آندرومدا / رقیه کبیری
چئویرن: رقیه کبیری
ترجمه: رقیه کبیری
رقیه کبیری
00:00
00:00

آندرومدا
رقیه کبیری

آندرومدانین أَل چکن گونو یوخدور. آدینی ائشیدیب، اونون باره‌سینده اوخویاندان بری بیر آن بئله فیکریمدن چیخمیر. هردن بیر بئینیمین اوست قاتلاریندا بورولغان کیمی بورولوب، آز قالیر منی اورتاسینا چکسین. بئلنچی واختلار ذهنیمین گوجو چاتمیر اونون چئوره‌سینده‌کی زنجیری قیریب، اونو گؤیدن یئره گتیریم، یا دا قالخیب، یئرده نه وارسا، گؤیه تیکیب، اونون زنجیرینی قیریم. آنباشی آندرومدانین چئوره‌سینه دولاشمیش زنجیرین سسینی ائشیدن کیمی اولورام. ائوده، خیاباندا، هر هاردا کی خانیمالارا حاقسیزلیق اولور، او زنجیر قولاغیمدا سسله‌نیر. تاکسی‌دا کناریمدا اوتوران بیر کیشی‌نین قوْلو بؤیرومه سورتوشوب، سس‌سیزجه قیراغا چکیلیب، کیفیمی اورتایا قویاندا منه ائله گلیر کی آندرومدایا تای زنجیرلنمیشم. حتی بیر گون خیابانین اورتاسیندا، یئل چرقدیمی باشیمدان گؤتورنده، یولدان کئچن‌لر دؤنوب، ترسه- ترسه باخاندا، کناریمدان گئچن بیر خانیم تلم تله‌سیک مندن اؤنجه أل اوزالدیب، چرقدیمی باشیما چکنده منه ائله گلدی کی او خانیم آندرومدانین پاسلانمیش زنجیرینه زوُمباتا چکیب، یاغلادی.
آندرومدا نه کابوس کیمی‌دیر، نه ده رؤیا. او، قونشو کهکشانین ان گؤزل وارلیغی‌دیر، بیزیم میفولوژی‌یه گؤره او زنجیرلنمیش بیر قادین سیمبولودور. منسه گؤرونمز زنجیرلرین آراسیندا یاشایان سود یولونون عادی بیر یارانیشی‌یام. من آیاقلاریمین اوستونده آددیم آتا بیلیرم، اویسا، آیاقلاری ‌دا أللری کیمی قونشو کهکشا‌نین قایالارینا زنجیرله‌نیب.
اونو یاخیندان گؤرمه‌یه تله‌سیرم. زنجیرلنسه‌ ‌ده، گؤردویوم شکیل‌لرده گؤی اوزونون پارلاق بیر وارلیغی‌ کیمی گؤرونور. بو گئجه جوان منجیم‌لرله آیاقلاشماغیمین أن بؤیوک سببی آندرومدانی گؤرمک‌دیر.
قاش قارالیبدیر. یئره باخان یوخدور، جوان منجیم‌لرین هامیسی‌نین گؤزلری گؤی اوزونه ساری‌دیر. بیر نئچه‌سی تلسکوپ‌لارین گؤزلوک‌لریندن گؤیو نیشان توتوب، اولدوزلاری سئیر ائدیرلر، تلسکوپدان کاسیب اولان منجیم‌لر ایسه، أللرینده لئیرز، گؤی اوزونده‌کی توپال اولدوزلاری نیشان آلیب، اونلاری بیر- بیرلرینه گؤستریرلر.
– «باخین! او اوش دَنه اولدوزو گؤرورسوز بیر خط‌ده..؟»
من ده اونلارا قاریشیب، گؤیده لئیزرین نیشان توتدوغو نقطه‌یه زیلله‌نیرم. بیر قاریش بویوندا بیر- بیریندن آرالی دوزولموش اولدوزلاری گؤرورم. لئیزر اورتاداکی اولدوزدان آشاغی سوزولور. گؤزلریم گؤی اوزونون عقرب بویدا بیر نقطه‌سینی فتح ائتدییی اوچون سئوینجک دوشورم. عقربین قویرغونو بئله سئچه بیلیرم. بونونلا بئله آندرومدا عاغلیمدان چیخمیر. اونو گؤرمه‌یه تله‌سیرم.
– «آندرومدا عَغربه یاخین‌دی؟»
جوان منجیم تبسـّوم ائدیر. بیلمیرم اونون تبسّومو ریشخند‌ معناسیندا‌دیر یوخسا بیلیم‌سیزلی‌ییمه مرحمت‌له یاناشیر. گوله گوله دئییر: «یوووو… ایکی چوچه عغربدن اویانلیخدی».
– «گلین باخین! زحل-ی توتموشام». منی چاغیران منجیمه ساری گئدیرم. بیر نئچه آغ تلسکوپون ایچینده، اونون تلسکوپونون قارا رنگی دیقّتیمی چکیر، اوسته‌لیک اونون تلسکوپونون قوشا گؤزلویو وار. تلسکوپون قوْشا گؤزلوک‌لریندن گؤرونن گؤیه باخیرام. پارلاق بیر حالقانین ایچینده کیچیک بیر مونجوق گؤرورنور.
– «باخین! سوْل ألده‌کی اولدوز تیتان‌دی.»
دئییرم: «یونان میفولوژیسینده گؤی تانریسی‌ینان یئر تانریسی‌نین اوشاقلاریدیر تیتان‌لار.»
نه دئدییمی باشا دوشمه‌میش کیمی اوزومه باخیب آتیریر: «دئیریم یانی سول ألده بیر قمر وار، زحل- ین قمرلریندن بیری…»
بیر آن بیر جوت آیری قمر ده گلیب، فیکریمی راحات بوراخمایان آندرومدانین کنارینا تیکیلیر. بیرینجیسی، قمرالملوک وزیری، بو قمردن گؤروب- گؤره‌جه‌ییم یالنیز باشینا نیم‌تاج قویموش‌ بیر شکیل اولموشدور بیر ده آرا سیرا ضبط صوت دا قولاق آسدیغیم کاست‌لره ییغیلمیش سسی. یادیما گلمیر اونون سرگذشتینی هاردا اوخوموشام، آنجاق بو «قمر»ین قمرلیغی عؤمورونون سون چاغلاریندا باشا چاتیب، او ایسه فلاکتده یاشاییب، یالقیزلیقدا اؤلوب. ایکینجی‌ قمر ایسه، قاینی وفات ائدندن سونرا قایین‌خاتینی اونون ائوینه گونو گلدییی گوندن ‌بئله، گونوسونون آزار- اذیت‌لرینی، حیات یولداشی‌نین وفاسیزلیغینی آلین‌یازیسی کیمی قبول ائدن قاین‌آنام‌ ایدی. منه ائله گلیر کی آندرومدا کیمی قوشا قمرلرین ده چئوره‌سینده زنجیرلر وار ایمیش. بیر زامانلار بیرینجی قمر او زنجیرلری قیرا بیلمیشدی آمما ایکینجی قمر اؤز زنجیرلرینین سسینی ائشیتمه‌یه بئله قادیر دئییلمیش. یئنه سوروشورام: «آندرومدانی نه واخ گؤره بیله‌ریخ؟»
باشقا بیر منجیم قووّه چیراغینی یاندیریب، ألینده‌کی کیتابا باخیر: «شب ۲۵ تیرماه… آندرومدا گئجه ساعات ایکی‌دن اوْ یانا یاخچی گؤروشر.»
ساعاتیما باخیرام. اون‌ایکینی سوْووشوب. بیره بیر شئی قالمیر. منسه هئچ عقربه‌لرین بیر- بیری‌نین اوستوندن سویروشدوغونو ملتفت اولمامیشام. ایکی گؤزلو تلسکوپون صاحابی اولان منجیم گؤزلوک‌لردن باخاراق دانیشیر: «شاید آی‌ین ایشغی مانع اوْلا… آمما توتسام سیزی چاغیرارام».
یئنه گؤیه گؤز تیکیرم. آی‌ شئیطان شاپالاغی‌دیر دئیه‌سن. تؤوه‌ره بوْی بوخونویلا گؤیون اورتاسیندا دایانیب. گونشدن چالیب- چاپدیغی ایشیغی قارانلیقدا ائله پای- بؤلوش ائله‌ییر کی، باخان دئییر: «نه گؤیلو- گؤزو توخدی!»
قارانلیق‌ گاه اونو بولودلارین آلتینا چکیر، گاه دا بویوندان توتوب، بولودلارین آلتیندان ائشییه چیخاریر. آی کؤکسوز بیر وارلیق‌ اولدوغوندان قفیل‌دیر. بلکه خبری یوخدور گونشین آلین‌یازیسینا یازیلیبمیش. آی یئر اوزونده هر گون بیر قیلیغا گیریر. بیر گون بیر گؤزلین قاشیندا اوتوروب، اورک‌لر دؤیوندورور. او بیری گون یای کیمی چکیلیب، باشقالاری‌ توشلادیغی مقصده اوخ‌لار بوراخیر. بیر آیری گون آی‌پارا اولوب، دؤولت- میلّت‌لرین بایراغیندا یئلله‌نیر. آنجاق دیش دوراسی دئییل. ساکین‌لشمک اونون ذاتیندا یوخدور. اؤزونو گؤزلره سوخماق اوچون دائم ویرنیخیر. آی‌پارا قیلیغیندان چیخیب، تربیع دوْنونو اَینینه تاخیر. تربیع‌دن تثلیثه ، تثلیثدن بدر قیلیغینا گیریر. یئردن گؤیه باخانلارین قارشیسیندا، اولمایان شیوه‌بازلیقلارا أل ویریر. بونونلا بئله اون دؤرد گئجه‌لی‌یی لاپ زهله‌می آپاریر. گؤی بوْغماسی کیمی قارانلیغین اورتاسیندا دایانیب، اوزونو آندرومدانین اوزنه توتوب، اونون زنجیرلرینی گؤزدن ایتیریر.
– «آندرومدانی توتموشام، گلین باخین»، ایکی گؤزلو تلسکوپون صاحابی دئییر. منسه تلم- تله‌سیک قارا تلسکوپا ساری قاچیرام. دئیه‌سن گؤیده زنجیر قیریرلار، یوبانیرسام تاماشانی ألدن وئره‌جاغام.
گؤزومو تلسکوپون گؤزلوک‌لرینه تیکیرم. گؤزلویون ایچینده بیر ایکی پارلاق اولدوزدان باشقا آیری بیر شئی گؤرونمور. دقت ایله باخیرام. نه‌قدر باخسام دا زنجیرلنمیش خانیمدان هئچ بیر ایز- توْز گؤرونمور.
– «من گؤرمورم آندرومدانی»، دئییرم. منجیم تلسکوپون گؤزلویوندن باخیب دئییر: «بودو بوردا با… بیر ده باخساز گؤررسیز. اورتادادی… بولود کیمی‌دی… لاپ ائله مرکزده.»
بیر دفه ‌ده باخیرام. گؤیون اورتاسیندا رنگی قاچمیش بورولغان بیر بولود گؤرورم. بیر آن باشا دوشورم کی آندرومدا دئدی‌یین، بیزلرین أل- آیاغینا دولاشمیش گؤرونمز زنجیرلر کیمی‌دیر، آیدین- آشکار گؤزه گؤرونمز. آندرومدا بوْزارمیش بولود پارچاسی‌دیر گؤیون قارانلیغیندا…

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

اوخوماق زامانی: 3 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

آندرومدا / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی

آندرومدا / رقیه کبیری

رقیه کبیری
www.ishiq.net

آذربایجان ادبیات و اینجه‌صنعت سایتی