دوز کئچن ایل بو چاغلاردان بیر آی بیر آی یاریم اؤنجه اولاردی یا اولمازدی اینیستادا ایزله‌دیییم نئچه کیتاب تانیتیمی یاپان ادبیات سئور دوستلاردان قیز اولان بیری استوری‌سینده (… یا…)نو یازیب آردینی گتیرمه‌میشدی؛ یانی من سیزه ایکی سئچه‌نک آراسیندا قالیبسینیزسا هانکی سئچه‌نه‌یی سئچمه‌نیزده یاردیمچی اولارام دئیه ایزله‌ییجی‌لرینه یازیلی سسلنمیشدی. چوخ ایلگینج ایدی، ائله بیل حالیمی بیلن دوشونجه‌لی بیری صیرف منیم ایچینده اولدوغوم ایندیکی دورومومو دوشونوب پارلاق فیکیرلری ایله یاردیمچی اولماق اوچون بو سورونو اوتانماییم دئیه آدیما هامیدان سورموشدو. حالیمی بو بیلگیندن ده یاخشی آنلایان شاعیر دوستوم ایللر اؤنجه‌دن چئویریلمیش شعر کیتابینین اودا کونجو دوستاغی اولدوغومو ازبر بیلدیییندن منیم یئددی-سککیز آی اوّل دوست‌یانا تاپشیریغیم اوزه‌ره ال آتیب کؤمک ائله‌سین ایسته‌دیییندن تهران‌داکی اؤز دیرلی ایشینی، ایشی اؤیره‌ده‌جه‌یی گارانتیسی ایله منه اؤنردی.
بیر یاندا یاتالاق آنامین بیر یاندا دا شاعیر دوستومون دونیا مالیندان آرزوسوز ائدن کارلی ایشینین آلا بیلمه‌یه‌جه‌ییم ایکیلملی قراری اورتاسیندا قالدیم. نه ائده‌جه‌ییمی گونده مین کز دارتیردیم آنجاق بیر یئره چیخارا بیلمیردیم. تا کی تهراندا یاشایان بو گنج قیزین استوری‌ده‌کی دیرلی و ایلگینج سوروسو ایله راسلاشدیم؛ چوخ دوشونمه‌دن دیرک یازدیم: (آنا یوخسا کارلی ایش؟)
نئچه ساعات سونرا بیر داها نئته کئچدیییم‌ده ساغا سولا ساپمادان آشیری ماراقلا دوغروجا همن گنج قیزین استوریلرینه باخماق ایسته‌یی منی اولمازین هیجانا بورودو. من اؤنجه اؤزگه‌لرین سوردوغو باشقا سورولارین یانیتلارینی بیر-بیر اینجه‌له‌دیک‌ده گؤردوم بو گنج قیز گئرچکدن ده هر آلانین اوزمانی ایمیش کیمی یئتکیلی تیتیزلییی ایله سورولاری اوستاجا یانیتلاییب‌دیر. اؤزومون وئردیییم سورویا یئتیشنده قیزین وئردییی یانیتی گؤرر-گؤرمز ایچدن-ایچه سس‌سیزجه اوزون-اوزادی چئشیدلی آلاندا اولان بیلگیسینی هم ده دیرلندیرمه نیته‌لییینی آلقیشلادیم؛ «اینسان یاخینلارینا یاراری اولسون، اؤزو عایله‌سی راحاتلاسین دئیه ایشله‌یر، آنان اولمادیغی دورومدا ایش نه دردینه دیه‌جک کی!»
سوروما یانیتینین نورمال اورتامدا نه قدر دوغرو اولوب اولمایاجاغی قالسین بیر یانا، منیم بولوندوغوم استاتوسدا بیریسی اوچون بوندان اؤته یانیت اولا بیلمزدی سانیرام.
طبیعی، او، منیم نئجه بیر دورومون ایچینده اولدوغومو بیلمه‌دن، حالیمدان بیلگیسی اولانلاردان مین کره داها ایی ایچینده بولوندوغوم اورتامی دیرلندیرمیشدی.
اونا قدر سورونومو هر کسله اورتایا قویوردوم، آنامی دوشونمه‌دن دئییردیلر؛ «اده ایش تاپیلیر! دروماغین آخماقلیق‌دیر! آنان قاچمیر کی، بیردادی؛ آنان سنین گله‌جه‌ینی گارانتی ائده بیله‌جک‌می!؟» (باخمایاراق کی آنام داها اوتوز-قیرخ ایل اؤنجه‌دن ایشیقلی حیاتا گیریش بیلئتیمین گارانتی‌دن ده یوکسه‌یینی یاپمیشدی یازیق.)
اصلینده ایشدن برک یاپیش دئین یاخینلار دا منیم سفیل دورومومو دوشوننده چوخ دا حاق‌سیز ساییلمازدیرلار؛ ١٣٨۴دن کولتور باخانلیغینین آلت کؤمه‌جینده اولان ایران یازیچیلار درنه‌یینه جیبیمدن تؤکدویوم یوزده‌لی سیقورتادان تقاعوده چیخیب اوتوراجاغیما ان آزی هله اون دؤرت ایل قالیردی؛ اونو دا بیر جور بیر تهر اؤنومه چیخان بو یاغلی ایشله کئچیشدیره بیلسه‌‌یدیم حیاتیمین گئری قالان قیسمینی گلیر سیخینتیم اولمادان سوردورمه شانسیم آیلیق گلیری ده دوشونه‌رک یوکسک اولاجاقدی. بو تورلو، بو گونه قدر چکدیییم آجیماز یاشامین آمان‌سیز اوخلارینا ساچما کیمی دوران دایانیشمام دا بیتی وئرمیش اولاجاقدیر.
ایندی او اولایدان بیر ایله یاخین‌دیر کی کئچیر. آنامین‌سا اؤلدویو اون گونو بولماز. اؤلدویو گوندن بونو دوشونوب دورورام. یاخشی کی او ادبیاتچی گنج قیز او واخت استوری‌سینده او سورونو پایلاشیبمیش؛ یوخسا آنامی او کؤکده باشقالارینا بیراخیب گئتمک آجیسی بوندان سونراکی یاشامیمین آزجیق باباتلیغینی دا الیمدن آلاجاقدی.
ایندی کیم اولدوغونو اونوتدوغوم ادبیاتچی او گنج قیزا استوری‌سینین سورو یانیتلاما دیلیمیندن آنی بئله اله دوشمه‌یه‌جک گؤزل آناملا بیر ایله یاخین یاپیش-یاپیش دادلی عؤمور دیلیمی حاققی قازانیب آلنی آچیق قایغی‌سیز گله‌جک یاشانتیمی دا قورغوشونلو مؤهورو ایله گارانتی آلتینا آلدیغی اوچون اینسان آدینا چوخ سئوینجه‌یم.
شهرام گلکار
چئویرن: شهرام گلکار
ترجمه: شهرام گلکار
سسلندیرن: شهرام گلکار
- حئکایه
- اوخوماق زامانی: 2 دقیقه
- https://ishiq.net/?p=32921
چاپ
یک پاسخ
از بو بابت دن کی تورک دیلینی گسترش وریریز ممنونام.ولی نسل جدید آذربایجان با ادبیات سنگین غریبه است بنظرم ترکی محاوره ای روز مره را تبلیغ کنید تا هم نسلهای من بتونن بیشتر استفاده کنند.این ادبیات مثل اینکه در فارسی کلیله و دمنه اصلی رو بخونی.چه فایده ای داره وقتی هیچی نفهمی.