مای بایرامی
حبیب فرشباف
سن ای آلنی ترلی، الی قابارلی،
آرزیسی باهارلی، امه‌یی بارلی!
سن ای داغ ووقارلی ایشچی یولداشیم،
سنین شرفینه اییلیر باشیم!
یارادان اللرین اولماسایدی گر
دونیا بئله گؤزه‌ل اولاردی مگر؟!
باخیرام هر یانا، هر بیر سمته من،
سنین هنریندن بیر نشانه وار؛
طبیعت دیز چؤکور قارشیندا سنین،
سدّ اولور سئل- سولار، یاریلیر داغلار.
تورپاغا ده‌ینده قابارلی الین،
قیزیلا دؤندریر قارا تورپاغی!
سنین پاک تری‌نین دامجیلاریندان
گول ـ چیچک بورویور باغچانی، باغی!
بوتون یئر اوزونون موتورلاریندا
هئچ بیر انرژی یوخ، قول گوجون یانیر.
بیر لحظه دایانسا قادر اللرین،
بوتون بو حیاتین قلبی دایانیر!
گؤی ده‌لن بینالار یاراتمیسان سن،
اؤزونه تیکدیگین هانسی بینادیر؟
«کوزه‌چی سو ایچیر سینیق کوزه‌ده»،
سرمایا عصرینده قایدا بونادیر.
مین ثروت، مین نعمت یاراتساندا سن،
قازانجین، حاصیلین اَل قاباری‌دیر.
سنین زحمتی‌نین آلیب- ساتیمی
سرمایادارلارین ثروت کانی‌دیر.
«چالیشان قازانار» دئییبلر، لاکن
سرمایا عصری‌دیر بیزیم عصریمیز.
چوخ تولید ائتدیکجه، چوخ چالیشدیقجا
ایشسیزلیک قازانار ایشچی‌لریمیز!
بیلیگه، بیرلیگه چاتمایینجا سن،
اربابلار نفعینه ایشلییه‌جکسن.
آزادلیق اوغروندا او بؤیوک رهبر
بیرلیگه، دؤیوشه چاغیریب سیزی.
سیز بو چاققیشمادا امین اولون کی،
الدن وئره‌جکسیز زنجیرلریزی.
دوشونن بئیین‌له، قابارلی الین
وحدتیندن دوغور آیدین گله‌جک.
بیرلشین، سعادت بیرلیگیزده‌دیر،
دؤوران بیرلیگیزدن تزه‌لنه‌جک.
8/۲/۱۳۵۸ – تبریز
