشلی قوجا دیللندی:
– ائله دئییل!
او بیری اؤلو ده حیصرلندی:
– گلجه‌یین اومیدی قوجالاردا یوخ، یئنی نسیلده‌دیر. یئنی نسیل چوخ وگور اولمالی‌دیرکی، اونلارین ایچیندن انسانلیغیا یارارلی آداملار یئتیشسین. انسانین ان یارادیجی، ان چالیشقان ان محصولدار دؤرو ایییرمی ایله آلتمیش یاش آراسیندا‌دیز. او یاشدان سونرا انسانلار باشقالارینا یوک اولماغا باشلاییرلار. بو قوجا ایسه آلتمیش، یئتمیش، سکسن یاشینا چاتمیش کافتارلارین عؤمرونو بیر آزدا اوزادیب جاوانلارا یوک ائتمک، بیر یاندان دا دوغومون قارشیسینی آلماقلا جاونلارین سایینی آزالتماغا چالیشیز. بو، جنایت‌دیر. ایچی چوروموش قوجالار راحات یاشاسین دئیه یئنی‌لرین تؤرمه‌سینی ایسته‌میرلر. اصلینده ایسه آلتمیش یئتمیش یاشینا چاتانلاردان ال چکیب یئنی اوشاقلارین داها چوخ اولماسینا چالیشماق لازیمدیر. افسوس کی، دونیامیزدا قوجالار حاکیم اولدوغوندان او قده‌ر یاشاییرلارکی، بدنلرینده کیرج‌دن باشقا بیر شئی قالمیر. بیلیرسینیز کی، کیرج هئچ کوبره‌یه ده یارامیر. بئله گئتسه سکسن یاشلی‌لارین مئییدی هئچ کوبره‌لیکده اولمایاجاق.
بیزیم موباحیثه‌میزی یوخاریدان ائشیدیلن موسیقی سسی کسدی. شوپئنین ماتم مارشی چالینیردی. سس گئتدیجه بیزه یاخینلاشیردی. سکسن یئددی یاشلی قوجا‌دیلندی:
– ایندی کیم بیلیر دونیانین نئچه یئرینده ماتم مارشی‌نین گورولتوسو ایله شوپئنین روحو هورکودورمکده‌دیر. دونیانین هاراسیندا اولور ـ اولسون آز ـ چوخ دردی اولان بیر اؤلو اؤلن کیمی یازیق شوپئن اویناق هاوا یازمادیغینین جزاسینی چکیر.
قوجانین بو حاضیر جاواب‌لیغی خوشوما گلدی اؤلولردن بیری:
– گؤرسن اؤلن کیمدیر؟ ــ دئیه سوروشدو.
اونا هره بیر جور جاواب وئردی. بیری اؤله‌نین والی، بیری بلدییه رئیسی، بیری ده داها بؤیوک آدام اولدغونو سؤیله‌دی. ماتم مراسیمی چوخ اوزون سوردو. قونشولوغوموزداکی قبرین اوستونده اوزون ـ اوزون نیطق‌لر سؤیلندی، اؤله‌نین خدمت‌لری سادالاندی، سونرا اونو یانیمیزداکی چوخورا آتیب، اوستونو تورپاقلادیلار. تزه قونشوموزا هامیمیز «خوش گلدینیز» دئدیکدن سونرا کیملی ایله ماراقلاندیق. چوخ بؤیوک آدام اولدغونو ظن ائتدییمیز اؤلو:
– ســئکسیال مسئله‌لرله مشغول اولوردوم ــ دئدی.
سکسن یئددی یاشلی اؤلو:
– او نه دئمکدیر؟ چوخ بؤیوک وظیفه‌دیر؟ – دئیه سوروشدو.
تزه اؤلو:
– یوخ ــ دئدی ــ شخصی تشبوسدور. یعنی من محبت دلالی ایدیم، بیاز قادینلارلا آل وئر ائدیردیم.
آلتیمداکی اؤلو اونا جاواب وئردی:
– بئله بیر آدامین موسیقی ایله دفن ائدیلدییینی ایندیه کیمی نه گؤرموشدوم، نه ده ائشیتمیشدیم.
یئنی گلن قونشوموز کئفلی ـ کئفلی گوله‌رک:
– حاقلی سان ـ دئدی ـ اما بو موسیقی مندن اؤتری چالینمیردی. بو گون منیمله بیرلیکده چوخ بؤیوک آداملاردان بیری باسدیریلیردی. موسیقی اونون اوچوندو. اوچ ماشیندا چلنگ گتیرمیشدیلر. قبیرستانلیقدا دفنیمیز بیر ـ بیرینه قاریشدی. منی اونون قبرینه قویدولار. بلکده اونو منیم قبریمده باسدیردیلار. اوچ ماشین چلنگی ده منیم قبریمین اوستونه قویدولار. ائله بو یانلیشلیغا گولورم.
اوستومده کی قوجا اؤلو:
– بوردا گولملی نه وار؟
– گولملی چوخ شئی وار. اگر سهون اونون روحونو منیم عوضیمه جهنمه آتسالار، گولملی اولمازمی؟ من اونون عوضینه جنتده کئف چکه‌جم. اونو ایسه جهنمه آپاریب دئیه‌جک‌لرکی سن دونیادا آرواد دلالی اولدوغون اوچون بورا دا جزانی چکه‌جکسن.
قونشو اؤلو گولدویو یئرده قبیر تورپاغی تؤکولدو، زلزله اولورموش کیمی یئر تیتره‌دی. کیمسه قالین سسله قیشقیردی:
– ایلاهی آخیرکی حاق یئرینی تاپتد…ی!! دوز اللی سککیز ایل اول بیر دوغوم ائوینده عینی زاماندا ایکی اوشاق بیردن دونیایا گلمیشدی. بو اوشاقلاری خسته خانادا قاریشیق سالمیشدیلار. اونلاری آنالارینا آل ــ ده ییشیک وئرمیشدیلر. بو اوشاقلاردان بیری سن سن، بیری ده قبیرینده باسدیریلان او بؤیوک آدامدیر. سیز دونیایا گلندن سونرا باش وئرن یانلیشیق دوزلمه‌دی. اصلینده سن قهرمان، او ایسه آرواد دلالی اولمالی ایدی. یئرینیز ده‌ییشیک دوشدو. ایندی آلله اللی سککیز ایل داوام ائدن یانلیشلیغی بورادا دوزلدیب.
عدالتی برپا ائتدی. هئچ فیکیر ائله‌مه سنین یئرین جنت‌دیز.
سول طرفیمده کی اؤلو:
– عدالتینه قوربان اولوم ایلاهی‌نین منی اللی سککیز ایل محبت دلالی ائله‌مه‌دن بو سهوی دوزلده بیلمزدیمی؟ ــ دئدی.
آلتیمداکی اؤلو اونا جاواب وئردی:
– آللاهینا شوکور ائله کی تئز اؤلدون. اوستوموزده‌کی کافتار کیمی سکسن یئددی ایل یاشاسایدین و بو مدتده اوغراشلیق ائتسیدین آخیری نه اولاردی ؟
باخ، بورادا بئله شئیلر اولار. سئویملی ائششک آریسی! یعنی اورادا سیزین باشینیزا نلر گلیرسه، بورادا دا تکرار اولور. بورالاردا قاریشیقدیر.
گؤزلرینی کدرله اؤپوره‌م، قارداش!
کؤهنه دوستون: اؤلموش ائششک
