من گونده‌لیک‌لری،
رادیو تئلویزیالاری، گزمکدن یورولموشام.
خیاوان‌لارین جانینا دوشن اوشوتمه‌دن،
سویوق سویوق اسن یئلدن،
دیوارین آرخاسیندان
سینه سینه بیزی گودن سیچان‌لاردان
بئزمیشم.
انتظار آدلی سونسوزلوق
باشا چاتماسا،
آی ائنیب یئره
بولاغین سویوندان ایچمه‌سه،
تئلین داراماسا
آلما قیزلارین آیناسیندا،
بو کؤنولسوز گون آیدین‌لار
اوزاغی یاخینلاشدیرا بیلمز.
چوخ اوزاغا گئتمه
قنبرین باش آغریسینی،
یاشارین یابانچییا بورجلو دئییلدییی چؤره‌یینی،
گولگزین ایستمه‌دن
آچیق بختینی قارشیلاماسینی
اذن وئرسه‌لر اگر،
بیر آز دا سورغوسوز سؤزلریمیزی
منزله یئتیره بیلسک،
سؤزلوک‌لرین یاراماز سؤزجوک‌لری
سانکی یوخموش‌لار کیمی
ترک ائده‌ر بیزی،
سیلینر یادداش‌لاریمیزدان.
۱۴۰۳/۰۱/۱۱
