چاغیریلمامیش قوناق یانی نه؟ یانی بیری کی یا الله باشین آشاغی سالیب‌دیر‌رولاما بیر ییغیناغا گیره. اونا چاغیریلمامیش قوناق دئیر. مثلا بیر توی وار. سیزی چاغیرماییبلار! سیز دوروب او تویا گئتسز سیزه نه دئیرلر؟ توی یییه‌سی دئیر:
– اده بیز بونو چاغیرمامیشدیق بو نه اوزله دوروب گلیب؟ اوز دؤورکی آیاق داشی‌دیر‌!
بئله لاپ اولا بیلر کی توی یئرینی تای دَییشک سالیب گئده‌سیز. گؤره‌جکسیز هئچ کیم سیزه تانیش گلمیر. آما او ییغیناجاغین ایچینده بیری سیزی تانییاجاق یا نه بیلیم تانیمایاجاق. آما اردبیل کیمین یئرده حتما بیری سیزی تانییاجاق. کئچیب قاباغا سیزه دئیه‌جک:
– وئی سیز ده بوردا سیز؟ کیمین آدامی سیز؟ بَی گیلین آدامی سیز یوخسا گلین گیلین؟
ایندی سیز کیشی مجلسینده اولساز هئچ کیم سیزینله ایشی اولمایاجاق. چون بو اردبیلین کیشی توی مجلیسرینده ایت یییه‌سینی تانیمیر. بَی آدامی دئیه‌جک بو گلین آدامیندان‌دیر‌. گلین آدامی دا دئیه‌جک بو بَی آدامیندان‌دیر‌. دای دئمیرم سیز اؤزوز باشا دوشه‌سیز کی تای دَییشک گلیب سیز. اوندا تئز دوروب پئزینی وئره‌جک‌سیز. آما خانیم مجلیسی اولسا، ایش دَییشیلیر. اولا بیلرکی بیر چاغیریلمامیش خانیم گلیب سیزه. دئیه‌جکلر:
– آی خانیم کیمین تویونا گلیب سیز؟
هله کی بیلیندی تای دییشیک گلیبسیز، سیزه دئیه‌جکلر باس بایرا. آخی کیشیلره باخمایین خانیملار مجلیسینده اولان هر کیمین نه‌چی، کیمین آدامی اولدوغونو بیلیرلر. ائله بیل سؤز چوخ اوزاندی. آما سؤزون لاپ چیلخاسی بودورکی اگر بو دونیایا، چاغیریلمامیش بیر قوناق کیمین گلسز اوندا نه اولاجاق؟ او سیرتیق قویرقلو کروموزوملار زنبیل قویمامیش سیره‌یه سوخولسالار نه باش وئره‌جک؟ تای دییشیک گلمه‌یینیزی بیلن کیمی پئزینی وئره بیلَجکسیز؟ یوخسا قولاغیزدان دوتوب دئیه جکلر باس باییرا؟ قالیب هانسی مجلیسه گیرمیش اولاسیز، هه؟ هل البت بیر ایش ده وار! بلکه بیری بئله بیر چاغیریلمامیش قوناق اولماغیزا قاهمار چیخا. مثلا اؤز بیبیزکیمی! اوندا داها مجلیس یییه‌لری سیزی قووالایا بیلمه‌یه‌جکلر. سیز نئجه؟ مجلیس دن قاچا بیله جکسیز؟
بو مجلیسه گلمه‌یین مین یولو وارسا، بو مجلیسدن قاچماغا بیر یول وار. اونا اؤلوم دئییرلر! او دا هر اوغولون ایشی دئییل…
ائله بیل گینه چوخ دانیشدیم. من بوردا سیزه باش آغری وئرمک ایسته‌میرم، تکجه دانیشماق ایسته‌دیم. آما منیم بو سؤزلریمی غربته سالمایین. هل البت سیزه چوخ ایپ اوجو وئردیم و سیز ده حتما کله‌فه‌نی چؤزوبسوز!
من الان نه اوچون بونلاری یازیرام، داها دوغروسو بیلمیرم. بلکه ده ایستیرم بیر یئنی اؤیکو یازام!
آخی بئله ده بیر اؤیکو اولار؟ اؤیکونون اؤزونه گؤره بیر عادتی وار، یاساسی وار. انیشی، یوقوشو، نه بیلیم پلاتی وار. بو اؤیکو اولسا و اگر اونو تزه میدانا آتساز هئچ کیم گؤتورمز. آما اؤز آرامیزدی بئله لاپ چیخوفون دا اؤیکوسونو تزه میدانا آتساز هئچ کیم گؤتورمز. آخی تزه مئیدانین اؤزوندن اؤیکو یازانلار چیخیر. آنجاق منجه اؤز بئیینلرینده یازیرلار. هر نه دئسن اوردا وار. مثلا فولکلور! بالیق ساتان دئییر:
– گؤرنه قشنگ بالیقسان.
میوه ساتان دئییر:
– گلین آلین مندن قوی آل وئر اولسون منیم جیبیم بول اولسون.
آما منیم قولاغیم هامیدان چوخ او داشقادا میوه ساتانین سسین ائشیدیر. نئچه کیلو میوه‌سیندن قالیب. اونلاری دا ساتسا گئده‌جک ائولرینه. قیشقیریر:
– آی منی آزاد ائله‌ین! آی منی آزاد ائله‌ین!
بو چاغیریلمامیش قوناقلارین بیری دئییردی:
– قاپی دؤیولدو. قاچدیم قاپینی آچدیم. عمی اوغلو قاپیدا ایدی(عمی اوغلو دئییبن آتا ننه‌مین باجیسی اریندن دانیشیردی). بیردن بیر گؤرونتو گؤردوم. بیر ماشین عمی اوغلونون اوغلونو باسلادی. من عمی اوغلونون اوغلانلارینین آدینی یاخشی آییرد ائله‌یه بیلمیردیم. ائله دیلیمه گلیب دئدیم:
– رسولو ماشین باسلادی.
عمی اوغلونون رنگی روفو آغاریب، ائله اوردان قاییدیب گئتدی. نه واختدان نه واختا گلیب خان ننمله آتام گیله هرنه‌یی دئدی. رسول ساغ ایدی. اونا گؤره منیم آدیمی یالانچی قویدولار. بو یالانچیلیغی منه چوخ یاراشدیران قارداشیم‌لا کیچیک عمیم ایدیلر. منه جوره به جوره آد قویوردولار. مثلا کذب، کاذب، استکذاب…
آما بیر ایل اوندان سونرا عمی اوغلونون اوغلونو یانی صاحبی، ماشین باسلادی. یازیق شیل کوت اولموشدو. آما هئچ کیم منیم سؤزومو خاطیرلامادی. من گؤردویومو دئمیشیدیم. هئچ کیم ده سوروشمادی کی آی بالا نییه بو سؤزو دئمیشیدن؟
***
او بیری چاغیریلمامیش قوناق بئله دئییردی:
– قیش گئجه‌لری اودون پیچیمیز یاناندا (او قورتوم قورتوم نؤووت ایچن پیچی دئییرم) او قیرمیزی مینجیقلار دال با دال دوزولوب چیققیلدایا چیققیلدایا گؤیده اوچوردولار. هر کیمدن سوروشدوم دوداغینی بوزوردو. هئچ کیم بئله بیر شئی گؤرمه میشدی به من نییه گؤروردوم؟
***
بیر گون بو چاغیریلمامیش قوناقلارین بیری، دوستونون ب- ام – و ماشینینا مینیب او بیری دوستلاریلا گئدیر آستارایا. قاییدیش باشی، ب- ام- و نین شوفری، ماشینی دایامیشمیش بیر بؤیوک ماشینین آرخاسینا کی اونو اؤتسون. ائله اوندا بو چاغیریلمامیش قوناق بیردن قیشقیریر:
– تورموز ائله.
شوفر آیاغینی تورموزا باسینجا، بؤیوک ماشین دا تورموز ائله‌ییر. تئز تورموز ائله‌مه‌سه ایدیک …
***
نئچه دقیقه‌دی بو قاباغیمداکی آداملا یولا کؤرپو سالمیشیق. دئییر:
– زهلم گئدیر بوتون بو آدام لاردان. والله منیم الیمده اولسا هامیسینی یوخ ائله‌رم.
دئییرم:
– نییه بئله آجیقلی سان بو جماعتدن؟
دئییر:
– قیش گئجه سی قاتیق آلیب دورموشدوم تاکسی یا. هاردا؟ مجسمه‌ده. بیردن بیری گلیب الیمده کی قاتیغا بیر دنه ووردو. قاتیق بوتون پالتاریمی بولادی. آدامین اوزونه باخیب گؤردوم زیر دلی‌دیر‌. مجسمه‌نین تینینده بیر رنگ ساتان وار ایدی. قاچیب گیردیم اونون توکانینا. دئدیم کی گؤردوز او گئده نه ایش گؤردوی؟ منه شاهد کئچرسیز؟
بیر ده گؤردوم منه باخیب گولورلر. اونلارین بیری دئدی کی به سن اونا بیر شئی دئمه‌دین؟ بیر دنه قویوردون قولاغینین دیبیندن دای. ائله اوندا دؤنوب توکاندان چیخدیم آخی من عؤمرومده بیریله ساواشمامیشام کی!
***
صاباحیسی گینه او حیرصلی آدامی اوتوبوسدا گؤردوم. اؤزومو اونا ساری وئریب دئدیم:
– نئجه سن آی کیشی گینه حیرصلی باخیرسان هر یئره گینه ایسته‌ییرسن دونیا چؤیرولسون بو آداملارین باشینا؟
– هه ایستیرم لاپ بئله دارماداغین اولسون.
– گینه نه اولدی آی کیشی؟
– نه اولاجاق باشیما گلنلره فیکیرله‌شیرم. بیلیرسن من تبریز دانیشگاهیندا درس اوخوموشام. چوخدان ایدی الـله‌شیردیم یاخشی شعر یازام.
– بو شعر هوسی سنده هاردان یارانمیشدی؟
– من ریاضی اوخویوردوم. بیر گون میرزه علی اکبر صابیرین هوپ هوپ نامه سیندن اوخودوم. او قدر وورولدوم کی گل گؤهره‌سن خصوصا او شعری وار ها دئییر، اؤتوشدن چیخان بیر جماعت گلیر،/ ائدیب جمله اقوامه سبقت گلیر،/ وئریب هر کیمه درس عبرت گلیر،/ قاچ اوغلان قاچ آت باسدی ملت گلیر. بیرده کی آتام حیدربابانین شعرینی اوخویوردو. او زاماندان سونرا او قدر شعر یازدیم کی گل گؤره‌سن، آما باکیلی‌لار دئمیشگن آلینمیردی. لاچین اشغال اولان گون اوره‌ییمدن بیر شعر گلدی، قوشما یازدیم. یازیقلیقدان ائوده ده هئچ کیم یوخ ایدی کی شعریمی اونا اوخویام. آما من ائله قیمسانمیشدیم کی گرک شعریمی بیرینه اوخویوردوم. دوروب گئتدیم دانیشگاها. شانسدان بیر خیل باکیلی گلمیشدی دانیشگاها. اؤزومو ساخلایا بیلمه‌دیم. شعریمی اونلارا اوخودوم. اونلار شعریمدن چوخ خوشلاری گلدی. دئدیلرکی باخ گؤر دیل بوتایدا نه ساغلام قالیب. اوکی وار بویوما اوخشادیلار. اونلار اویانا منی توتوب آپاریب سوخدولار بیر اوتاغا. دئدیلر لاچینین، قاراباغین بیزه نه داخلی وار؟ منه بیر گلیش گلدیلر کی فیکر ائدیرم کیشیلیکدن دوشدوم. آخی من بیر قورخاق آدامام. منه بیر آش پیشیردیلر کی ایگیرمی ایل دادی آغزیمدان گئتمه‌دی. من ده داها سوسدوم. شعر زاد یازمادیم. ایندی او ایره‌لی گؤردوم کی دئییلر، اورالار اسلام توپراغی‌دیر‌. هر کیم اورادا اؤلسه شهیددیر. ایندی کی اورانین بیزه داخلی وار به ایگیرمی ایل بوندان قاباق منی اؤجور قوپالاماغا گؤتورمکلری نه ایدی؟ تزه آییلیبلار کی اورا مسلمانلارین توپراغی‌دیر‌؟
من چوخ قورخاق بیر آدامام. بو ایگیرمی ایل چکدیگیم قورخونون گوناهی کیمین بوینونادیر؟ او خه‌دیم منی قورخوتموشدولار کی ائوله‌نندن سونرا دا ائولندیگیدن پئشمان اولموشدوم. اویان بویاندان ائشیتدیکلریمه گؤره لاپ بئله ناموسومدان قورخوردوم. آخی هئچ کیم منله آیدین دانیشمیردی. قورخوردم منه گؤره خانیمیما ساتاشالار.
– نییه بئله قورخوردون؟
– اون بئش یاشیندا اولان قارداشیما بیر نئچه کاغاذ پارا اوستونده اوچ ایل زیندان وئرمکلری یادیمد ایدی. آتامین دیغلاماغی یادیمدا ایدی، بو گئده‌کی آدینی اصلاح طلب قویمدوشدو او کئچلی دئییرم، دئییردی دوستلاقلارین آروادینا توخانیرلار. اوندان قورخوردوم…
بیردن بؤیروموزده اولان بیری دئدی:
– آی بالا نه‌خه‌دیم دانشیرسیز. ماشاالله سؤز آغزیردان گاللاه گلیر.
دئدیم:- عمی نه دئییرسن؟
دئدی:
– سیز منی باشا سالین. پوتون گئییب گئدیرم چؤله. آیاغیمین له‌پیری چوخ بؤیوک اولور. دؤرد ایت آیاغینین له‌پیری بویدا، اوچ قوردون آیاغینین له‌پیری بویدا. آما هر ایکیسی ده جییر ائله‌ییب منه جومورلار. و حال عنده‌کی آیینین آیاق له‌پیرینی گؤره‌نده اونا هئچ جوممورلار. نییه؟ بیزسوسدوق..
***
داها اوندان سونرا او کیشینی اوتوبوسدا گؤرمه‌دیم. بیر گون آلاقاپی مچیدینین قیراغیندان سووشاندا اعلامیه‌سینی گؤردوم. یازیق کیشی چیخمیشدی تیره. دئییردیلر اونو کورونا اؤلدوروب آما من باشا دوشدوم هرنه‌یی. آخی یوخوما گلمیشدی منه دئدی کی، من دیغلادیم سیز ساغ اولون.
دوستلاریمین بیرینی گؤردوم… اسه اسه زنگ ووروردو. تلفن آچیلینجا دئدیم:
– کیمه زنگ ائله‌ییرسن؟
– داییما
– دایینا نه گلیب کی بئله قارا قاییت داسان؟
***
– الو سلام دایی سن سن؟
– هه
– یوخو دا سنی گؤروردوم. گؤردوم یامان مریض اولوبسان. سن آللاه بیر شئی وار؟
تلفونون او بیری طرفیندن گلن سسی ائشیدیردیم کی دئییر، آی باجی اوغلی، ماشاالله ساغام، یئتمیشدن چوخ یاشیم وار. هر گون سحر ساعات بئشده دوروب گئدیب شورابیلی دولانیرام. قورخما هئچ زادیم یوخدی.
دئدیم:
– آی دوست نییه دایینی بئله قارا قاییت دا قویدون؟
***
ئئچه آی لار سووشدو. کورونا آدینلی مریضچیلیک گلدی. همان دوستومو گؤردوم. قان تر ایچینده ایدی. دئدیم کی نه اولوب. دئدی:
– داییم کورونا توتوب.
– هارا گئدیرسن؟
– اونلارین ائوینه!
– به سن ده توتارسان آخی.
– یوخ، من گئتمه‌سم داییم اؤلر.
بونو دئییب چیخیب گئتدی. نئچه واخت دان سونرا ائشیتدیم کی داییسی‌دیر‌ی قالیب.
***
-نه دی بئله حیرصلیسن؟
– سنه نه؟
– منه هئچ داخلی یوخدی. اما منه دئسن بلکه بیر آز یونگوللشدین.
– من بیر مهندیسم. بیر ساختمان یییه‌سی خلاف ائله میشدی قونشوسودا شکایت ائله‌میشدی. من اونون پایان‌کارینین تصدیقین ایمضالامادیم. نه‌خه‌دیم دئدیلر امضالامادیم. بیر آخشام یاخین دوستلاریمین بیری منه زنگ ووروب دئدی کی امنیت دئییرکی او بینانین تصدیقی امضالانسین. دئدیم کی من امنیتله ایشله‌میرم گئتسینلر مهندیسلر نظامینا دئسینلر.
دئدی:
– سفئی اولما ایندی امنیتدن سنه زنگ ووراجاقلار. من تلفونو باسیب کسدیم سسینی. بیر آزدان بیر اَیبه‌جر شماره دوشدو تلفونوما؛ توکلریم بیز بیز دوردو. آخی من قورخاغام. تئز دوستوما زنگ ائلهدیم. دئدی گل زینال تینینه. گئدیب اونو میندیردیم. اؤنجه بیر کولت گؤرستدی منه. تئز کاغاذلاری آلیب امضالاییب مؤهورله‌دیم…
اوندان نئچه گون سونرا مهندسی نظام دان منه زنگ ائله‌ییب دئدیلر:
– بو نقشه دن پولونو آلیبسان ؟
دئدیم:
– یوخ.
دئدیلر:
– ائو یییه‌سی بیر بلگه وئریب کی پولونو آلمیسان. بلگه‌ده امضان دا وار…
دوست لاریمین بیرینی گؤتوروب گئتدیم. ائو یییه‌سی اصل بلگه‌نی قویدو قاباغیما. امضا جعل ایدی. دئدیم :
– بو نه دی؟
دئدی:
– دوستون منه دئدی کی سن نقشه‌نی امضالاماغا رشوت آلیبسان و بو بلگه سی‌دیر‌.
دوستوما زنگ ووردوم آغزیما گلنی دئدیم:
– نئجه جرات ائله ییرسنکی منیم طرفیمدن رشوت آلیب امضا دا وورورسان؟
دئدی:
– گلیب سنی اَزَرم
من ده قورخاق. آما قورخماقدان چوخ اوتاندیم داها دوغروسو. اوزاماندان سونرا بیری اینترنت ده منله بحث ائله‌ینده دئییرم:
– گلیب سنی ازهرَم.
یامانلاییرام. بودا منه ایش آچیر.
– به سن نه دن ناراحات سان؟
– هئچ واخت یادیمدان چیخمیر
– نمنه؟
– تهراندا، قصر زیندانینین پارکیندا اوتورموشدوم اؤزوم ده افسر وظیفه ایدیم. بیردن بیر جاوان اوغلان هورکموش آت کیمین گلیب منه دئدی:
– دور قاچ. کمیته گلیر.
من اؤز اؤزومه دئدیم. من بیر افسرم. کیم منه بیر سؤز دئه بیلر. بیرده گؤردوم اوزاقدان بیر دسته کمیته یا تزه دیلده نیروی انتظامی گلیر. بیر سیقار چیخاردیب آلیشدیردیم. دسته منه یئتیشن کیمین قولومدان یاپیشیب منی آتدیلار پارکین اورتاسینا. دیبیرلاندیم. دوروب تورکو دیلده دئدیم:
– اَده هوزی من ده نیظامییم. سن قوروهبان‌سان من ستوانام.
دئدی:
– بونودا آپارین میندیرین ماشینا من فقط باشاردیم کی ستوانلیق کارتیمی چیخاردام کارتیمی آلیب باخیب اوندان کارتی چیرپدی اوزومه.
دئدی:
– دور جهنم اول بوردان.
دئدیم:
– هر پوخ یئییرسن یئ.
دوشدولر جانیما. من ده ساغ باشیمی گؤتوروب قاچدیم…
***
بیر گون او کمیته مامورونو گؤردوم. دالیجا گئتدیم.
بیر یئرده حامامین پوخ قویوسونو بوشالدیردیلار و بو مامور قویویا باخیردی. بو دؤنه قورخمادیم. قاباغا گئدیب اونا بیر تیمبا ووردوم. دوشدو پوخ قویوسونا. من ده یامان کئف ائلهدیم.
***
گینه اوتوبوسدا همان حیرصلی آدامی گؤردوم. آغزیمی آچینجا دئدی:
– بیر گون دانیشگاهدا ریاضی اوستادی درس وئریردی. ذهنیمه بیر سورقوش گلدی. الـلشدیم او سورقوشو فارسی دیلینده سوروشام آما قوراشدیرا بیلمه‌دیم. اودور تورکو دیلده سوروشدوم.
اوستاد باشا دوشوب منیم سورقوشوما فارس دیلینده دیلمانج اولوب جوابینی دا فارسی دیلده وئردی. فارس همکلاسلاریم دوروب اعتراض ائله دیلر کی بو نییه تورکو دانیشیر. منی یاش یوووب قورو سردیلر. اللریمی قولاغیما قویدوم. دوروب کیلاسدان چیخیب کئچدیم سئلف سرویسه. هر یئر دولو ایدی. بیر دؤرد آداملیق یئمک میزینده بیر نفره یئر وار ایدی. اونلار فارس ایدیلار. فارسجا اونلاردان سوروشدوم کی بو یئرده اوتورا بیله‌رم؟ اونلار منیم تورکو لهجه‌می ساریییب دویونجا گولدولر. قانیم جوشدو. آما حراست و او شعر مسئله‌سی یادیما دوشونجک بیر سؤز دئمه‌دیم. گئدیب سئلف سرویس نگهبانینا هر نه یی دئدیم. دئدی:
– به نییه جوابلارین وئرمه‌دین؟
– حراست دن قورخدوم.
او منی گؤتوروب گتیردی میز باشینا آما اونلار گئتمیشدیلر. نگهبانین رنگی سارالدی. هه اونلار پئزینی وئرمیشدیلر آما من نئچه آی اؤز ایچیمی یئدیم کی نییه اونلارا جواب وئرمه‌میشم؟ آخی ایسته‌سَیدم جواب وئرم اونلار گینه منی سارایاجاقدیلار. اوندان داعوا دوشه‌جکدی. دئین یوخ ایدی کی بیرین ووروب ایکیسین یئییردین دا؟ به نییه دبرمه‌دین؟ آما حراستین منطقی یادیما دوشوردو. اونلار منه پان تورکیست دئیه‌جکدیلر…
***
بئله بئله چاغیریلمامیش قوناقلاری تانیماقدا بیلنده اولدوم. ائله اوتوبوسدا هرکیمی گؤروردوم کی بوغونو چئینه‌ییر یوخسا حیرصلی حیرصلی باخیر گؤیده ووروردوم کی بو بیر یئردن یارالی‌دیر‌.
***
بیرداها اتوبوسا میننده همان حیرصلی آدامی گؤردوم. بو دؤنو گؤردوم بوغلاری گولور. دئدیم:
– گون هایاندان چیخیب کی بوغلارین گولور؟
– سوروشما. آخیر ایشیمی گؤردوم.
– نه ایشی
– داها بو دؤنه اودمادیم. قوی اولدن دئییم. بیر اونله شیرکت ده امتحان وئرمیشدیم. علمی روتبه‌نین بیرینجی یئرینی قازاندیم. آما داها خبر اولمادی. بیر آی، ایکی آی کئچدی، خبر اولمادی. گئتدیم شرکته. هر نه‌یی دئیینجک منه دئدیلر کی سنین یئرینه آدام سئچیلیب. ائله بیل دونیانی ییخدیلار باشیما. دئدیم کی نییه؟ دئدیلر سن مصاحیبه‌یه گئتمه‌ییبسن. اودور یئرینه آلاهی آدامی سئچیبلر. دئدیم:
– کیم منی مصاحیبه‌یه چاغیریب کی من گئتمه‌میشم؟
دئدیلر:
– بیز بیلمیریک گئت تهراندا دانیش!
یوللانیب گئتدیم تهرانا. او آدام کی ایش الینده ایدی دئدی:
– چاغیریبلار گلمه‌ییبسن!
– منه بلگه گؤرست؟
– پوست ائله‌یه‌جه‌ییک!
اردبیلده گلیب آختاریشدیم. بعلی، باشی اتلی آداملارین بیرینین اوغلونو منیم یئریمه سالمیشدیلار.
گئدیب یاخیندان اونو سوزدوم. اونا بیر ائو بیر ده اوجا شاسیلی ماشین وئرمیشدیلر. آلدیغی آیلیق منیم اون آییمین حقوقو ایدی. ائله او گونلر نامه تهراندان یئتیشدی. بئله یازمیشدی:
– آی فیلانی کتبی امتحان جلسه‌سینده مصاحیبه تاریخی دئییلمیشدی و بو نا گؤره سنین هئچ حقین یوخدی.
دؤزه بیلمه‌دیم. دوروب گئتدیم تهرانا. اویانا بویانا، هئچ کیم منی آدام یئرینه قویمادی. اوره‌ییم دوروردو. اؤزو ده او زامان ائوده اولان گرگینلیکلره گؤره منه تزه و یاخشی ایش گرک ایدی. اول ایسته‌دیم اؤزومو قورتارام. آما ائله بیل آتالاریمین روحو منه دور دئدیلر. بیر اولگوج، بیر بالتا، بیر ده قیی گؤتوروب گئتدیم. یاخشی بیلگیلر آلمیشدیم. او تهرانلی یاخشی پول آلیب بیرینی منیم یئریمه سوخموشدو. گل گئت یئرینی تاپدیم. آخشامین قارانلیغیندا اونو کیرتیمه سالیب دئدیم:
– باغیشلا رئیس منیم بیر سؤزوم وار.
– نه سؤزون وار؟
– اداری ایشیم وار.
– اداری ایش اداره‌ده اولار. صاباح گلرسن اداره‌ده دانیشاریق.
باشیمدا کی بؤرکو چیخاردیب دئدیم:
– منی تانیدین؟
– یوخ!
– من همانام کی منیم یئریمه آلاهیسین سوخوبسان ایشه!
منی تانیدی. دئدی:
– سنه نامه گؤندردیک!
– اوندا دای ایشیمیز اداری دؤوور! ایشیمیز شخصی‌دیر‌.
بالتامی چیخارتدیم. او الیمده بالتانی گؤرونجک اوز قویدو قاچماغا. بالتانی چیرپدیم ساغ آیاغینین توپوغونا. ییخیلیب باشلادی زاریلداماغا:
– سن الله منن ایشین اولماسین!
– نقدر پول آلیب منیم یئریمه آلاهیسین سوخوبسان؟
– من قانونی ایشیمی گؤرموشم.
بالتانی قالخیزیب ووردوم سول قیچینین دیزینه. جییردن قیشقیردی. دئدیم :
– قیشقیرماقدان بیر شئی چیخماز. دئنن نه‌خه‌دیم آلیبسان قوی بو واکمنه ضبط اولسون.
– هئچ زاد، هئچ زاد…
بو دؤنه بالتانی قالخیزیب ووروب ساغ آیاغینین بارماقلارینی قیردیم. ساغ الینی منه آتدی. بالتانی ائله ووردوم کی ساغ الینین سوموگونون سینماق سسی گلدی. سول الینی‌دیر‌ه‌دی یئره. بالتانی قویدوم بارماقلارینین اوستونه. دئدی:
– دایان، دایان. یوز میلیون پول آلمیشام.
آیاغیمی بالتانین آیاق توتان یئرینه قویوب باسدیم. دؤرد بارماغی اوزولوب یئره دوشدو. دئدیم:
– دوزون دئنن.
آغلایا آغلایا دئدی:
– اوچ یوز میلیون تمام.
– بیلیرسن سنی نئیله‌یه‌جهیم؟
– آی دیوس سنی توتاجاقلار!
– هه منی توتوب فقط دارا چکه‌جکلر. آما سن هله عذاب چکه‌جکسن. چون منه بوندان پیس عذاب وئریبسن.
اوندان اولگوجو چیخاردیب ساغ گؤزونون گؤز قاپاغینی دیقتله کسدیم. بیر گؤزو آچیق قالدی. قییناغی دا سوخوب اوبیریسی گؤزونو چیخارتدیم. اوندان اونو ائله قویوب اکیلدیم. …..
***
او کیشینین سؤزلرینه آوارا قالدیم. دئدیم:
– سن نه وای قیل سیز آدام ایمیشسان؟
– سنین قورخاقلیغین منی بو گونه سالدی!
ائله اوندا نئچه مامور ایچه‌رییه گیریب منه توپانچا توتوب دئدیلر:
– ترپشمه!
– من دؤوورم، بو قاباغیمدا کی‌دیر‌.
من ائوین سئرویسینده ایدیم. قاباغیما باخینجا سئرویسین آیناسیندا اؤزومو گؤردوم.
1-۹-۹۹ – ۲۵-۱-۱۴۰۰