آفاق مسعوددان کؤچوردویوم کیتاب‌ چیخینجا اینیستادا گئده‌ن هؤروت:
ایسته‌ییرسن حیطده‌کی چاققال- چوققالی قوواسان، ائوین ایتی دابانینا یاپیشیب قویمور دبه‌ره‌سن!
کؤچورمهدی، چئویرمهدی یا دا باشقا بو تیپ ایشلر، منیم اوچون کئچمیش نئچه اون‌ایللردن بری، ایش بؤیرونده الیم اصیل یازینسال ایشدن سوستالماسین دئیه سئوه‌رک یاپدیغیم ائیلم‌دیر. بؤیله ایش قایداسی ایله دیگر ادبیاتچیلارا، بیلیم آداملارینا ایستر- ایسته‌مز یاخشی-یامان آز-چوخ قاتقیم توخونا بیلیر. بو تور ایشلری اصلینده چتین یاشانتیم زوروندان دولایی چوخ واخت کیتاب‌ اوخوما اورتامیم اولماییب یازمانی مطالعه‌نین کؤک سالمیش فورمو اولاراق تک چؤزگه بیلدیییمدن هر ایکیسینی بیر یئرده باش- قولاق ائتمه‌ییمدن ایره‌لی گلمیشدیر. یازی ماجرالاریمدا گئنلده آدلارا قافانی تاخمارام، هؤروته باخارام هؤروته(سؤزجوک’ه، تومجه’یه)… زامانیندا اولقودورسا، ده‌یرلندیریرم، آنجاق اونا دا بئله تاپمام! ذاتن اولقولار دا دوشونورلرین هاچانسا یاپدیقلاری چئشیدلی اولاسیلیقلاریندان تؤره‌میر می؟ هؤروت اوستونه هؤروت گله بیلر، اؤنجه‌کینی گئچیجیلیکدن سالان دا اولا بیلسین بلکه، آنجاق او بئله گلینجه، اولان هؤروتو آخماق یان یا دا یانچیلیق سببلردن گؤرمزدن گلمک دوز دئییل سانیرام .
قافام اؤز ایشینده بسیط آدامام من؛ کیتاب‌ی اوخویارام، بیندیم، یازیب پایلاشارام. بو، شعر ده اولا بیلر، رومان یا حئکایه فالان دا… رومان‌دیر حئکایه‌دیرسه غایه‌م تحکیه‌چی‌لیک رومانچیلیق اولموش، شعردیرسه شعرسی دویغولار دوشونجه‌لر اؤن پلاندا هر شئیین اؤنونده گلیب.
اوخوجو کوتله‌سینین چئشیدلی اؤلکه‌لردن چئشیدلی کولتورلردن چئشیدلی دیل یاپیسینی دادماغا حاققی چاتیر. بیراخین نه‌یین دوز نه‌یین ایری اولدوغونا، کیتاب‌ی آلیب اوخویاجاق دویارلی، آییق اوخوجو توپلوموموز قرار وئرسین؛ یوخسا کیتابین داها هانکی ژانردا یازیلدیغینی بئله بیلمه‌ییب، دوشونور رولو اوینایان، آکتیورلوغا سویونان تلخکلر دئییل. کیتاب‌ اوخوجولوغو کوتلوی بیر اولای‌دیر. ذاتن دوشونجه‌لر اونا گؤره پایلاشیلیر کی بیلگی، بیله‌جک چوخالیب یاییلسین؛ اویقارلیق گتیرسین، مدنی دیرچه‌لیش تؤرتسین. نه‌ ایسه چؤزوب دینجلییه اؤزگورلویه وارمانین یولونو آراسین، آراتسین. کیمین نه‌یی اوخویاجاغینی، نه‌یی یازیب پوزاجاغینی، نئجه داوراناجاغینی، نه ‌قده‌ر اوخودوغونو، اوخودوقلاریندان نه قده‌ر آلدیغینی، دوشونجه دورومونو کیمسه سورقولایاماز.
الشدیری‌یه آچیق اورتامدا، گول کیمی هوروت اولان یئرده، اصلینده بو صؤحبتلر اولمامالی‌ ایدی، آنجاق اورتالیق چوخ بولانیق ایمیش؛ بیلدییینیز کیمی دئییل، اینانین… دوکتور رضا براهنی «آزاده خانم و یازیچیسی» رومانیندا یازیر کی، قیاسلاندیرماق الشدیرینین واز گئچیلمز گوجلو قولو ساییلیر. چئشیدلی یاپیتلارین دولایلی یوللار ایله اورتایا گلمه‌سی الشدیریچی آرخاداشلاریمیزا آیریجا بو اولاناغی سونما قوشولو دا اولوشدورا بیلیر.