گونده مین یول
گؤزه‌للییین باشین کسیرلر
اوزونه تورشو سپیرلر
بیلمیرم نه‌دن!
گؤزه‌للیک اوغرو کی دئییل
گؤزه‌للیک ظالیمین پیس عمل‌لری کی دئییل
کورد قیزینین گؤیرچین اخلاقینا
اورمان گؤزونه
بو جنایت نئجه کسیلدی؟
دیل بیلمز ابلیسین حلب محکمه‌سی
بایرامسیز وطنیمین هر یئرینده تکرار اولماقدادیر
مئشه‌لریمیز بالتا بالتا یاوانلاشدیقجا
شام آغاجی یالقیزلاشیر
گونش ده سولغون دوغور دوغودان.
اونودموشوق قیزلارین حیاتا باغیشلادیغی
گؤی قورشاغینی
الوان هیجانی
قوشلارین غبارسیز نغمه‌سی
یاواش یاواش خاطره‌لریمیزه قاریشیر
جنتین خبرین پایلاشان
بال عطیرلی چیچک‌لر کیمی.
هر یئری اورمو گؤلو
هامیمیزی دا ژینا کیمی
کوله‌یه وئرمک ایسته‌ینلر
نه دئیه‌جکلر گؤره‌سن
گؤزه‌للیک محکمه‌سینده؟
۱۴۰۱/ ۶ /۲۹
