چئویرن: بهروز صدیق
ترجمه: بهروز صدیق
بهروز صدیق

behrooz
ناظیم حکمت ؛ قارداشلیق شاعیری
بهروز صدیقی

دونیا شؤهرتلی بؤیوک تورک شاعیری “ناظیم حکمت” حاقیندا یئترینجه یازیلمیش و اینانیریق دونیا دوردوقجا یئنه ده یازیلاجاقدیر. چونکی زامان اؤتدوکجه ناظیم داهادا درک اولوناسی اولاجاقدیر. ناظیم ۱۹۰۲ ده گلمیش و ۱۹۶۳ ده گئتمیش‌دیر. گلیب و داها گئتمه‌میش دئسک لاپ دوغرو اولاردی: نییه کی دونیامیزی بزه‌ین ناغیل یاراشیقلی اینسانلار گئتمه بیلمیرلر . ناظیم ده ائله‌لریندن دیر. اونونچون اؤلوم تاریخی گولونج بیر سؤزلوک دور آرتیق.

ساده‌جه اولاراق اینسانلارین بیر اورمان کبمی قارداشجاسینا یاشاماغینا حسرتلی قالاراق اوره‌یینی ماسکووا قیریستانلیغیندا تورپاقدا گؤیرمه‌یه قویموشلار و آیریلیق یوواسی نیسگیل سیمبولو اولان او دیدرگین اوره‌ک ایندی دونیامیز اوچون  خوللو بوداقلی یاشیل بیر آغاج ساییلیر. ناظیمین شعرلرینده حیاتین بوتون چالارلاری استئتیک بیر قووه و گوجه ییه‌لندییندن اونودولماز و یاددا قالان‌دیر. ناظیم سئوکی، باریش، دوستلوق و ان اؤنملیسی قارداشلیق شاعیری‌دیر. دونیاداسا ان بؤیوک آزادلیق روح و وجدان آزادلیغی‌دیر. ناظیمه ایسه بو وجدان راحاتلیغی اینسانلاری باریشا و دوستلوغا چاغیریشیندان ایره‌لی گلیر:

                              دون

                                   من

                                       شه‌هرین مئیدانینا گئدیب

                                            اونلار ایچین

                                        قارداشلاریمیزی اؤلدورمیه‌لیم

                                                                         اؤلمییه‌لیم

                                                                                     دئدیم.

بو اینسانی چاغیریشدان سونرا ” اللرینی باشی‌نین آلتینا قویور، دنیزی دویور  و اویور. ناظیم ظولمون، قارانلیغین و اینسانین اینسانا قارشی قوللوغو اؤنونده قان چاناغی‌دبر.

یوخ ائدین اینسانین اینسانا قوللوغونو

بو دعوت بیزیم.

شاعیر گونشه آخین وار دئیه بو یولدا اؤلنلری گونشده گومولنلر حئساب ائدیر و آزادلیغی الده ائتمک اوچون او قده‌ر تله‌سیرکی: ” واختیمیز یوخ اونلارین ماتمینی توتماغا ” سویله¬ییر:

نردووانلاریمیزین چنگلینی اولدوزلارا آساراق

اؤلولریمیزین باشلارینا باساراق

یوکسه‌لیریک

گونشه دوغرو.

اؤلن‌لر

دویوشه‌رک اؤلدولر

گونشه گومولدولر ……..

       اینانیر کی گونشی ضبط ائده‌جکلر. گونشین ضبطی یاخین و ائله بو اینامین  مقدس بیله‌رک اؤز عصیانینا حاق قازاندیریر :

                                       من شرقدن گلیرم

                                           شرقین عصیانینی

                                       هایقیراراقدان گلیرم

                                          شرقلی‌یم

                                     عصیاندا حاقلییام

        ناظیمین شعرینده ایکی قوه همیشه اوز – اوزه دیر: قارانلیق و ایشیق. قورشون اریتمه‌یه قوشون چاغیریر و آیدینلیغی ایشیقلیغی منیمسه‌مه یولونو تکجه منیم ، سنین و بیزیم یانماغیمیزدا گورور:

من  یانماسام

                                      سن یانماسان

                                      بیز یانماساق

                                      نئجه چیخار

                                        قارانلیقلار

                                           آیدبنلیغا……

        اور‌ه‌کلرین قولاقلاری ساغیر (کار) دئیه باغیریر و بو باغیرتی حریت آداخلی اوره‌ییمیزده  قانلی بیر بایراق کیمی چارپیر:

                                               چار….پا….جاق.

قان قادانی – قارانلیغی سئونلر اوچون اوزونو توتوب و اونلارا افندی آدیلا مراجعتینده بولوتلارین آدام اؤلدورمه‌مه‌سینی ایسته‌ییر. اونلارین یادینا بیر آنادان اولدوقلارینی، بیر زامان اوشاق اولوب و اوچورتمالاری آغاجدان کئچمه‌لرینی گلین‌لرین آینادا ساچلارینی داراییب بیرینی آرادیقلارینی یادلارینا سالیر:

                    گلین‌لر آینادا ساچینی دارار

               آینانین ایچینده بیرینی آرار

                        البت بویله سیزی ده آرادیلار

      گلین لره قیمایین افندی‌لر

                    بولوتلار آدام اؤلدورمه‌سین

      بو نوستالژیک حیسین بو قدر گوجلو تصویر اولونماسی  یالنیز و یالنیز شاعیرین حددن آرتیق اینسان سئورلیینی بیللندیرمیش اولور.

 “دونیانی جوجوقلارا وئره‌ییم بیر گونلوک‌ده اولسا اؤیرنسین دونیا آرخاداشلیغی “دئین شاعیرین بو فیکیر و ایدیاسینی بولاقلار صافلیغینا بنزتمک اولار. نییه کی تکی سئوگی، دوستلوق، محبت و قارداشلیق‌لا اینسانلار یاشام آدلی بؤیوک نعمته ییه‌لنه‌جک‌لر و بونو ایسه آغاج لاردان و اورمانلاردان اؤیرنمه‌لییک:

                            یاشاماق بیر آغاج کیمی تک و حر

                             و بیر اورمان کیمی قارداشجاسینا

                                                             بو حسرت بیزیم…

چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ناظیم حکمت ؛ قارداشلیق شاعیری/ بهروز صدیقی

بهروز صدیق
www.ishiq.net

آذربایجان ادبیات و اینجه‌صنعت سایتی

ناظیم حکمت ؛ قارداشلیق شاعیری/ بهروز صدیقی

بهروز صدیق
www.ishiq.net

آذربایجان ادبیات و اینجه‌صنعت سایتی

ناظیم حکمت ؛ قارداشلیق شاعیری/ بهروز صدیقی

بهروز صدیق
www.ishiq.net

آذربایجان ادبیات و اینجه‌صنعت سایتی