پاییزدیر، سازاق وار، یارپاقلار اسیر،
بوردا بیر قادین وار یازا تلَسیر،
سون‌باهار قادینی… پاییز قادینی،
گوندوز فیلوسوفو، گئجه شاعیری.
ییغیبدیر گئجه‌نی سورمه‌دانینا،
دوداقلار بویاسی، نار چیچه‌یی‌دیر.
یازیر-یارادیرسا، سئویر، سئویلیر،
شعرله یاشاییر، اؤلور، دیریلیر.
شاق‌ها‌شاق گوله‌ین، تئز-تئز کؤورَلن،
دؤشونده اویانان مینلر تومورجوق.
پاییز-پاییز سولوب یاز-یاز گؤیرَن،
ائله او سون‌باهار قادینی منم.
ساچلاریم دیدرگین،
هؤره‌لیم گرک.
قوروم ساعاتیمی گؤروش چاغینا.
دیک‌دابان باشماقلا، شوشه اورکلی،
لزگی رقص ائده‌جم بوز قفسینده.
اسیرسم‌سه زاغ-زاغ، دلی قانلی‌یام،
بیر آزجا عاشیقم، هم غورورلویام.
«آفرودیت» هاوالی جوشورام قات-قات،
سئوگیمی ساچیرام، آلسین کائینات!
ساحیله گؤز تیکیر بیر آدا منده،
اؤزلم دنیزینده دردی دریندیر.
منده بیر شهرجیک «آمازون» قیزی،
گئرچک «اوتوپیا» آختاریر ایندی.
سازاقلی پاییزدیر،
یارپاقلار اسیر.
بوردا بیر قادین وار،
یازا تلَسیر…
تلگرامدا ادبی سانال‌لاردا گزیشیب اوخوردوم بیردن سایین دوکتور فریبا ابراهیمی‌نین بو شعیری‌ایله راستلاشدیم. چوخدان‌ایدی بو یاخشی شاعیرین بیر شعرینی‌ده اوخومامیشدم. شعیری اوخویاندا اؤزومه سؤز وئردیم قیسادا اولسا بیر اوخونوش یازیم بو شعیر ایچین. اوول دیرناق آراسیندا شعیرین آدی حاقیندا آرتیق ایضاح لازیمدیر دئییم،
«آفرودیتا» اسکی یونان تانریچالاریندان حسابا گلیر. هابئله بو ایلاهه، چوخلو اینسانلار آراسیندا مشهور بیر آرخئتیپدیر«کهن الگو». بونا گؤره قادینلارین چوخلاری آفرودیتا اولماسینی داها سئویب و ایسته‌ییرلر .
یونان میفولوژییاسیندا ایکی آفرودیتادان سؤز آچیلیر، بیرینجیسی آفرودیتا اورانییا و ایکینجیسی‌ایسه، آفرودیتا پاندئموس آدلانیر.
آفرودیتا اورانییا، ایلاهی و موقدس و تانریلار آراسیندا بیر سئوگی نمونه‌سیدیر. آمما بوردا بو شعیرین آدینا گؤره دئمه‌لییم سایین آفاق ابراهیمی بو شعیرده آفرودیتا ایلاهه‌سینین بویلاری و خصوصییاتلاریندا اؤزونو گؤسترمک مقامینی داشییر بونا راغمن‌ده شعیرین آدینی «آفرودیت هاوالی» قئید ائتمیشدیر. و آمما…
فریبا ایبراهیمی«آفاق» اوزون ایللر شعر یازان بیر شاعیردیر و بلکه ۲۰ ایل بیراز اویان، بویان «صاباحا یول» آدلی شعیر توپلوسونو نشر ائتدیرمیشدیر. من بونون سوسیال مسئولییتلریندن کئچیرم و بونونلادا هئچ بیر علاقه‌‌م یوخدور.
و آمما… من اوزون ایللردیر بو شاعیری اوخویورام و بو شاعیرین اؤز نؤوبه‌سینده، سانباللی و مقبول اثرلری وارایدی. آمما بیلمیرم، بؤیوک اوستاد محمّد حسین شهریارین خیدمتینی درک ائدن و اوندان شعیر اوسلوبلارینی اؤیره‌نن بیر شاعیر، اوزون ایللر شعیردن و ادبییاتدان نییه و هانسی سببلره گوره اوزاق قالمیشدیرررررر.
منجه؛ ادبییاتدان اوزاق قالماق بیر حرفه‌ای شاعیرین پسیخیکاسینا«روحونا» اؤلومجول ضربه‌لر وورور. و بونون یئرینی دولدورماق چوخ چتین بیر ایش‌دیرررر.
بورادان آفاق افندینی موعاصیر آزربایجان تورک ادبییاتینا چاغیریب، دعوت ائدیرم. و …
آمما بو سئویملی شاعیرین شعیرلرینه گؤره: بو شعیره اگر پوئتیک فورمات باخیمیندان نظر سالساق، همن آذربایجان تورک ادبییاتی «قوشما» اوسلوبوندا (۶+۵ هیجالی) یازیلمیشدیر. آمما شعیرینه بیر نؤوع سربست حال، هاواسی وئرمیش و بعضنده ردیف و قافیه‌لردن‌ده استفاده اتئمیشدیر. آنجاق بورادا دئمک ایسته‌ییرم کی، شاعیر فورما و دیگر ادبی تئخنیکا باخیمیندان یئنی و تأثیرلی بیر ایش گؤرمه‌ییبدیر. طبیعی‌کی، بیز باشقا شاعیرلرده‌ده مختلیف نؤوعلاردا بئله شعیر کومپوزیسیالارینی دفه‌لرله گؤرموشوک. و کاش، عزیز شاعیر آز، آجیقدا اولسا پوئتیک قورولوشدا فرقیلی بیر حرکت یاراتسادا، فورمادادا دیقته لاییق بیر یارادیجیلیق گؤستره بیل‌ایدی. آمما باشقا گؤزللیکلر باخیمیندان بو بؤیوک شاعیر شعیرین داخیلی موسیقی‌سینی، یام، یاشیل اوبرازلارلا بیرلیکده همآهنگ حرکته سالیر. بو جیسارتده شعیری گونوموزون ان اوغورلو شعیرلریندن بیرینه چئویریر:
«آفرودیت» هاوالی جوشورام قات-قات،
سئوگیمی ساچیرام، آلسین کائینات!
ساحیله گؤز تیکیر بیر آدا منده،
اؤزلم دنیزینده دردی دریندیر.
منده بیر شهرجیک «آمازون» قیزی،
گئرچک «اوتوپیا» آختاریر ایندی. »
دوکتور ابراهیمی پوئتیک اوبرازلاری حقیقتن تانییان بیر شاعیردیر و بیر چوخ شعیرلرینده اوغور قازانمیشدیر. لاکین تصویرین بو جور تانینماسی اونون باشقا منصوبییه‌تیندن طبیعته و حیات دویغولارینا باغلی اولماغینی آرتیق یئتریب، چاتدیریررررر . دوکتور ابراهیمی شعیرینین باشقا بیر خصوصییاتی و باجاریغی اوزاق گؤرونتولری ایضاح ائدیب، آچیقلاماق و اونلاری سؤز و موسیقی‌ایله رنگلندیرمه‌یه یاخینلاشدیرماقیدیر.
بلی بو سایین شاعیر، شعیرین آهنگینی و داخیلی ضیدییتلرینی یاراتماقدا جسارتله چالیشدیغینی گؤستریر. بعضن گؤز قاپاغینی توز، تورپاغا آچیب، و بعضنده سوروشکن بوشلوغا آددیملار آتمیش و حدودسوز نوستالژیدن داها آیدین و آچیق دونیایا آتیلیر.
خانیم فریبا ابراهیمی؛ باهارا حسرت قالمیش، بوتون فصیللری پاییز سانان، قوربتده ساچلارینی هؤره‌ن، ساعتینی رومانتیک گؤروشلره و بعضن اعتراضلارا اویغونلاشدیران بیر شاعیردیر .و..
سئوگیلی آفاق خانیم موختلیف ادبی کومپوزیسییالارلا تجهیز اولونموش باخیشلاری‌ایله سؤز ساحه‌‌سینده یئنی فورمالار تقدیم ائتمک ایسته‌ییر:
«ساچلاریم دیدرگین،
هؤره‌لیم گرک.
قوروم ساعاتیمی گؤروش چاغینا
دیک‌دابان باشماقلا، شوشه اورکلی،
لزگی رقص ائده‌جم بوز قفسینده
اسیرسم‌سه زاغ،زاغ، دلی قانلی‌یام،
بیر آزجا عاشیقم، هم غورورلویام…»
آفاق خانیم بو شعیرینده تکرار سؤزلردن قاچماق ایسته‌ییر، و روحونون و شعورونون دیَیشمه‌سینه سبب اولور. چونکو دیل اویونلاری مختلیف بیرلشمه‌لر یاراتماق اوچون، شاعیری ساختا یارادیجیلیقدان یان سالیر، و اوزاقلاشدیریر.
صاباحا یول شعیرلر توپلوسونون شاعیری سایین فریبا خانیم ابراهیمی‌نین اگر بو شعیری و دیگر شعیرلری حاقیندا عمومی فیکیر بیلدیرسه‌ک، گؤرریک بو شاعیرین شعیرلری نئوکلاسیزم جریانیندان قایناقلانیر و بو حرکت و جریانین ترکیب حیصصه‌‌لرینه بونون اثرلرینده راحتلیقلا راست گلمک اولار. هابئله شاعیرین هم عنعنه‌وی، همده معاصیر خصوصییاتلارا مئیلی، و آرتیق چاغداش ادبییاتا دقته چاتدیرمیشدیر.
شاعیر اوبرازلار یارادارکن اطراف عالمه داها گئنیش باخیشا مالیک اولمالیدیر. و اونلارین ویزوال و یا عقلی اولماسینی، قفیل بیر حرکتله شعیر اوخوجوسونون ذهنینی مشغول ائدن و اؤزونه ساری چکن، باجاریقدان آسیلیدیر. یعنی دئدیییمه گؤره، عزیز شاعیر چوخ اعلا باخیمدا اطراف عالمه دریندن دیققت یئتیرمیش و شعیره عینی پنجره‌دن باخمامیشدیر.
نمونه ایچین:
«سون‌باهار قادینی… پاییز قادینی،
گوندوز فیلوسوفو، گئجه شاعیری.
ییغیبدیر گئجه‌نی سورمه‌دانینا،
دوداقلار بویاسی، نار چیچه‌یی‌دیر.
یازیر-یارادیرسا، سئویر، سئویلیر،
شعرله یاشاییر، اؤلور، دیریلیر.
شاق‌ها‌شاق گوله‌ین، تئز-تئز کؤورَلن،
دؤشونده اویانان مینلر تومورجوق.
پاییز-پاییز سولوب یاز-یاز گؤیرَن،
ائله او سون‌باهار قادینی منم…»
… سوندا بیر ادبییات دوستو کیمی سایین شاعیر خانیم دوکتور آفاق ابراهیمی ایچین، اورکدن دئمک ایستیرم:
ای قاداسی، سیز شاعیر اولاندا، شعیرلر توپلوسونو یازیب منتشر ائتدیرنده آزربایجان ادبییاتیندا دئمک اولارکی قادین شاعیرلری چوخ آز‌ایدی. نئچه ایلدیرکی شعیردن و ادبییاتدان، داها اوزاقداسینیز، اونا گؤره‌ده بو قیسا شعیر اوخونوشونو بهانه ائده‌رک سیزی آزربایجانین چاغداش تورک ادبییاتینا دعوت ائدیب و پئشه‌کارجاسینا اوخویوب، گؤزل اثرلر یاراتماغینیزی خواهیش ائدیرم. بو اومید و آرزویلا…
1401/۸/۸
