دؤیوشدولر ایکی کل،
یاش بیر
گوج بیر
بیر هئیکل.

ووروشدولار
دوروشدولار
هر ایکیسی دایاندی‌لار
بوتون قانا بویاندی‌لار.

بیر یوروش‌له، بیردن – بیره-
آغ کَل ووروب قارا کَلی سردی یئره.
هورا چکدی، چپیک چالدی
کل یئیه‌سی سئویندی؛
هامی دئدی:
– آی بخته‌ور
گئت کلینی سئو ایندی!

یاریش بئله سونا چاتدی،
آغ ، دؤیوشو آپاردی.
اودوزان‌لار اعتراض‌لا
بیردن های – کوی قوپاردی:
– «یاریم ساعات تئز گلیبدیر» دئدیلر، «آغ میدانا،
بونون ایچون دویوش یئری
وطن اولموشدور اونا.»

سوکوت چؤکدو
هامی سوسدو
دوشوندو درین – درین؛
قضاوتی باطل اولدو بو دلیل‌له داورین.
۱۳۷۹- تهران