معصوما و موصطافا
شهرام گلکار
عمیمین اَلچیسی‌می‌دی، ایش‌بیرلیکچیسی‌می‌دی، آیدین دئییلدی. ایللرین ایشلک کئچیشی، دورقون دوزه‌نی، کیمسه‌یه ال آچماماسی عادی حالا چئوریلمیشدی. هر بیر سینیری قالدیریب، تور چکمیشدی گؤزلرینه تور آتانین. دنیزدن یانمیش بنیزی کیشیلرین تیراشینا، قیز-گلین خئیلاغینین ساچینی داراماسینا جیلالی آینا ایدی. فقط آلنینداکی قیریشلاری قاریشلاماقلا بیتمزدی. ایریلی، خیردالی نه تهر بالیق وئرسن بیر گؤز قیرپیمیندا دوغراییب، راحلاییردی. ایندی ایری کؤتوک اوسته دوغرادیغی تک.
عمیم دئدی:
– موصطافا بسدی قاییقلا، بالیقلا اوغراشدیغین. سنه بیر مصلحتیم وار. آمما یوخ دئمه.
– عشق اولسون! سنین بیر سؤزونو ایکی ائتدیییمی هئچ گؤردون‌می!؟
– یوخ، آمما بو تامام سن‌لیک‌دی. یالنیز سنی ماراقلاندیریر.
– منیم ماراقلاریمی کاسیبچیلیق چوخدان اؤلدوروب، سن کی منی اؤزوندن یاخشی تانییب، بیلیرسن.
– ائله اونا گؤره ده دئییرم کی، آرتیق واخت‌دیر.
– نه‌یین؟
– ائولنمه‌یین… باخ تام خویونا، یاشینا- باشینا، آغزینین دادینا لاییق بیریسی‌دی. نه دئییرسن؟
موصطافانین سون‌سوز دیلی بیر آزجیق دا دولاشیب، گؤزونون قیسا سورن ایشیلتی‌سینا باخمایاراق نه دئدییی آنلاشیلمادی، آمما عمیم کؤهنه ایش دوستونو آنلامیشدی دئیه‌سن. او سبب‌دن همن آخشام موصطافایلا عمیم قیزگیلده‌یدیلر و آرتیق ائلچی‌لیک ایشلملری سونا یئتمک اوزه‌ره‌یدی.
معصوما کند تربیه‌سی آلمیش، جانی سولویدو. بیر سؤزله عمی موصطافا اوچون دوغرو آدرئسه، دوزگون زیله باسمیشدی. دونیانین خیریم- خیردا نعمتلریندن اوزون ایللر محروم قالان، ایش- گوجوندن، ذلّتدن باشقا هئچ بیر شئی آنلامایان موصطافا، اؤزونو بلیرسیز، آما فرحلی قوخویلا دولو بیر اوتاقدا معصومایلا یالنیز بولوردو.
داها چوخ یوخویا بنزر بو گئرچک‌لیک اونو نئجه شاشیرتمیشدی، بتیمله‌یه‌مزسینیز. نه ائده‌سن کی، بو گئرچک ایدی و اونلاری اوتاقدا ایلکین سؤزلری پایلاشسینلار دئیه، باش- باشا بوراخمیشدیلار.
یازیق موصطافا، بیر یاندان آیاغینی، الینی بیر یاندان دا ان واجیب توپوق دیلینی توپلاماغا چالیشیری. نهایت گلین اولا بیله‌جک معصوما سئوینجک حیاسینا گیرمیش، داماد آدایی‌نین ایلکین و خاطیره‌لریندن بلکه ده ابدی سیلینمه‌یه‌جک، سؤزلری گؤزله‌ییردی.
ایندی‌یه قدر تورلا، تیلوولا اوغراشان، الین دیشی میلچه‌یه بئله سورمه‌ین موصطافا؛ غریب اورتامدا بیر یئرلرینین آن‌به‌آن داها چوخ شیشیب، قابارماسینی حیسّ ائدیردی. گؤزو بَره‌لیب، اؤرپشمیش دیلی چیخارتدی آغزینداکی پاخلانی. “…. م …معصوما……. معصوما…م .. م.. مَمه‌لر ……م … منیم‌دی.”
.
