بیزی گؤزله‌میر آنی‌لار
بو آخشام یئنه ایچیمده حوزون وار، گؤزومده جانلانیر آنی‌لار. آنی‌لار، اونودولماز آنی‌لار!
ایکی ساعاتدان آرتیق‌دیر، یازماق اوچون بالکوندا، لپ‌تاب اؤنونده اوتورسام دا، میز اوزه‌رینه دیرسکله‌نیب، اؤزومو تبریزین کؤنول آچان یئلینه بوراخیب، خویدان گئری دؤندویون گونو دوشونورکن او گونلرین صاف‌لیق و صداقتینی اؤزله‌ییب، دفعه‌لرجه دوداغیما حوزونلو بیرتبسم قوندو. آرخاداش، دورّ ایله اینجی[۱]، یالنیز صدف‌لرین ایچینده اولماز، صاف‌لیق ایله صداقت ده انسانین دورّ ایله اینجیسی‌دیر.
زامان آخیمی‌نین ان آجی طرفی‌نین نه اولدوغونو بیلرسن می؟ زمان آخیمیندا انسان دوغرو و یالنیش‌لاریندان درس آلیب، عاغیللاندیقجا، انسانین صداقت و صاف‌لیغینین اوزه‌رینه قالاق-قالاق زامان توزو قونور و چوخ واخت صداقت ایله صاف‌لیق او قالاق‌لارین آغیرلیغی آلتیندا گؤمولور. او گونلر بیزیم صداقتیمیزین اوزه‌رینه بیر ذره بئله توز قونمامیشدی.
بو آن اوتوز سکگیز ایل اؤنجه، سنین بیزیم ائوه ائلچی گئتدییین گونو دوشوننده ساتیریک فیلم‌لرین خوش‌قلب، اؤز‌گوونلی و صداقتلی کاراکترلری عاغلیما گلیب، دوداغیما گولومسه اوتورور.
اوتوز سکگیز ایل اؤنجه، سن سولچو بیر سازمانین سمپاتی اولاراق، اؤزوندن بیر یاش بؤیوک یولداشین ایله بیرلیکده خوی کیمی سنت ایله دب‌لره باغلی، دیندار بیر عایله‌نین قیزینا ائلچی گئتمه‌یین، حقیقتا ده کمال سونال‌ین فیلم‌لریندن قالیجی دئییل دئیه دوشونورم. یولداشین آغ‌ساققال کیمی سنین‌له ائلچی‌لییه گلسه ده، او آغ‌ساققالین بیر کلمه بئله دانیشماغینا مجال وئرمه‌میشدین. سن هئچ زامان سؤزده قالان دئییلدین، او گون ایسه یئنه ده اؤزون سؤز دییرمانینی اویوتمه‌یه باشلامیشدین. آز دانیشاسان دئیه، آغ‌ساققال یولداشی‌نین سنی دومسوکله‌دیینی بئله سایمادان، بیر باشا دانیشمیشدین. آنام «نظامی آداملا ائولندیره‌جک قیزیمیز یوخدور، هاندا قالسین او نظامی آدام سرباز اولسون» دئدیینده بئله سؤزدن قالماییب، سبب‌لرینی سوروشموشدون.
دفعه‌لرجه او ائلچی‌لیک ماجراسیندان ساتیریک بیر حیکایه یازماق ایسته‌سم ده، ندنسه اونون کیمی صاف و صداقتلی بیردونیانی یاراتماق اوچون کلمه‌لر عاجیزله‌‌ییب. دونیانین ان پئشه‌کار یازیچیسی اولسان بئله ، یاشادیغین بعضی آنلار قلمه آلینماز حالا گلر، یازا بیلمزسن او آنلاردان.
خویدان گئری گلدییین گونون آخشامی جبهه‌یه دؤنمه‌لی ایدین. باشیمیزا گلن او تعقیب ماجراسیندان بری بیرلیکده خیابانا چیخمیردیق. سنین‌له اورتاق یولداشیمیزین ائوینده گؤروشوب، آنامین وئردییی جوابی منه آنلادیرکن، اومودونو کسمه‌دیینی سؤیله‌دین. او گون وداع‌لاشیب، گئدیرکن سنی یولا سالماق اوچون قاپی‌یا کیمی گلدیم. سن ایسه آددیمینی قاپیدان دیشاری قویوماقدا در حال گئری دؤندون، یاشیل باخیشینی گؤزومه تیکیب، گؤزلمه‌دیییم بیر آندا آلنیمی اؤپوب تله‌سیک دیشاری چیخیب، قاپینی ایشگیله‌دین. من قالدیم بیر ده آلنیمدا بوراخدیغین او ایز.
آرخاداش، بعضی ایزلر گؤزه گؤرونمه‌سه ده، عؤمور بویو سیلینمز قالار.
آلنیما بوراخدیغین او ایزدن سونرا بیزی بازجویی اوتاغیندا قارشیلاشدیردیقلاری گونه کیمی سندن خبر آلا بیلمه‌دیم. من وثیقه ایله بوراخیلدیغیمدان بیر هفته سونرا ایشدن آتیلدیغیمی دوشونسم ده، یئنیدن ایشیمه گئری دؤندوم. من حبسده ایکن بیمارستانین سرپرستاری چالیشقان بیر کارمند اولدوغومدان دولایی منه تشویق یازیب، اوسته‌لیک حبسده اولان گونلری منه استحقاقی مرخصی حسابلامیشدی. بونونلا بئله عایله‌‌م منیم خویا گئری دؤنمه‌ییمه اصرار ائدیردیلر. گونلرین بیرینده ایش یئریمده منی تلفونا چاغیردیلار. سن ایدین. منیم کیمی سنین ده زنداندان بوراخیلدیغینی دوشوندوم. عایله‌مین اصرارینی سنه سؤیله‌ییب، دئدیم: «خویا گئتسم، منی ایسته‌دیکلری ایله ائولندیره‌جک‌لر.»
«روقیه، منی گؤزلمه!»
او گون تلفون الیمده، گؤزومون یاشینی توتا بیلمه‌دیم. او گون اومودونو کسدیینی، و یولداشلیغیمیزین سونا گلدیینی دوشوندوم. هاردان بیلمه‌لی ایدیم سن «روقیه، منی گؤزلمه!» دئدییندن ایکی گون سونرا زندانا گئری قایتاریلیبسان؟ هاردان بیلمه‌لی ایدیم آتانین یاسینا قاتیلماق اوچون سنه بیر-ایکی گونلوک اذن وئریبلر! هاردان بیلمه‌لی ایدیم سن زنداندا نه آغیر گونلر کئچیریبسن؟ او تلفوندان سونرا داها سندن هئچ بیر خبر آلا بیلمه‌دیم. یولداشلاریمیزین بعضی‌سی توتولموشدی و بیزیم ده یوللاریمیز آیریلمیشدی.
گونلرین بیرینده ۱۵ و ۸ یاشلی ائولادلاریملا بیرلیکده کره‌نئی‌خانایا[۲] بیراز قالمیش بازارین قالابالیغیندا بیر آن بیزیم کناریمیزدان کئچدیینی گؤروب، باشدا اؤزومو گؤرمزلییه ویریب، یولوما دوام ائتسم ده بیر ایکی آددیم سونرا پئشمان اولوب، گئری دؤندوم. قالابالیقدا نه قده‌ر گؤزوم آختارسا دا، یئنه سنی ایتیرمیشدیم.
اما آرخاداش، داغ داغا چاتماسا دا، انسان انسانا چاتار، دئییب‌لر آتالاریمیز.
یئددی ایل اؤنجه گونلرین بیرینده سنین آدیندا بیر فیس‌بوک اکانتی آرخاداشلیق گؤندریب، پست‌لاریمی لایک ائله‌دیینی گؤرونجه دئدیم گؤره‌سن بو همان قدیم یولداشدی یوخسا ساده بیر آد اوخشارلیغی‌دیر!
او اکانتی آلت-اوست ائله‌سم ده سندن هئچ بیر ایز یوخ ایدی. پروفایلیندا تورکیه سریالی،«قوردلار وادیسی»نین باش کاراکتری‌نین شکیلی وار ایدی. پایلاشیلان پست‌لار ایسه چوخ عادی و باشقا پئیج‌لردن فوروارد اولونموش پست‌لار ایدی. هر گون فیس‌بوکا باغلاندیغیمدا اسکی پست‌لاریمی لایک ائتدیینی گؤروردوم.گونلرین بیرینده بوتون جسارتیمی توپلاییب سنه یازدیم: «سیز من تاندیغیم انسان‌سیز یوخسا من کیریخیرام؟»
سن ایدین و منیم پئیجیمی اسکی بیر یولداشیوین واسیطه‌سی ایله تاپمیشدین.
آرخاداش، ایندی او گونلری دوشوندویومده اؤزلویومده دئییرم: نه یاخجی کی حیاتیمیزین گئدیشاتی بیزیم ائولنمه‌ییمیزه مانع اولدو. یوخسا آرخاداشلیغیمیزی قورویا بیلمزدیک. منیم کیمی سیاسی دوشونجه اؤنجوللویو ایله ائولی‌لیک حیاتی قوران بیر چوخ دوست- تانیشین یاشاییشلارینا باخدیغیمدا، آرخاداشلیق فاکتورو عرشدن فرشه یئنیب، و ائش‌لرین بیربیرینه قارشی مالکیت حیسی ایسه آرخاداشلیغی آیاق آلتدا ازیب، محو ائدیب.
آرخاداش، بیز و بیزه تایلاری اؤلکه‌میزین معاصیر سیاسی-اجتماعی تاریخی‌نین گؤزه گؤرونمز بیر ذره‌سی ساییلساق دا، بدلی اولمایان آجی‌لار یاشادیق، جوانلیغیمیزدا جوانلیق ائتمه‌یی اؤزوموزدن اسیرگه‌دیک. تشکیلات طرفیندن تعریف اولموش قالیبلارا گیردیک، سئوگی‌لریمیز حسرته، نیسگیله چئویریلدی، بونونلا بئله بیز ۳۳ ایلدن سونرا فیس‌بوک سایه‌سینده یئنیدن قارشیلاشدیغیمیزدا کئچمیشده یاشادیقلاریمیزا سایقی دویوب، درس آلاراق، سیاسی دوشونجه‌لردن اوزاق، کؤکو کئچمیش گونلرده‌کی صداقته دایانان درین، اؤن یارغی‌دان کنار، سورونلاریمیزی، دوغرولار و یالنیش‌لاریمیزی و گونده‌لیک حیاتیمیز حاقیندا بیربیریمیزله دانیشا بیله‌جک بیر آرخاداشلیق قوردوق. بئلنچی آرخاداشلیق دونیانین ان گؤزل آرخاداشلیغی‌دیر دئیه دوشونسم ده، آرخاداشلیغیمیزی یاریدا بوراخان یئنه سن اولدون.
بو آن ایچیمده‌کی صاف و صداقتلی قیزایله ایچیمده‌کی او محافظه‌کار قادین قارشی-قارشییا دایانیب، ایچیمده‌کی صداقتلی قیز سنه عایید اولان بوتون آنی‌لاری یازماغیما، محافظه‌کار قادین ایسه بو یازیلارا سون قویماغیما اصراچی‌دیر، بیزیم نسلین انسانلارینین بیر چوخو بونا بنزه‌ر آنی‌لاری یاشاسالاردا، سنین کیمی خاطیره‌لری دراماتیزه ائتمیرلر، دئییر.
و بالکوندا ایلشیب، نیسگیل‌لرینی، غم-غصه‌لرینی تبریزین کؤنول آچان یئلینه بوراخان رئال من ایسه یاشیم‌دان دولایی ایچیمده‌کی محافظه‌کار قادینی دینلمک ایسته‌ییر. ایچیمده‌کی صداقتلی قیز ایسه دیلله‌نیر: «بو خاطیره‌لری یازماغی بوراخما، پایلاشماسان دا، یاز، یازیرکن یاشانمیش آنی‌لارین اوزه‌رینه ایشیق توت، چونکی آنی‌لار داها سن و آرخاداشینی گؤزله‌میر…
۱۱ شهریور ۱۴۰۳
[۱] – اینجی، دورّ: مروارید
[۲] کره‌نئی‌خانا: اسکی‌دن رهلی‌بازاردان کره‌نئی‌خانا تیمچه‌سینه یول وار ایمیش. سونرالار ارتش(قدیم شاپور) خیابانی رهلی بازار ایله کره‌نئی خیابانی‌نی بیربیرندن آییردی. گونوموزده کره‌نئی‌خانادا گؤی-گؤیرتی و مئوه ساتیلیر. تبریزین سس موزه‌سینه کره‌نئی‌خانادان یول وار.
