«هئچ زامان اونودولمایان عزیز دوستوم جبرئیل زمانی‌نین شرفلی خاطره‌سینه»
الی قوطولو بیر کیشی سحر تئزدن گلیب، مدرسه‌نین قاباغیندا، دووار دیبینده دایانمیشدی. ریاضی معلّمی اونو اوزاقدان گؤردوکده ـ «بو کؤپک اوشاغی‌نین اَل چکن گونو یوخدور»ـ دئیه، باشینی آشاغی سالیب، سرعت‌لی آددیم‌لارلا مدرسه‌یه گیرمک ایسته‌دیکده، قوطولو کیشی اونون قاباغینی کسیب، یالوارماغا باشلامیشدی…
آنجاق معلم یاخاسینی اونون الیندن زورلا قورتاریب، عصبی حالدا: «آقای محترم، من ریاضی نومره‌لرینی چوخدان تحویل وئریب قورتارمیشام»ـ دئییب، مدرسه‌یه وارد اولوب، کئچیب ـ گئتمیشدی.
قوطولو کیشی کور ـ پئشمان یئنه چکیلیب دونبه‌لن- دوز دووار دیبینده دایانمیشدی.
بو ایشین اوستوندن ساعاتلار کئچسه‌ده، معلم نومره‌لری سیاهه‌یه کؤچوروب، دفتردن حیطه چیخارکن، یئنه همان یئرده، گؤزو همان کیشی‌یه ساتاشدیقدا، بو دؤنه اونا یازیغی گلیب، مدرسه باباسینی اونون یانینا گؤند‌رمیشدی.
بیرآزدان مدرسه باباسی کیشی‌نین اوغلونون آدینی سوروشوب، حمید زمانی ـ حمید زمانی، دئیه ـ دئیه معلمین یانینا قاییتدیقدا، معلم سیاهه‌سینه باخارکن، بیردن ـ «بابا بو اوشاغین کی نومره‌سی اییرمی‌دیر، تئز اول گئت کیشی‌دن موشدولوغونو آل! »ـ دئمیشدی.
مدرسه باباسی سئوینجک کیشی‌نین یانینا قاییدیب ـ «موشدولوغومو وئر آی آغا، اوغلون قبول اولوب! ریاضی نومره‌سی‌ده اییرمی‌دیر» ـ دئدیکده، قوطولو کیشی:
ـ آی آتان رحمتده آی عمی! ائله من‌ده بونون ایچون مزاحم اولموشام‌دا، آی قارداش! سنه یالواریرام هئچ اولمازسا یاریم نومره اوغلومون نومره‌سینی آزالدا بیلسن، سن نئجه بویورسان خجالتیندن چیخارام» دئمیشدی.
مدرسه باباسی بو سؤزلری ائشیدرکن ال‌لرینی بیر بیرینه چالیب، شاققا چکیب گولرکن:
ـ درگاهینا شوکور الهی، هر جوره‌سینی گؤرموشدوک، دای بئله‌سینه راست گلمه‌میشدیک ـ دئیه‌ره‌ک مدرسه‌نین قاپیسینی باغلاییب، گؤزدن ایتمیشدی.
بئله اولدوقدا قوطولو کیشی ملول ـ موشکول ائوینه قاییدیب ـ «آی آروات، یازیق اولدوق، معلم نومره‌نی آزالتماق ایسته‌میر» ـ دئییب، شیرنی قوطوسونو یئره توللامیشدی…
***
بیر نئچه آی قاباق جبی کیشی، اوغلو حمیدین ریاضی ورقه‌سینی گؤردوکده، دوستو حبیب‌ـه زنگ ائدیب، اوغلو حمیدین ریاضی درسینه کؤمک ائتمه‌سینی ایسته‌میشدی.
ایلک دؤنه حبیب گلیب حمیده ریاضی درسیندن صحبت آچدیقدا، حمید اونون جوابیندا:
ـ منیم نه ریاضی درسیندن خوشوم گلر، نه‌ده ریاضی معلم‌لریندن ـ دئمیشدی.
آنجاق حبیبین اصراری نتیجه‌سینده حمید اوزدن گئدیب، هفته‌ده بیر جلسه ریاضی اؤیرنمک‌له راضی‌لاشمیشدی. البته گونلر گلیب اؤتدوکجه حمیدین ریاضی درسی یاخشی‌لاشسادا، آنجاق بو مسئله اول آی‌لار چوخ چتین‌لیک‌له باش توتموشدو، بئله کی بیر دؤنه حبیب گلیب اونلارین قاپیسینی چالدیقدا، حمید قاپینی آچماییب، حبیبین جوابیندا:
ـ اونلار داها بوردا اولمورلار. جبی گیل چوخدان بو ائودن کؤچوب گئتمیش‌لر ـ دئمیشدی. لاکن بئله ـ بئله ایشلره باخمایاراق، حمید ریاضی درسینی اؤیرندیکجه، اونون گونو ـ گوندن ریاضی درسینه‌ده رغبتی آرتمیشدی، بئله کی او ایندی داها کلاسین اعلاچی شاگردلریندن ساییلا بیلیردی. بئله اولدوقدا، حمید سون امتحاندا اییرمی نومره‌سی آلا بیلرسه، جبی کیشی اونا بیر دوچرخه جایزه‌سی وعده وئرمیشدی. ائله بؤیوک مصیبت‌ده دوز بورادان باشلانمیشدی.
او گون حمید ریاضی امتحانیندان قاییدارکن، هله حیط قاپی‌سیندان ایچه‌ری کئچمه‌میش، باغیرا باغیرا ـ «بابا! بابا! موشدولوغومو وئر، ریاضی درسینده اییرمی آلمیشام »ـ دئدیکده، بئچارا جبی‌نین آز قالا اوره‌یی قیریلیب دوز ایچینه دوشن کیمی اولموشدو. آخی دوچرخه آلماق ایچون بیر اَتک پول گره‌ک‌ایدی، بئچارا جبی بو پول‌لاری هارادان اله گتیره بیلرمیش!!
جبی کیشی دردی‌نین چاراسی ایچون تکجه ریاضی معلمینه اومید باغلامیشدی، اوداکی ایندی نومره‌نی آزالتماق ایستمه‌دیکده، بئچارا جبی کیشی داها بوسبوتون باشینی ایتیریب، ایندی داها نه ائده‌جه‌یینی بیلمه‌میشدی…
آنجاق چوخ گؤتور ـ قوی ائتدیکدن سونرا، جبی کیشی گئدیب، او گون آخشاما تی‌بی‌تی گاراژیندان بیر کلیبر بیلیطی آلاسی اولدو. او، اوغلو حمیدین دوچرخه مسئله‌سی بوسبوتون یادیندان چیخانا قده‌ر گئدیب طوعلی کندینده قالماق قرارینا گلمیشدی.
2 پاسخ
🌺🌺🌺🌺🌺
همیشه لر سایاق چوخ گوزل هم ده معنالی. وار اولسون فرشباف معلم