ساچین‌دان
ساچینتین‌دان
حامامین توزو-تورپاغی تؤکولور
کوچه‌میزی
ماشین یوآن شیلانقی‌‌نین سو پوسکورتوسو تک یویور گؤرونتون
هاواداکی قازلار یانیب- توتوشور
ایچینه بی‌گیر- بی چیخ دالماغا
سوپورله‌شیر سیخینتیلار
کور قییی‌نین قاشین‌دا
اسنک‌لیک‌دن ساپ ساللانیر توتدورولماغا
پالتاری‌نین رنگی قاچیر
بدنینی داشیماغا یاریسین دئیه
«اسینتی‌نین» ایسته‌یینه اییلیملی قیوامدا
گونش گؤزلری‌نین داغی‌نین دالیندان چیخی وئریر
گؤودن روحوندان بیر بدن بؤیوک
اؤلندن سونرا دا اینینه گلیر… گئدیر آرا- بیر
سینیرین کوچه‌میزی آرخامدان گوزلملمه‌یی تیک یاپیر
باشیمی چته‌نه دومانی کیرالاییر
گون‌باتیمی آلا‌توران سرسری سویونتوسونون باغریلتی‌سیندان دا دهشت یوخسونلوغو چیغیریرام
اؤد داشیناجاق دایانا بیلمیرلر دوشو
دوشو
آغرینی دیندیرینجه‌یه قدر چکمیرلر
سسی‌نین سؤزسوز چؤلونده ایلین مجنون نوبئلینه توپوره‌رم
پروْتئستو ائده‌رم اؤدولو
«سارتر»ین روحو سو چیچه‌یینه بورونسون
یولوخوجو گول تؤکسون
سسینی چکیرم دریمه سئلی قوروتسون
ایرماقلاری دیرماقلاییب
دیرمیقلارین مایماغینا دؤنورم
یارپاقلارینی توپلاییب
سانجیم باریشین یومشاق سانجاغی اولور قولوندا اؤزگورلوگون
گؤرکلو گونون
گون گؤره‌‌بیله‌جک اؤزون توتوقلو ائولی‌لیگی‌نین نیسگیل توتومو
نییه توتمایاسان کی
قاناد آچمایاندا
قوسماق قانادین آغزینی قوسور
یورو یولون، یئرین جانی یونگول‌له‌سین
یورو یولون، یئرین دیشی آغزی فیرچالانیلیب
سولوغو عطیر فیشقیرسین
یورو ماوی لپه‌لری
گمی‌لرین غمی دینسین
سن آزاد تئل‌لرین آل اسینتی‌سی
حیاتیمیزا ال آت کی
آینادا الینه باخیب
اؤزوموزه چکی وئرک
دوزن وئرک
سن‌سیز وار-یوخا چئک چکک هاوایی
آدینا میللت‌لر باریشینا یئلته‌نک
گؤیلون آرزومون زیروه‌سی
آدیمی کؤمورله یاغیشلی اوره‌یینین اوزه‌رینه یازسان دا-
منی گؤرر
«ایققی آزالئا»نین رئپی آلتیندا دیکه‌لن گؤت دانسلاری قده‌ر اولور
باخیشی‌نین انرژی یوکسکلییی
اوزونو آتا‌تورکون سئکولار دوشونجه‌لری قده‌ر سئویرم
سن ماشینلا گؤی آدالارا
سود یولو ایله الینده «سن‌ایچ» سود قوتوسونون خورطوموندان ایچه-ایچه گئدیرسن
من زیبیل قوتوسو سانجیلمیش تینین بیرینده
-منی سئزیب‌سن دئیه-
گئجه‌نی آتلادا بیله‌جه‌یه‌م
دؤشومده آلتین مئداللی
اولیمپیک آتلئتی آلتی مئتره اوجالیغی دیره‌یی‌یله آتلار کیمی
آتلار کیمی
آتلار کیمی
آتلار
آتلار
آتلار کیمی
۱۳۹۹/۷/۲۰
