آغ چادیر- قارا چادیر
سعید فیوضات
میرزه منصور فیوضات, ثبت احوال ایداره‌سینین وئردیگی تاپشریقلارینا گؤره مرندین هنده‌ورینده کی کندلره گئدیب خالقا یئنی واجیب اولموش سیجیل آدیندا کیملیک بلگه‌لرینی حاضیرلاییرمیش.
گوندوزلری, آخشاما قدر بو کنددن او کنده گئدیب مامور اولدوغو ایشلری گؤرندن سونرا, آخشاملار هانسی کند اولورسا اولسون بیر ائوه یئرلشیب دینجلرینی آلیب یئنه‌ده ائرته‌سی گون ایشه باشلاییرمیشلار. گئجه‌لر , هر کنده‌ده دوشرگه سالدیقلاریندا کندین کاتداسینین واسیطه سیله، بیر دونیا گؤرموش آغ ساققاللا گؤروشوب دانیشماق ایسته‌یرمیشلر. بیر گئجه کاتدا اونلارلا گؤروشمکدن اؤترو بیر “درویشه مسلک” اولان, قوجا آغ‌ساققالی گتیردی.
ائوین قاپیسینا یئتیشن کیمی قوجا درویش “مناجات چکه‌رک” اؤز حضورونو اعلان ائتدی.
میرزه منصور فیوضات و ائوده اولان باشقا مامورلار او آغ ساققالین حؤرمتینه آیاغا قالخدیلار. درویش امام‌لار حاقیندا گؤزلله‌مه‌لر دئیه –دئیه ایچه‌ری کئچدی, گؤزلله‌مه‌سینی قورتاراندان سونرا اوتوردو.
میرزه منصور فیوضات دئدی:آی ساققال خوش گلمیسن بو گؤزل مناجاتین دوغوردان دا بیزیم روحوموزو اوخشادی.
آغ ساققال دئدی: آی ساغ اول رئیس. دئدیلر سیز منی بورایا چاغیرمیسیز . من ائشیدیرم
میرزه منصور دئدی: بیز بو آخشام سنین دیلیندن ان اسکی ائشیتدیکلرینی یوخسا گؤردوکلرینی ائشیتمک ایستردیک.
آغ ساققال دئدی: آی جناب رئیس ۹۰ ایلی ساغ –سالامات یاشامیشام, بو ۹۰ ایل ده چوخلو-چوخلو یئرلر گؤروب جوره به جوره آداملار گؤرموشم، آنجاق بو آن بیر کیشی‌نین احوالاتینی خاطیرلادیم. اونو سیزده دئمک ایستردیم.
میرزه منصوردئدی: بویور آی آغ ساققال بیز سنی دینله ییریک.
آغ ساققال سؤزه بئله باشلادی: ۲۰ یاشیندا جاوان ایدیم . بوتون بو دوزلری , یایلاقلاری داغلاری گزیب مناجات چکیب گؤزلله‌مه دئیردیم. یاز چاغی ایدی بو گؤردوگون دوزلر جنته دؤنموشدو. لاله لر بوتون دوزون , دؤشونه یاییلمیشدی بیر آن چاییرلارین اوستونده اوزاندیم. گؤزلریمی مورگو دؤیدو. شیرین بیر یوخویا دالدیم. بیلمیرم نه قدر یاتمیشدیم یوخودان اویاندیغیمدا بیر هنیرتی ائشیتدیم. دؤندوم هنیرتی گلن یؤنه باخدیم بیر تپه‌نین اوستونده نئچه چادیرین قالدیرماسینی گؤردوم. یقین من یوخودا اولاراکن بو چادیرلار قالدیریلمیش ایدی. چادیرلارین بیریسی آغ رنگینده ایدی. او بیریسی ایسه قارا رنگینده ایدی. تپه‌دن چیخارکن مناجات چکمه‌یه باشلادیم. آغ چادیردان بیر قوللوقچو چیخیب منه باخیب، یئنی دن ایچه‌ری‌یه کئچدی. سونرا آغ چادیرین ایچیندن بیر هوندور بوی , قاراقاش گؤز , رشید بیر جاوان چیخدی. اینینده کی لزگی پالتاری اونون آرازین اوتاییندان گلمه اولماغینی سؤیله ییردی. آنجاق ساغ الینی بئلینین آرخاسیندا گیزلتمیشدی. من گؤزلله‌مه دئیه –دئیه اونون یاخینینا یئتیشدیم . ائشمه بوغلاری گولومسونوردو. گؤزلله‌مم بیتندن سونرا منه دئدی: داوریش سنین کیمین چاووش گؤرمه میشدیم. نه گؤزل مناجات چکیرسن.
دئدیم: ساغ اول بَی الله سنی ائله جه ده عائیله نی ساخلاسین
بَی دئدی: داوریش بیزیم چادیرین بوساغاسینا گلمیسن , ایندی ده یئمک واختی دیر . یئمک سیز بوردان قاییتماق اولماز.
بوسؤزو ائشیدرکن بیلدیم کی بَی این خطرینه دَیمک اولماز. اودور کی بَی دئدیگی کیمی ایچه ری یه کئچدیم.
منی اویغون بیر یئرده اوتوردولار.
سفره سریلدی. سفره نین باشیندا بَی اؤزو ایلشدی. قوللوقچولار منه قوللوق ائدرکن گؤردوم بَی این اؤزونه ایکی خانیم قوللوق ائدیر. بیریسی آغ خانیم ایدی, او بیریسی ایسه قارا خانیم.
بَی بسم الله دئییب یئمه باشلایاندا , منده یئمه گه باشلادیم. بَی ائله ساغ الینی دالیندا گیزلتمیشدی. آنجاق یئمگی خانیملار اونا یئدیردیردیلر. آغ خانیم ساغ کؤندونده اوتورموشدو , قارا خانیم ایسه سول کؤندونده . یئمکدن بیر تیکه نی آغ خانیم بَیه وئریردی, باشقا تیکه نی قارا خانیم .بَی اؤز ساغ الینی آرخاسیندا گیزلتمه گیندن اؤترو , من خیلی کؤیرلدیم. بیر آن یئمکدن واز کئچدیم سونرادا گئریه چکیلدیم. بَی باشا دوشدو , دئدی: داوریش کیم سنین خطرینه دیدی؟ نه دن یئمک دن واز کئچدین؟
من دئدیم: والله بَی سیز ساغ الینیزی آرخانیزدا گیزلتمیسیز. دئمک منیم بوردا اولدوغوما گؤره سیز راحات دئییلسیز. سیزی راحات سیز ائتمیشم سه , داها آرتیق بورادا قالمارام.
بَی دئدی: داوریش یئمه گینی یئه…..
دئدیم:یوخ بَی , الینی گؤرمه یه نه کیمی , یئمک یئین دئییلم. من بونو اؤزومه بیر سایغی سیزلیق حساب ائدیرم.
بَی حیرصلندی. حیرصلی-حیرصلی دؤنوب منه باخیب دئدی: داوریش سنین منیم الیمله ایشین اولماسین, سن یئمه گینی یئ.
ائله اوزامان دوردوم آیاغا, دئیم: بَی باغیشلا یا ساغ الینی منه گؤستررسینیز یوخسا منده بوردان چیخیب گئدرم.
بَی بیر منه باخیب دئدی: اوندا باخ داوریش!
اوزامان ساغ الینی, بئلینین آرخاسیندان چیخاردیب منه گؤستردی. ساغ الی بیلنگیندن بیر آزیوخاری دان یوخ ایدی.
من بو منظره نی گؤرن کیمی بئله بیر , گؤزل , اوجا بویلو , الی آچیق بَی این ناقیص اولماغیندان چوخ کؤیرلدیم.
بَی دئدی:داوریش ایندی گؤردون الیمی نه دن آرخامدا گیزله دیردیم.
ایندی اوتور یئمه گینی یئ, یئمک دن سونرا سنه سؤیلرم نه اولدوغونو.
من یئنی دن یئریمده اوتوروب یئمه گیمی یئدیم.
یئمکدن سونرا چای گلدی. چاییی ایچیب دینجلندن سونرا بَی سوزه باشلادی , دئدی: داوریش بیز باکیلی‌ییق .
اؤزوم تاجیرم. باکی دا بؤیوک تجارتخانا واریم .تجارت خانامین کانتری ائله دورماق بیلمز . سحردن آخشاما قدر ایشلر . گون او گون اولدوکی آنام منی ائولندیرمک ایسته دی . بیر اصیل عائیله‌نین قیزینی منه نیشانلادیلار . توی حاضیرلیقلاری باشلادی. اوزامان ائله ایندیکی کیمی ان آدلیم اولان شهر تبریز ایدی. ان گؤزل دَیرلی ماللاری تبریزده تاپیب آلماق اولاردی. بیز آلاجاقلاریمیز اوچون تبریزه ساری یولا دوشدوک. تبریزه یئتیشندن سونرا , گؤزل بیر منزیل ده دوشرگه سالدیق. ائرته سی گون چیخدیق بازارا. تبریزین بازاری نه قدر بؤیوک اولدوغو قدر بیر اوقدرده گؤزل ایدی. نه قدر گؤزل ماللار وارایدی. هر نه لازیم ایدی سه آلیردیق. یولوموزو سالدیق قیزیلچی بازارینا. قیزیلچی بازاریندا گزیردیک. بو توکاندان او توکانا کئچیردیک.بیردن بیر قادین منیم یولومو کسدی دئدی: آی بَی بورادا ایسته دیگینی تاپا بیلمزسن بوردا ساتیلان قیزیللار هامیسی “چیچقایا” بنزر.
دئدیم: بس سنین قصد ائله دیگین ان گؤزل قیزیللار هاردا تاپیلار؟
دئدی: منیم آرخامجا گل . بیزیم ائو ایکی کوچه اویاندادیر . چوخ تئز گئدیب گله ریک.
دئدیم: او زامان قوی عائیله می خبردار ائله ییم .
ائله او آن بیر پارچا قیزیل چیخاردیب منه گؤستردی. من او اصیل جواهیری گؤرن کیمی , گؤزلریم قاماشدی. ائله بیل او جواهیر منی مسحور ائله دی. داها باشقا بیر شئ دوشونه بیلمه دیم . اؤز عالمیمده اؤزومه دئدیم کی ایکی کوچه اویانا گئده جه ییک بو عائیله ده هله بللی دیر کی آخشاما قدر بوردا دیرلار. گئدیب قیزیللارا باخیب تئز گله رم .
قادین یولادوشدو, منده آرخاسیجاق . او زاماندا ائله بیر گوجه مالیک ایدیم کی هئچ کیمدن قورخمازایدیم “شوشگم” بئلیمده , قیلینجیم وموزوروم دا یانیمدا ایدی. نه دن قورخمالی ایدیم اودور کی اوره گی توخ اولارکن یولا دوشدوم . بیر نئچه کوچه دن سووشدوق . دؤنوم لردن دوندوک بیر بؤیوک قاپی نین قاباغینا یئتیشدیک. بؤیوک قاپی نین کیچیک آچیلاجاقی وارایدی. ائله بیز قاپینین قاباغینا یئتیشن کیمی کیچیک قاپی آچیلدی, اوزوموزه بو چادیردا گؤردوگون قارا خانیم چیخدی. قارا خانیم بیزی ائوه مشایعت ائله دی. ائو چوخ بؤیوک ایدی . ائوه کئچیب اوردان تنه بی یه کئچدیک. منی ان یوخاری باشدا یئرلشریردیلر. ایندی اوتورموشام گودورم قیزیللار گلسین. بیرده تَنبی نین قاپیسی آچیلدی بورادا گؤردوگون آغ خانیم ایچه ری یه کئچدی. الینده خوچا وارایدی. قادین آغ خانیما ایشاره ائله دی , آغ خانیم گلیب بیزیم قاباغیمیزدا دوروب خونچانی آچدی. خونچا یئره سریلنده, منیم گؤزلریمین چاییری آچیلدی. او قدر گؤزل قیزیللاری بیر یئرده گؤرمه میشدیم. نورمال عادی قیزیل دان چوخ عتیقه یه اوخشاییردیلار. ائله سئویندیم بئله دئمه گه گلمز.
قیزیللاری گؤتوروب باخماغا باشلادیم. بیری –بیریسیندن گؤزل ایدیلر . هئچ عؤمرومده بئله بیر گؤزللیک گؤرمه میشدیم. منیم قیزیللارایلا باشیم قال اولدوغو زامان بیردن قاپی آچیلدی بیر بویلو –بوخونلو کیشی کئچدی ایچه‌ری یه. من دؤنوب اونا باخدیم. قادین تئز دئدی: بو منیم اوغلوم دور .
سونرا اوغلانا دئدی: اوغلوم کئچ اوتور قاپی نین قیراغیندا قوناغیم وار . کیشی ده کئچدی ایلشدی قاپی نین قیراغیندا. من بیر باخیشلا او کیشی‌یه باخدیم گؤردوم بیر شئ دئییل ائله الیمی آتسام اونون خیرخه نه گیندن یاپیشسام جانی چیخار, اودور نیگران اولمادیم.
یئنه تزه خونچالار گلدی .یئنی یئنی قیزیللار دؤشندی.
اوقدر باشیم قال اولموشدوکی عائیلم یادیمدان چیخمیشدی هئچ یئنه ده بیر کیشی نین ایچه ری یه گلمه گینی باشا دوشمه میشدیم. نه واختدان –نه واختا باشیمی قوزایارکن تزه کیشینی گؤردوم. بو یئنی گلن کیشی او بیریسیندن بیر آز بویلو –بوخونلو ایدی. یئنه ده اؤز عالمیمده دوشوندوم گؤردوم ائله بو ایکی کیشی نین ده یاخاسی منیم الیمه یئتیشن کیمی ایکیسی نین ده بوینونو اوزه جه یم. اودور یئنه قورخمادیم. اونلارا بیر قیقاجی باخیب الیمی قویدوم بئلیمده کی شوشگه نین قولپونا.
قادین دئدی:اودا منیم اوغلوم دور اؤزگه دئییل قورخمایین.
من بیر گولومسوندوم. آل –وئر قیزیشمیشدی.
بیر یاندان سئچیردیم بیر یاندان چنه له شیردیک. قیزیل لاردا قورتارمایان ایدی. هامیسی دا گؤزل . بوزامان بیردن قاپی آچیلدی بیر دئو بویدا کیشی کئچدی ایچه ری یه . اوقدر بویو اوزون ایدی کی قاپیدان کئچنده باشینی ایدی.
ائله دوغوردان دا ناغیللارداکی دئولری تمثیل ائله ییردی.
بوسفر وال دؤندو. من اودئوی گؤرن کیمی اسمه جه یه دوشدوم. دوشوندوم گؤردوم او دئو الینی آتسا منیم یاخاما جوجه کیمی منیم بوینومو اوزر.
قادین منیم اسمه جه یه دوشمه گیمی آنلادی. دئدی: قورخما اودا منیم اوغلوم دور , هئچ نیگران اولما . دئدیم: نیگران چیلیق یوخسا قورخو دئییل بیلمیرم نه دن گؤزوم قارالیب باشیم دؤندو.
قادین دئدی: ایندیسه من سنه بیر تورکه داوا وئره رم.
دؤنوب آغ خانیما بویوردو: آی قیز گئت او توربانی گتیر .آغ خانیم گئدیب بیر توربا گتیردی.
قادین قاینانمیش سویون ایچینه بیر آز یارپاق توزو توکدو. هئچ بیر آز زامان کئچمه میش منه بیر قیزیشما گلدی. ائله بیلدیم کی بوتون دونیانی ییخا بیله رم. او قاپی قیراغیندا ایلشن اوچ قارداشا باخدیم گؤردوم منیم گؤزومده جوجه یه دؤنوبلر. سانکی الیمی اوزاتسام اوچونوده بیرگه بوغارام.
ائله اؤزومو گوجلو حیس ائله‌دیم کی ال آتیب شوشگه می قیلینجیمی موزورومو اوستومدن سویوندوم, بیر قیراغا قویدوم ائله باشیمی ایتیر میشدیم کی زامانین کئچمه سینی بیلمه دیم.
بیردن قادین دئدی: بَی چوخ گئج اولوب ایندی سنین بو واختدا بو قدر قیزیل و پول ایله ائشیگه چیخماغین هئچ دوز ایش اولماز. منجه سیز گئجه نی بورادا قالین یاتین. سحر آچیلان کیمی گئدر سیز.
اوقدر باشدان چیخمیشدیم کی هئچ فیکیرلشمه دیم آخی منی گؤزله ین وار. آخی من هارا گئتدیگیمی دئمه میشم. آنجاق گؤزوم دؤنموش ایدی. بیر دن قادین دئدی: آی آغ خانیم گل قوناغیمیزی آپار اوتاغینا.
آغ خانیم گلر کن آیاغا دوروب آرخاسیجاق یولا دوشدوم. منیم اوتاغیم حیطین او بیریسی باشیندا ایدی. ائله حیط قاپیسیندان چیخان کیمی بو آغ خانیم منه دئدی: سن نه قدر آخماق جاوان سان سن نه قدر آغیلسیز , نه قدر ساده بیر آدامسان.
دئدیم: نه اولوب کی؟
دئدی:آی یازیق بونلارین ایشی ائله بودور. هاردان گلدیکلری بللی دئییل . هئچ کیم بونلاری تبریزده تانی ماییر.
ائله سنین کیمی جاهیل و فیکیرسیز ,وارلی بَی لری , قیزیل بهانه سیله بورایا گتیریب سونرا اؤلدورورلر. ایندی بیر آزدان اوغلان لاری گلیب سنی اؤلدوره جکلر.
دئدیم: هئچ ایش گؤره بیلمزلر , اونلارا ائله قورشون یاغدیرارام گل گؤره سن. قیلینجیملا دوغرارام , شوشگمله باشلارینی اوزه رم.
دئدی: آی یازیق هانی شوشگن، هانی قیلینجین, هانی موزورون؟
ائله او آن الیمی آتدیم گؤردوم بئلیم بوش دور. سوروشدوم بس منیم هانی بئلیمده کی لر، هانی پولوم، هانی قیزیلیم، من نئیله دیم اونلاری؟
آغ خانیم دئدی:آی یازیق اونلارین هامیسینی سویوندون قویدون قالدی تنبی ده. ایندی قیزیللاردا اونلارین الینده پوللاردا. سیلاحین دا اوردا قالیب.
من دئدیم: آخی من نییه بئله اولدوم؟ نه گلدی منیم باشیما؟
آغ خانیم دئدی: آی یازیق بونلار اووچودولار .سنین کیمی اوولاری, اوولاییرلار بونلاردان فیرلداقچی سی یوخدور.
ائله هللم –قللم دیلر تای لاری یئر اوزونده بئله یوخدور. سنه داوا ایچیرتدیلر. سن اؤزونو چوخ گوجلو حیس ائله‌ییب , قورخماییب گئدیب یاتاندان سونرا,سنی اؤلدورمک اونلارا سو کیمی اولاجاقدیر.
بو سؤزلری ائشیتمک بیرده کی هاوانین تاثیری بیر آز او داوانین اثرینی سیرلتدی. دئدیم: آی آغ خانیم منه بؤیوک یاخشیلیق ائله دین . ایندی گؤرمنه بیر بالتادان , چاپاقدان یا اوناتای بیر شئ تاپا بیله جکسن.
دئدی: گؤروم نئیلیرم . منی اوتاغا یئتیریب گئتدی. منده اوتوروب تیتره مه گه باشلادیم. اؤزوم ده بوتورا دوشمه گیمه مات قالدیم. نه قدر عاغیل سیز ایمیشام من . نه‌دن هارا گئتدیگیمی دئمه‌دیم. نه دن تانیمادیغیم آدامین آرخاسینا دوشوب بو قتیلگاها گلدیم.
ائله بو آندا گؤردوم شوشه نی تیقیلدادیرلار. باخدیم گؤردوم بو آغ خانیم بیر پاسلی قمه تاپیب گتیریب منه . او پاسلی قمه, ان قیمتلی هدیه ساییلیردی
دئدیم: آی آغ خانیم سن نه دن منه یاردیم ائله دین.
دئدی: منیم طاقتیم توکندی. داها آرتیق بو ظولوم لره سس سیز قالا بیلمه دیم. ایندی بیل کی منیم ده جانیم خطرده دیر. اگر ایشینی دوز گؤره بیلمه سن منیم ده باشیم گئده جک.
سونرا قویوب گئتدی. من تئز آیاق یالین , چوخ سس سیز جه اوتاغیمدان چیخیب یاواش-یاواش ائوه ساری گئتدیم . تنبی نین پنجره سینین قاباغیندا دوروب قولاق وئردیم. گؤردوم قادین اوجادان گولور. سونرا سؤزلرینی ائشیتدیم . دئدی: گؤر بو جاوان بَی نه قدر آخماقدیر. بوتون سیلاحینی سویونوب تؤکدو بورایا. هئچ من بو قدر راحات بیر اووا راست گلمه میشدیم .۹ هئچ بو قدر راحات بیریسینی توراسالمامیشدیم. هئچ دؤنوب عائیله سینه هارا گلدیگینی بئله دئمه دی.
بو سؤزلری دئییب ائله اوجادان گولوردو. بیردن دؤنوب ان کیچیک اوغلونا دئدی: اوغلوم گئت قوناغیمیزی راحاتلا.
ائله کیچیک اوغلان آیاغا دوران کیمی منده تئز آستاجا گئدیب گیردیم اوتاغا. قمه نی الیمده برک یاپیشتیم. ائله اوغلان حَیطدن اوتاغا گیرنده بوینوندان توتوب قمه نی اوره یینه سوخدوم. هئچ آخ دئیه بیلمه دی . آما منیم فیکیریم او دئوین یانیندا ایدی.
یوخسا بو ایکی قارداش منه سو ایچیم کیمی ایدیلر. یئنه قاییتدیم اوتاغین قاباغینا قادین ائله قاه –قاها گولوردو. بو قدر ثروتین راحاتجا الینه دوشمه گی اونو لاپ بئله کئفلندیرمیشدی. بیردن دؤنوب اورتانجیل اوغلونا دئدی: آی اوغول قارداشین یوباندی. گئت گؤر هاردا قالیب گلمه دی.
اورتانجیل اوغول دئدی: آی آنا نه قانینی قارالدیریسان بلکه ووروب دور طرفی, طرفده یئرده چابالاییر اودا دوروب او منظره یه باخیر.
بیر آز کئچدی . قادین دئدی :آی اوغول دور گؤر آخی بو قارداشین هاردا قالدی .آخی چابالاماق نه قدر چکر کی. گئت گؤر نئیله ییر . نیه قاییتماییر.
اورتانجیل اوغلان آیاغا دوردو.
من بو منظره‌نی گؤرن کیمی تئز قاییتدیم اوتاغا. اؤزومو حاضیرلادیم اورتانجیل اوغلان اوتاغا گیرن کیمی شیغادیم اوستونه آغزینی توتدوم. بیر آز منیمله گورشدی ، آما من تئز قمه نی سوخدوم اوره یینه. ایش دن دوشن کیمی سورودوم آپاردیم اوتاغین قیراغینا . لحله یه –لحله یه قاییتدیم تنبی نین قاباغینا.
قادین ائله کئف ائله ییردی . پوللاری گؤتوروب گویه ساووروردو. بیردن دؤنوب بؤیوک اوغلانا دئدی: آی اوغول بس قارداشلارین هاردا قالدیلار . بؤیوک دئو اوغلان دئدی: آی آنا حتما ایکی قارداش اونون چابالاماسینا باخیرلار.
قادین شهله نه رک دئدی: اوغول ائله قوناقیمیز دا آز آشین دوزو دئییلدی ها. هله –هله چابالایان آداما بنزه میردی گئت گؤر آخی نه اولدو بو ایکی قارداشینا.
دئو قارداش دوردو آیاغا. ظالیم اوغلو ظالیم اوقدر اوزون ایدی کی منیم دورد آتدیمیمی او بیر آتدیمدا آتیردی . چوخ سورعتله قاچدیم، آما هله اوتاغیما یئتیشمه میش او حَیطه گیردی . ائله حیطه یئتیشجه گین منی گؤردو. بیر نعره چکدی سونرا یوگوردو منیم اوستومه .
من گؤردوم بو دئوله ال به یاخا اولسام ائله منی بیر الیله بوغاجاق. اودور, بوتون گوجلو –گوجومه قمه‌نی تولازدادیم. قمه گئدیب دوز سانجیلدی اونون اوره یینین باشینا. اورکدن باغیردی. آما هله جانی قالمیشدی . سمتیرله یه- سمتیرله یه , والایلایا-والایلایا, منه ساری گلدی. گوجو قورتاران کیمی اؤلدو. ائله یئره دوشن زامان الینده کی قمه نی منه ساری تولازدادی .اوقدر گوجلو گوجونه تولازدادی کی من اؤزومو قیراغا چکدیم اما سونوندا قمه دوز دوشدو منیم بیلنگیمه , بیلنگیمی سالدی. بوتون وجودومو آغری آلدی. ییخیلدیم یئره ,اویدوم. ائله اویار اویماز بیرده گؤردوم کی قادین منیم ائوده قالان شوشگه می گؤتوروب جیحه چکه –چکه یوگوردو منیم اوستومه . داها آرتیق اینجاریم قالمامیشدی. او زامان گؤردوم کی بو قارا خانیم الینده کی دیه نه گیله او قادینی ووردو. قادین یئره دوشدو. باش گؤزو یاریلمیش ایدی. اوندان سونرا بو قارا خانیم شوشکه نی قادین دان آلیب گتیردی قویدو منیم اووجوما ,دئدی: باتیر بو عفریته نین اوره یینه قوی عالم الیندن قورتارسین.
منده سورونه –سورونه قادینا ساری گئتدیم بئله الیمی قالدیرا بیلمیردیم. یئنه بو قارا خانیم منه یاردیم ائله دی. سول ا لیمی گؤیه قالدیردی. منده شوشکه نی ائندیره رک او قادینین اوره یینی پارچالادیم. قادین بیر جیحه چکدی سونرا سوسدو. سونرا بیر شئ بیلمه دیم…. گؤز آچدیغیمدا گؤندوز ایدی. نه قدر یاتدیغیمی بیلمیردیم بیردن گؤردوم باشیمین اوستونده بو ایکی خانیم اوتوروب لار. یارالاریمی باغلامیشدیلار. سوروشدوم من نه قدر یاتمیشام , دئدیلر سن یئددی گون دور یاتمیسان.
دئدیم: تئز منی قالدیرین گئدک عائیله مین یانینا ایندی یازیق لار الدن گئدیبلر.
آغ خانیم کئچدی ساغ قولتوغوما , قارا خانیم کئچدی سول قولتوغوما. مسافیر منزیلینه یئتیشنده ائله بیل قیامت قوپدو. داها آرتیق آتام، ائله جه ده بوتون عائیلم منی گزمک دن یورولوب , ییر –ییغیش ائله ییب گئتمک ایسته ییردیلر. منی گؤرن کیمی ائله بیل دونیانی وئردیلر اونلارا….
گونلر کئچدی بیز باکی‌یا قاییتدیق. من ساغالدیم اما او منه نیشانلادیقلاری قیزی آلمادیم. آخی منیم ایکی جان بورجوم وارایدی. بیری بو آغ خانیما بیریسی ده بوقارا خانیما. من بونلارین ایکیسینی ده آلدیم . ائویمده یئرلشدیردیم. بیز ایندی چوخ بختوریک. هر ایل یازدا بویایلاغا گلیریک… سنده هر یاز گلیب بیزی گؤره بیلرسن
سونرا منه بیر آغ آت توحفه وئردی.
میرزه منصور فیوضات سوروشدو: گؤره سن ائله هر یاز گلیرمیش لر اورایا.
قوجا آغ ساققال: والله جناب رئیس بیر نئچه یاز گلدیلر حتی من بیرکره سیخینتی دا قالمیشدیم اونا گؤره ده آتی ساتدیم. او یاز گلنده گئتدیم اونلاری گؤرمه گه. او منی گؤرن کیمی اوزونو دؤندردی.نه قدر دانیشدیردیمسا دانیشمادی. سونرا آغ خانیمدان سوروشدوم. بَی نییه مندن کوسوب دئدی: آخی آغ آتی گؤرمه ییب اونا گؤره یقین سن اونون تحفه سینی ساتمیسان. او ایش بَیه سایقی سیزلیق حساب اولور. اودور سنی دیندیر مه یه جک.
اوندان سونرا آغ خانیمی و قارا خانیمی واسیطه سالدیم سونوندا منیمله دانیشدی. آنجاق دئدی:آی کیشی آدام دا تحفه آتی ساتار؟
دئدیم:بَی باغیشلا آنلامامیشام.
نئچه یازدان سونرا داها آرتیق اونلاری گؤرمه دیم داها آرتیق بیزیم طرفلره گلمه دیلر….
***
میرزه منصور فیوضات بو حقیقی حادیثه‌نی اؤز اوغلو داوود فیوضاتا دئییب، منده آتام داوود فیوضات دان ائشیدیب و یازدیم بو کاغازلارا. تانری هامی سینا رحمت ائله سین. نور ایچینده یاتدیلار.
ماراقلی سی بودور کی بو دفتری باشلادیغیم قلم ائله بوردا توکندی
سون
