نه زیتون قالدی
نه زیتون آغاجیندان آسیلان
اوشاق ننلی‌سی.
قماربازلار
گاز ایشیغیندا پایلاشیرلار اورتا شرقی
یازیق وطن ده
الدن اله
هر گئجه بیر مجلیسین
عشرت یئمی‌دیر.
تورپاغین تئلی
تورپاغا بله‌نیب.
باسدیرا بیلمه‌دییی
قناری‌لر، چیچک‌لر
قار – یاغیش آلتیندا تاریخین چورویور
«بالفور»ون زیرناسی چالینا چالینا.
قولتوغوندا گیزله‌دییی پیچاقدان
کتابیندا پارتلایاجاق آجیقدان
معجوز ده گؤرونمه‌سه
چراغی کی یانیق قالار
هیجانلی خیاوانلارین.
بیر گون ده گونش
ا ؤزون تقدیم ائله‌دی بلکه
سکسان ایللیک انتظارا.
۱۴۰۲/۰۸/۲۳
