ائل اوچون یاشایانلار
حبیب فرشباف
(خسرو گلسرخی‌یه اتحاف)

شفق واختی‌دیر اویان
سن ای سون باخیشلاری دان یئرینده یادگار،
سون سؤز «گونش» سؤزو !
اویان!
بودور اسمه‌یه باشلاییب باهار یئلی،
چیچکله‌ییر آغاجلار!
تورپاق عطرین قوخودو،
توراغای‌لار اوخودو،
دان یئری آغاردی باخ!
قوطبوموزون گئجه‌سی،
گوندوزونه چاتدی قالخ.
بولودلارا گؤز تیکیب،
دامجی‌لارین سئل اولماق حسرتینی چکردیم.
«ائل گوجونون، سئل گوجونون» بیر گؤره‌یدیم دئیردین،
گوی اوزو ایاز ایکن،
ایلدیریم‌لار پارلامادان، چاخمادان
دامجیلار دامجیلادی مین قاپیدان، باجادان!
آخدی آغزی یئنیشه، زینه بولاقلار کیمی.
آرخ‌لارا قاریشان زامان،
کوشولدادی نه یامان!
چاغلادی، دالغالاندی،
یاتاغینا سیغمایان، جوشوب داشان سئل اولدو،
لاپ دوغروسو ائل اولدو!
دوشمن وحشته دوشدو:
– اکیلن شویچه‌لری قوی بیتمه‌سین- دئدیلر،
قاباغا یئریدیلر.
أووج- أووج تورپاق‌لا،
ساخلاماق ایسته‌دیلر کوکره‌ییب داشان سئلی،
تانیمامیشلار ائلی!
یودو گوز قیرپیمیندا،
آخیشینی لنگیدن یول اوستونده نه کی وار،
غضبلی، کوپوکلو چای!
نه‌دن دئییم سنه دای؟
تورپاق پوکالدی بیر آز؛
ریشه‌لندی شویچه‌لر؛
لاله‌لندی کوچه‌لر.
سنین سون سؤزون گونش،
قاریشیب محو اولسادا گوللـه‌لرین سسینده،
دان یئرینده دونسادا، او آلولو باخیشلار،
نهایت باشا چاتدی سن چکدییین انتظار.
کروان سازلاشدی یولا،
پیادا دوشدو یولا،
کروان قیران دگیل بو،
باخ! اودا دان اولدوزو!
باخ! سؤکولدو دان یئری،
قیزاردی گؤیون اوزو!

یولداش راحات یاتگیلان! ساغالار یارالارین،
ائله بو گوندور، یارین.
سن لاپ امین اول‌گیلان،
چوخ کئچمه‌دن دویارسان
قبرین اوسته بیر دسته نوروز گلی عطرینی.
ائل اونوتماز خطرینی.

۲۹بهمن- ۱۳۵۶