“باهار”
باشیم اوسته گونشین
ساچاق – ساچاق تئل‌لری،
نفسیمدن گئده جک
قارین، بوزون اثری.
آیاغیم آلتدا چیمن
اَتگیمده گول – چیچک،
قارانقوشلار قاییدیر
ائل‌لر اولور سئوینجک.
یاغیش یاغیر، گون چیخیر
تاغ قورور گؤی قورشاغی،
سئل‌لر، سولار شاریلدیر
دره‌لردن آشاغی.
کاروان – کاروان آغ بولوت
ماوی گؤیده دوزولور،
دیمدیگیندن قوشلارین
بال نغمه‌لر سوزولور.
چیچکلرین عطریندن
فرحله نیب بیر آندا،
تازا پالتار گئییرلر
طبیعت ده، انسان دا.
فروردین، اردیبهشت،
خرداد منیم اوچ آییم.
باهارام من، باهارام،
گوزه‌ل لیکده یوخ تاییم.
“یای””
نه بولود وار، نه دومان،
ماوی گؤیده گون شاخیر؛
هاوانین ایستی سیندن،
اوز – گؤزومدن تَر آخیر.
دَنه دولوب سارالدی،
دالغالاندی سونبول‌لر،
آرمود، اَریک یئتیشدی،
مئیوه اولدو آغ گول‌لر.
یاماجلاری چیمن‌دن
یاشیل‌لاشدی داغلارین،
آغاجلاری مئیوه دن
اَلوان‌لاشدی باغلارین.
باش اَگدیلر بوداقلار
قودرتینه توپراغین.
ییغیلدیلار سئرچه‌لر
کؤلگه‌سینه یاپراغین،
کؤچوب گلدی ائلاتلار
قیشلاقلاردان یایلاغا،
باشلادیلار اوشاقلار
چایدا، گؤلده اوزماغا.
تیر، مرداد، شهریورم،
باهار تک اوچ آیام من.
ایلین لاپ ایستی فصلی،
محصول فصلی یایام من.
“پاییز”
بوز افوقدن بویلانیر
سولغون گونش ساپ ساری؛
غملی – غملی کؤچورلر
دورنالارین قاتاری.
باشا چاتدی یای فصلی
یئنه آچدی مدرسه،
کلاسلاردا اوشاقلار
یئنه وئردی سَس سَسه.
کولک اَسدی قوپاردی
یاپراقلاری بوداقدان،
بیر پارچاسی نارینجی
بیر پارچاسی آل – اَلوان.
نَفَسیندن آغ یئلین
سولدو چیمن، سولدو گول،
هیجرانیندان بولبولون
یاپراقلارین یولدو گول.
شئه چؤکوبدور چیمنه،
دومان بورویوب داغی،
توسدوله‌ییر چوبانین
یاش تیکانلی اوجاغی.
کاروان – کاروان قاپ- قارا
گؤیده بولودلارا باخ!
بوداقلاردان سال‌لانان
قیپ – قیرمیزی نارا باخ!
مهر، آبان، آذرم
چن – دومان نَفَسلی‌یم؛
من پاییزام رنگلرین
مئیوه‌لرین فصلی‌یم.
“قیش”
گیزله‌دیبدیر گونشی
قارا بولوت لای با لای،
شاختاسیندان هاوانین
دوندو بولاق، دوندو چای.
گؤیدن یاغان پامبیقلار
آغاردیبدیر باشیمی،
قارلی ساچیم، ساققالیم
چوخ گؤسته‌ریر یاشیمی.
آغ پالتاریم گؤرنده
هامی دئییر – قیش – منه،
اوشوینده اَل‌لری
ائدیرلر قارقیش منه.
یون پالتارلار گئییرلر
ائولرده‌ده پینج یانیر،
آنجاق لوت‌دور آغاجلار
قار یاغدیقجا ایسلانیر.
قاردا دوندو شاختادان
یئنه‌ده یاغ تزه قار!
مئشه‌لری، داغلاری
آغ اؤرتوکله بزه قار!
قوی اوشاقلار سئوینجک
قار آدامی دوزلتسین،
قار گولله‌سی اویناسین
زوی گئدیب شادلیق ائتسین.
دی، بهمن، اسفند منم
قارلی قیشام، قارلی قیش،
ایلین قوجا فصلی‌یم
ساچ ساققالیم آغارمیش.
یک پاسخ
سلام. چوخ گوزل شعردیر.
بیر سوز آرتیرمالیام کی بیزیم ائلیمیزین آیلارینین گوزل گوزل معنالی آدی وار. آغلارگولر، گولن، قیزاران، قوراپیشیرن، قویوروق دوغان،زومار، خزل، قیرو،آذر، چیلله، دوندوران و بایرام آی.
ساغولون.