قارا سؤیود
سالخیم سؤیود
کؤنلوم ایستر اوجا – اوجا بوداغینا قالخیم، سؤیود!
گؤز تیکدییین اوزاقلارا-
بیر آن من ‌ده باخیم، سویود!

سالخیم سؤیود
قارا سؤیود
سالخیم- سالخیم ساچلارینی دارا، سؤیود!
قامتین دوز
بویون اوجا
بویلانیرسان هارا، سؤیود؟!
دئ سنین ‌ده منیم کیمی گؤزو یولدا قالانین وار؟
دئ سنین ده اوره‌یینه-
هیجران اودو چکیب داغ‌لار؟
یاورون سندن آیری دوشدو،
ساچلارینا اسدی روزگار؟
یوخسا سن‌ده کؤنول وئردین-
بیر آلا گؤز یارا، سؤیود؟!
قوی زولف‌لرین دالغالانسین ایلک باهارین نفسی‌له!
قوی اویناسین یارپاقلارین-
آیاغیندان آخان سویون نغمه‌سی‌له!
اومید شیرین
باهار گؤزه‌ل
سن‌ده یازین حوسنونه باخ!
آه چکمه‌کی،
گئد‌نلرین بوسبوتونو قاییتسادا
قاییتماز‌دیر عؤمور آنجاق؛
قاییتمازدیر عؤمور آنجاق.
۱۳۶۸