یازار: عزیزنسین
چئویرن: اسماعیل شیخلی
کؤچورن: علی آغ‌گونئیلی
سئویملی ائششک آریسی!
بوندان اولکی مکتوبلاریمدا یازدیغـیم کیمی اؤلموشدوم، آمما اؤلمه‌ییمی هئچ جور رسمیلشدیره بیلمیردیم. یـئر اوزونده «رسمی» یاشاماقدا، «رسمی» اؤلمک‌ده چتیندیر.
خسته‌خانانـین زیرزمیسینده منیم کیمی بیر نئچه اؤلو واردی. ساغ طرفیمده گنج بیر کیشی، سول طرفیمده یاشلـی بیر قادین اوزانمیشدی. گنج‌دن: – سیز نه‌دن اؤلوبسونوز؟ ـ دئـیه سوروشدوم.
– اؤزومو اؤلدورموشم. – دئدی.
– نئجه‌دیر اؤزونو اؤلدورمک آساندیرمی؟
– اوه… اؤزونو اؤلدورمک، انتحار ائـتمک، قدیمدن دبده‌دیر. ایندی انتحار ائـتمک، یاشاماقدان دا چتیندیر. من اولجه اؤزومو دنیزه آتـیب اؤلدورمه‌یی قرارا آلمیشدیم. قوجا استانبولون آنا دولو ساحیلینی رومئلی ساحیلینی باشدان-باشا دولاشدیم، ساحیلده اؤزومو دنیزه آتماق اوچون بیر پارچادا اولسا بوش یـئر تاپا بیلمه‌دیم. استانبولون بوتون دنیز ساحیلینی زنگین‌لر اشغال ائله‌ییبلر. هر یـئرده یایلاقلار، وییلالار کوشکولر قایـیقخانالار، چیمرلیک‌لر دوزه‌لدیبلر. فیکیرلشدیم کی بلکه بونلارین بیری اجازه وئرر کی، اونون ساحه‌سیندن اؤزومو دنیزه آتام «انسانلـیق نامینه بورادان اؤزومو دنیزه آتماغا مساعیده ائدرسینیزمی؟» – دئـیه سوروشدوم. «سن دلی می اولموسان؟ بو گؤز‌ه للییه تاماشا ائله . هئچ انساندا بو گؤز‌للیکدن ال چکرمی؟ اؤزونو اؤلدورر می؟» – دئـیه جاواب وئردیلر. خلاصه آرادیم آختاردیم، آمما دنیز ساحیلینده اؤزومو آتماق اوچون بیر پارچا بوش یـئر تاپا بیلمه‌دیم.
– چیمرلی‌یه گـئده‌یدین.
– آخـیردا ائله ائله‌دیم. آمما چیمرلیک‌ده دنیز تاپماق ممکن دئـییل. «الویدا ائـی گؤزل دونـیا!» دئـییب اؤزومو دنیزه آتدیم. گؤردوم کی قارنـیمین آلتـیندا بیر شئـی ترپندی و «آمان!!» – دئـیه قـیشقـیردیم. گؤزومو آچـیب گؤردوم کی سو جمدکله دولودور. اینسانلار پیچقـیل بالـیق کیمی سورو ایله دولوشوبلار سویا هئچ ترپنمه‌یه یـئر یوخدور. اؤزونو سویا آتاندا یا بیرینین بئلینه یا قارنـینـین اوستونه دوشه‌جکسن. ایندی بیلدین‌می چیمرلیک وار، آمما دنیزده بوش یـئر یوخدور.
– قایـیغا مینئیدینیز.
– ائله بیلیرسن مینمه‌دیم؟ قایـیقلارین ایچینده ده ترپنمک اولمور. آغزیناجان آداملا دولو اولور. اؤزونو دنیزه آتماق اوچون گرک قایـیغـین بورنونا گـئده‌سن. کـئچه بیلسن ایگیدسن. اگر بیر تهر گـئچمیش اولسان دا اؤزونو آتا بیلمزسن. چونکی ال-قول ترپتمک ممکن دئـییل. ایشدیر، شاید اؤزونو آتماغا امکان تاپساندا خئـیری یوخدور. یا الین یا دا آیاغـین بیرینه ایلیشه‌جک. بونداندا یاخا قورتارا بیلسن فرقی یوخدور، سنی دنیزدن چـیخارداجاقلار. سؤزون قـیساسی دنیزده انتحار ائـتمه‌یه امکان یوخدور.
– بس نه ائله‌دینیز؟
– گازلا انتحار ائـتمک قرارینا گلدیم. بوتون دوستلارا، تانـیش- بیلیش‌لره مکتوب یازدیم کی «بیزیم فوتبال تیمیمیز جامی الدن وئردیکدن سونرا دونـیادا یاشاماق منه حارام اولدو. سون اویوندادا اودوزدولار. بونا دؤزه بیلمه‌دیییمدن اؤزومو اؤلدورمه‌یه قرار آلدیم. انشاللاه یاخـینلاردا گؤروشه‌ریک.» مکتوبلاری یوللادیم. گازین آغزینـی آچدیم. یـئره اوزاندیم. یاریم ساعاتا قده‌ر کـئچدی. اؤزومو یاخشی حیس ائـتمه‌یه باشلادیم، گؤردوم کی خوشحال‌لانـیرام، نئشه‌له‌نیرم، سئوینیرم. بو نه‌دیر؟ یوخسا انسان اؤلنده بئله گومراه‌لاشیب سئوینیر، اگر بیلسه‌یدیم کی اؤلمک بو قده‌ر لذت‌لی ایمیش هئچ اذیت چکیب یاشایاردیم می؟ بئله فیکیرلشیردیم کی، قاپی دؤیولدو دوشوندوم کی، یقین «اینکیر- مینکیر» ملک‌لری دیر گلیبلر «قاپیمی آچـیم‌می، آچمایـیم‌می» – دئـیه تردود ائـتدیم. اؤلموش اولدوغومدان من قاپینـی آچا بیلمزدیم. اونلار دا ملک اولدوقلاریندان قاپی- باجا بیلمز، ائله لاپ دیواری یاریب ایچری کـئچه بیلردیلر. ائله‌ده اولدو. قاپینـی زورلا آچـیب گیردیلر ایچری. بیرده گؤردوم منیم مکتوب گؤندردیییم آداملارین هامیسی ایچری دولوشدو.
– دئمک منیم آیریلـیغـیما دؤزمه‌دینیز، سیزده اؤزونوزو اؤلدودونوز و منیم یانـیما گلدینیز. باخ دوستلوق بونا دئـیه‌رم.
– سن دلی می اولوبسان؟
– نئجه؟ اؤلونون ده دلی‌سی اولور؟
– نه اؤلو سن دیپ دیری سن.
– یوخ قارداشلار، من اؤلموشم، اؤزوده اؤلمه‌ییمدن چوخ راضیـیام.
– اؤزونو نه ایله اؤلدوردون؟
– گازلا – دئـیر- دئمز قهقهه‌یه باشلادیلار.
– آی بالام گاز وار کی، انتحار ائده‌سن؟ او بورودان گاز یوخ ائله-بئله عادیجه هاوا گلیر، هم ده تر-تمیز هاوا. پولو اولمایان خسته‌لر هاوالـی یـئرلره گـئده بیلمه‌دیکلریندن ایندی بورونلارینـی گاز بورولارینـا توتوب تمیز هاوا اودورلار. ایندی استانبولدا هاوا قالمایـیب ماشاللاه سنین رنگینده دوزه‌لیب چون کی زهرلی قاز عوضینه تمیز هاوا اودوبسان.
– دئمک بئله؛ من ده دئـییرم گؤره‌سن گاز اوددوقجا نییه احوالـیم یاخشیلاشیر، گومراه‌لاشیرام. اؤزومو اؤلموش حساب ائدیردیم….
من اونا قولاق آسدیقدان سونرا دئدیم:
– یوخو درمانلاری آلـیب ایچه‌یدینیز.
– آلدیم- دئدی.
– سیز قزئـت زاد اوخومورسونوز؟ قزئـت‌لرده هر گون یوخو حب‌لری اؤزونو اؤلدورن قـیزلاردان یازیرلار. سونرادا قئـید ائدیرلر کی، اونلاری اؤلومدن قورتاریبلار، یالاندیر اونلاری خیلاص ائدن زاد یوخدور؛ ایندی کی، یوخو حب‌لرینی اؤزوموزونکولر دوزه‌لدیرلر اونون بیرینی آتاندا بیر هفته یوخون قاچـیر. باخ تزه حب‌لر بئله حب‌لردی.
– خاریجی حب آلایدینـیز.
– هاردان آلـیم، تاپیلـیر کی؟ خاریجدن هئچ نه آلمیرلار. ایندی اؤز درمانلاریمیزی یـئییریک. نه باشینی آغریدیم زهر ایچمه‌یی قرارا آلدیم. هر گون ان تاثیرلی زهر ایچدیم. آمما گوندن-گونه یاخشیلاشدیم. اینانـیلاسی دئـییل، من زهر ایچه-ایچه پهلوانا دؤندوم، الیمه کـئچن شئـیی قوپاریب قـیرماغا باشلادیم، آخـیردا بیر حکیمه گـئدیب، هر شئـیی اولدوغو کیمی اونا دانـیشدیم. او منی دینله‌ییب:
– چوخ طبیعی‌دیر – دئدی. سیز استانبوللو دئـییل‌سینیز می؟
– بلی استانبوللویام.
– سیزه زهر دوشور. اگر سیز زهرسیز تمیز هاوالـی بیر یـئره گـئـتسه‌نیز، در حال بوغولارسینـیز. ایستانبول کوچه‌لرینده ایی وئرن زیبیل‌لره، توزلو دومانلـی هاوایا آلـیشیب‌سینـیز تکجه «دیمانـین» زهرلی سویو کیفایـت ائدر قارداشیم! اوردان قالخان زهرلی هاوانـی اودان آدامدا نه کیشی‌لیک قالار، نه ده آروادلـیق. سن استانبوللو اولدوغون اوچون بدنین زهره اؤیره‌شیب. اؤلمک اوچون زهر ایچیرسن، آنجاق ماشااللاه گوندن-گونه گومراه‌لاشیرسان.
– بیر ایپ آلـیب اؤزونو آسایدین- دئدیم.
– ائله بیلیرسن، سن دئـین کیمی ائله‌مه‌دیم؟ گـئدیب بیر یاخشی ایپ آلدیم. اؤزومو تاواندان آسار-آسماز ایپ قـیریلدی. ایپلرده چوروکدور قارداش.
– دامارلارینی اؤلگوج‌له کسه‌یدین.
– سولطان عزیز ده ائله ائله‌ییب، آمما سولطان عزیز گلسین ایندیکی اؤلگوج‌لرله دامارینـی کسسین گؤروم نئجه کسیر. عزیزیم ایندیکی اؤلگوج‌لر آدامین ساققالـینـی کسمیر، دامار کسرمی؟ هامیسی تنیکه‌دی.
– هوندور بیر یـئردن اؤزونو آتسایدین نئجه اولاردی؟
– اونودا ائله‌دیم. بیر نئچه اوجا بینانـین اوستونه چـیخدیم؛ ایندی استانبولدا تورپاغـی ساتـین آلماق دا وار بیلمیرسن؟ من اوست قاتا چـیخانا قده‌ر بیرده گؤردوم تورپاغـی ساتـین آلـیب آلت قاتـی اوچوردورلار.
– ائله‌سه قارداش دیء گؤروم اؤزونو نئجه اؤلدوردون؟
– هه… قولاق آس باشا سالـیم. ایندی انتحارین یـئگانه بیر یولو وار. قوهوم اقرباندا بیر قـیز وارسا اونو اره وئرمه‌یه چالـیش. ایندی کی کوره‌کنلر اگر صبیرلی‌دیلرسه ائوله‌نندن سونرا، اگر صبیرسیزدیرلر ائولنمه‌دن اول، قـیزین بوتون قوهوم-اقرباسینـی ووروب اؤلدورورلر. پیس نیـت‌له یوخ، محبت‌لری‌نین چوخلوغوندان بئله ائله‌ییرلر یاخشی‌لـیغـین عوضینی وئرمک اوچون بیزیمده اوزاق قوهوم‌لاردان بیرینین قیزی واردیر؛ بیر دلی قانلـی اوغلان قـیزلا ائولنمک ایسته‌دی قـیزین عاییله‌سی بوتون قوهوم اقرباسی:
– امان الله ایندی بیز نه ائدک؟ – دئـیه تلاشا دوشدولر.
– قـیزی وئرک جانـیمیز قورتارسین – دئدیلر.
من اونلارا:
– بو کوره‌کندیر، قـیز وئرسه‌نیزده وئرمه‌سه‌نیزدن هامیمیزی قـیراجاق! – دئدیم.
– ایسته‌دیییندن می؟
– جانـیم ایسته‌دی، ایسته‌مه‌دی نه فرقی وار. بونا کوره‌کن دئـیرلر. ایسته‌یین ده بیزی اؤلدوره‌جک ایسته‌مه‌یین ده. قـیزی وئرمه‌سه‌نیز «نییه وئرمه‌دینیز؟» – دئـییب اؤلدوره‌جک وئرسه‌نیز «وئردینیز باشیمی بلایا سالدینـیز» – دئـییب اؤلدوره‌جک. آروادی ساخلایا بیلمه‌دیمی اؤلدوره‌جک، پولو اولوب کیشی‌لییی اولمایاندا دا اؤلدوره‌جک، بیلدینیزمی کوره‌کن دیر، بو هامیمیزی قـیراجاق!
– قـیزی وئردیلر، کوره‌کن آروادینـی آپاردی، بوتون قوهوملارا باش چکدی.
– باخ سنین دئدییین کیمی اولمادی گول کیمی دولانـیرلار. بیر- بیر قوهوملارا باش چکیرلر.
– او قوهوملاری اؤلدورمک اوچون سئچیر اونا گؤره باش چکیر. اؤزونوز بیر آزدان گؤره‌جکسینیز.
دئدیییم کیمی ده اولدو. کوره‌کن هامیمیزی اؤلدوردو، اونون دا جانـی قورتاردی بیزیمده.
– نییه اؤلدوردو؟
بللی دئـییل. « بیر دفعه پیچاغـی الیمه آلدیم سونراسینـی بیلمیرم» – دئـییر. آمما تقصیر قـیزدا ایدی، من اونا تاپشیرمیشدیم کی: «آماندیر قـیزیم اونون الینه پیچاق وئرمه!» کوره‌کن‌لرین الینه پیچاق کـئچدیمی قورتاردی نه ائـتدیک‌لرینی بیلمیرلر. بیزیم سفئه قـیز یـئمک زامانـی: «سئوگیلیم، بو چؤره‌یی کسرسن می؟» دئـییب کوره‌کن پیچاغـی الینه آلان کیمی گؤزو قـیزیب سونرا نه ائله‌دییینی یادینا سالا بیلمیر. بئله‌لیک‌له من او دونـیادان بورایا گلدیم.
سئویملی قارداشیم ائششک آریسی!
گله‌جک مکتوبلاریمدا او بیری‌لرینین نئجه اؤلدوک‌لرینی یازاجاغام. مکتوبومو بورادا قورتاریر و گؤزلریندن اؤپورم.
اؤلموش ائششک
*: بو حئکایه بوندان اؤنجه آذری فصلنامه‌سینین ۱۲نجی نومره‌سینده یاییلیبدیر
