هامی کیتاب اوخوماسینی
گؤزونه (گؤز+ اونه) سوخسون دئیه
‘سن’ اونا کیتاب وئره‌سن ایسته‌ییر
یایین ائولری، کیتاب باسان ایشچی‌لر
باتقی‌یا، یئنیلگی‌یه اوغرایان‌دا
باتماسین‌لار دئیه
‘سن’ اونلاردان کیتاب آلاسان ایسته‌ییرلر
هئچ بیر ایش‌ده چالیشماغینی ایسته‌میرلر
آج قال ایسته‌ییرلر
هؤرومچک‌آدام اولسان دا
آراکنه’ قیزجیغاز روحونو
کونج-بوجاق دوستاغی هؤرومچه‌یه چئویریرلر
یانلیش آتئنالار، دوز آتئنالار
بیر یئره ییغیشان‌دا
اورتام قیزیشسین دئیه
‘سن’ بیر شئی سؤیله ایسترلر
فرق ائتمز
شعر اولسون، یومور اولسون، باشا گلدی، باشدان کئچن، باشدان گئتمه‌ین
بئلدن آشاغی
دؤشله آربا
بیرآز چیخارلارینا قیییل‌سا
ایت یئرینه ده قویماق ایسته‌مزلر سنی
آروادلارینا
گؤر کیم‌لردن ایره‌لی کئچمیشم’ دئیه،
سن گؤره-گؤره
سن باخا- باخا
سن مات قالا- قالا
‘سنی’ بارماق‌لاری‌یله گؤستررلر؛
اصلینده اونلار اؤزلرینی هر کس‌دن گؤزل بیلیرلر
مال‌لارینی، ایش‌لرینی هامی‌دان باها دئییب
‘بوتونون’دن آزجیق چیخارلار؛
بوینونا مینّت اولسون ایسترلر
سونرا، او ‘آزجیق‌دان’
‘مینّت قارشی‌لیغینی’ دا ایسترلر البت
برتراند راسئل’ین پئرفورمانسینی بکلرلر
بیر یومورتا بیر صومو’یا یئتمه‌یه‌جک گونه‌به‌گون گلیرین‌له
آدینی، هر نه قویارلار؛
آنجاق،
اَینینه تلیس پارچاسینی
آغزینا چؤرک قیریغینی
آیاغی‌نین آلتینا ایکی تکرلری چارخی دا چوخ گؤررلر؛
سورون ایسترلر
مَله ایسترلر
آنه گؤره، یان‌لاریندا دوران آدام‌لارین ایستاتوسونا
توتدوق‌لاری یئرلرین، دَیرینه گؤره
وئرجه‌یی سالام‌لاری برکیدیب-بوشالدارلار، دوروما اؤزل
“بوش آتیب
دوْلو توتارلار” یانیندا
کئفله‌نن‌ده ده اورتامی ایسیدن سؤز تاپا بیلمزلر دئمه‌یه
اوتانماییب
زنگ آچیب
کئف‌سیز، اؤلومجول حالیندان ساغلیق ایسترلر
نورمال گونون هئچ‌نه‌سینی سنین‌له پایلاشمازلار
‘سنی’ اؤزل آن‌لاردا
اؤزل گونلری‌نین نئچه ساعاتی اوچون ایسته‌یه بیلرلر فقط
‘سیرک‌ده گؤردوک‌لری مئیمون‌جاق’ اؤرنه‌یین
لاپ بزک‌لی‌‌لرینین ده اوره‌یینی بولاندیرار
گونده-گونده مدنیّت، اویقارلیق
گئجه-گوندوز نجیب‌لیک
هر حال و کاردا حاق
سئوینج
دینج‌لیک
اؤزگورلوک
“باخین! بیر لوْپ‌توپ آلاجاق پولو یوخدور!”
اینیستاگرام استوریسی‌نین سورو-یانیت‌لاماسیندا
آلای قونوسونا دؤنوشمه‌نه
بایا گولوب ایله‌نه بیلیرلر
اوزونه توپوره- بیلمه‌دیک‌لری اوچون
اؤیله بیر یئتکینی قایدالاردان آلامادیق‌لارینا گؤره
قایدالارا قیزیب
یئتکیلی‌لره ایچدن-ایچه
دیش‌لرینی بیلرلر
سونرا گئدیب ‘یوْرو ایکی‌مین‌ایییرمی‌دؤردون’ سینئما یاری‌سی تئلئویزیون‌لاریندا فوتبول فینالینی ایزلرلر!
‘سنی’ سفیل ساخلایان بوتونو، گؤرمزدن گلیب
بوتؤو اولاراق توخ میللتین، میللی روحونو
ناسیل بیربیرلرینه باغلی ییغما اویون‌لاریندا اودوب بیرینجی اولاجاق‌لاری اوچون
مرجله‌شیب، شوْت وئره‌رلر!
آچیقلاما:
-آراکنه(Arakneh): یونان میفولوژی‌سینده هؤرگو ماسالی ایله اونلو لیدی‌یالی قیز. حئکایه‌سی تانری‌لارلا بوْی اولچوشمه‌مه‌یی اؤیوت‌لر و هؤرومچک‌لرین تور هؤرمه بئجه‌ری‌سینی آچیقلار.
-آتئنا(Athena): یونان میفولوژی‌سینده ذکا، استراتئژی، الهام و باریش تانریچاسی. روما میفولوژی‌سینده مینئروا ایله ائشیت قبول ائدیلیر.
-مینئروا(Minevra): روما میفولوژی‌سینده حیکمت، عاغیل، ساواش، صنعت، اوخول و تیجارت تانریچاسی‌دیر.
