ساری کؤینک
رقیه کبیری
یاغیش، شیدیرغی یاغیر. نودان‌لارین کؤپوکلنمیش سویو، دؤشه‌مه‌نین چالا-چوخورونا دولور. دؤشه‌مه‌نین لاخلامیش کرپیج‌لری، یولدان کئچن‌لرین آیاغی آلتیندا شاپپیلدادیر. آرخین سویو خیابانین اورتاسینا یول آچیبب. آرخین ایچینده‌کی زیر- زیبیلی اؤزویله سوروب، خیابانین اورتاسینا آپاریر.
قادین خیابانین قیراغیندا دایانیب، اؤتوب، کئچن تاکسی‌لره گئده‌جه‌یی آدرسی دئییر. شوتوین ماشین‌لار، خیابانین کیرلی سویونو اونون یاغیشدان ایسلانمیش پالتارلارینا سیچرادیر. یاش باشماق‌لاری، آیاق‌لارینا آغیرلیق ائدیر.
نئچه آددیم ایره‌لی‌له‌ییر. هردن بیر گئری دؤنوب آرخایا باخیر. گاهدان دا اَییلیب، یئریه- یئریه، کناریندان سوووشان ماشین‌لارا گئده‌جه‌یی آدرسی دئییر. وار گوجویله، آغ رنگلی بیر پیکانا باغیریر: «مین تومن باغمئشه» پیکان اوندان اؤتوشوب بیرآز آرالی‌دا دایانیر. شوفر، دالی دنده ایله قادینا ساری قاییدیر. قادین آرخا قاپینی آچیب ایله‌شیر. ایسلاق پالتارلاری جانینی اوشودور. سیسله‌نیب بوغلانان گؤزلویونو، گؤزوندن آییرمادان یایلیغی ایله سیلمک ایسترکن، گؤزو، شوفرین کؤینه‌یینه ساتاشیر. ایسلاق وجودو، تپه‌دن دیرناغا گیزیلده‌ییر. ماشینین ترلمیش شوشه‌سیندن ائشییه باخیر. هئچ نه گؤرونمور. بیر دفعه ده گؤزآلتی شوفرین کؤینه‌یینه باخیر. اونون آت‌قویروغو ساچ‌لارینی گؤرونجه، جانینین گیزیلتیسی تیتره‌ییشه دؤنور.
یاواشجا قاپییا ساری سویروشور. پالتارینین یئنگی سی‌ایله شوشه‌نی سیلیب، قاپینین قیفیلینا باخیر. ندنسه غیرعادی بیر شئی آختاریر. شوفر آینادان قادینی سوزرک، بؤیرونده‌کی شوشه‌نی آشاغی ائندیریر.
ماشینین شوشه‌سیلن‌لری دایانمادان حرکتده، بیر ساغا، بیر سولا؛ گئدیرلر، قاییدیرلار. شوفرین ساری کؤینه‌یی تیکان کیمی قادینین گؤزونه باتیر. او ایلدن بری ساری کؤینکلی بیر کیشی گؤزونه دَیمه‌ییب.
آتاسی، توکان‌لا ائوین آراسینداکی کیچیک قاپیدان ائوه گیرر-گیرمز، بیر ده قاییدیب «یاریم ساعاتا گلیرم. بیر تیکه ناهار یئییم گلیم. شولوخلوق ائله‌مه‌هااااا… چوخ دا هله-هوله یئمه، هاوا ایستی‌دی، ناخوشلارسان»
قادینین گؤزلرینی شوشه‌سیلنین حرکتی‌ایله دولاندیریر.
«کاشکی الیمی اوزالدیب اونلاری دایاندیرا بیلسه‌یدیم…»،دئیه دوشونور.
شوفر، آینادا قادینا باخاراق، داشبوردداکی کاست‌لری اللشدیریر. قادین ایسه اؤزونو گؤرمه‌مزلییه وورور. ماشینین ضبط صوتوندان موسیقی سسی قالخیر.
«گؤزلرین آلدی منی
کمنده سالدی منی
گئتمه، گئتمه آی گؤزل یار
گئتمه، گئتمه…»
یاغیش دامجی‌لاری شوشه‌نین اوستونه یاغیب، گیرده- گیرده ایز بوراخیر. ایزلر یوخا چیخدیقجا، گیرده دامجی‌لار سو کیمی آشاغی سوزدوکجه، آیری دامجی‌لار گئنه ده شوشه‌نین اوستونه دوشور. ایزلرین هر بیریسی بیر گیردابدی دئیه‌سن، قادینی اوشاقلیق خاطیره‌لرینین ایچینه چکیر.
«سا سا سا ساری کؤینک گئیمیشدی!»
آتاسی تَر کؤینکلی آرا قاپیدان توکانا گیرمیشدی. او ایسه الی ایله کوچه‌نی گؤستریب، بیر باشا تؤوشهیه- تؤوشهیه باغیرمیشدی:
«ساری کؤینک گئیمیشدی… سا… سا… ساری…»
آتاسی آیاق‌یالین کوچه‌یه قاچمیشدی.
«بوغوردو منی… بوغوردو…»، دئیه-دئیه، آناسی‌نین قوجاغینا جومموشدو. قولاق‌لارینا سیرغا ائتدییی گیله‌نارلار ازیلیب، سویو گؤز یاش‌لارینا قاریشمیشدی. .
«سا ساااا ساری کؤینک… بوغوردو… الینی دیشله‌دیم… قیشقیردیم»
«باغیشلایین خانیم! اتوبانا دؤنمه‌لییم. خیابان‌لاری سو آلیب. کئچمک ممکن دئیی»
«اتوباندان گئتمه‌یین»، دئمک ایسته‌یینجه، شوفر آرتیق اتوباندایدی. اتوبان چوخ ساکت گؤرونور. شوشه‌سیلن‌لر دورمادان گئدیر، قاییدیر… گئدیر، قاییدیر
ناهار اوستو هر یئر ساکت ایدی. گونش، توکانین شوشه‌سی بویونجا ایچری اوزانمیشدی. او ایسه هؤروکلو ساچ‌لارلا، پیشخانین آرخاسیندا لاواشانی آغزیندا شاپپیلدادا- شاپپیلدادا، قولاق‌لارینا گیله‌نار سیرغالاییر. اوچ جوان اوغلان بیردن-بیره توکانا گیریشدیلر. ندنسه آغزی‌نین دادی قاچیب، لاواشا الینده قورویوب قالدی.
«بیزه اوچ کانادا وئر!»، ساری کؤینکلی دئمیشدی.
همیشه سویودوجونون قاپیسینی آچارکن، قاپییا باغلانمیش قاپاق‌آچان سویودوجونون قاپیسینا توخونوب جینگیلده‌یردی. بو جینگیلتی، اونون یامان خوشونا گلردی. سویودوجونو آچیب، بیر کانادا گؤتورر-گؤتورمز، آرخاسینداکی کؤلگه‌نی حسّ ائتمیشدی.
ماشین ترمز ائله‌ییب دایاندی. اوره‌یی گوپ‌ها‌گوپ قولاق‌لاریندا سسلندی. شوفرین کؤینه‌یینه دئییل، آینایا باخدی.
«ائله‌بیل پنچر اولدو!»، شوفر آینادا اونا باخاراق دئییب، قاپینی آچیب، یئره ائندی.
یاغیش شوشه‌نین اوستونده دم توتوب، سسی قاریشیب، موسیقی سسینه.
«بو گون من گؤروشه تله‌سیرم
یاغما یاغیش، یاغما یاغیش…»
اوتوباندان تکه-توک سوووشان ماشین‌لار، اووولدایا-اوولدایا اوزاقلاشیرلار. قادینسا خوفلانیب. بیلمیر نه ائتسین.
شوفر ماشینین قاباق تکرلرینه باخیر. سول تکری یوخلاییب، آرخایا، قادین اوتوران طرفه دؤنور. قادین‌ایسه کیرییب، آیاقلارینی بئله ترپده بیلمیر.
الینده کانادا گئری دؤننده، آرخاسینداکی کؤلگه، الینی اونون آغزینا باسیب قوجاقلامیشدی. او ایسه ال-آیاق چالیب چابالامیشدی. چیغیرماق ایسته‌میشدی. ساری کؤینکلی آدام قورشاغینی آچماغا چالیشمیشدی. قیزین گؤزلری کلّه‌سینه چیخمیشدی. الینده‌کی کانادانی اونا تولازلامیشدی. کانادا شوشه‌سی شاققیلتییلا توکانین اورتاسیندا سینمیشدی. وار گوجو ایله اوغلانین الینی دیشله‌میشدی… قیشقیرمیشدی…
شوفر، قادینین اوتوردوغو طرفه یاخینلاشاندا، قادین قاپییا سیغیشیب، دسته‌یی برک-برک توتدو. هؤله‌سک قاپینی قیفیللادی. بدنی بوز کسمیشدی. شوفر، نئچه دفعه آیاغینی تکره چیرپیب، دئیینه-دئیینه ماشینین آرخاسینا کئچیب، صاندیغی آچدی. زاپاس تکری چیخاردیب، قادینین اوتوردوغو قاپینین کناریندا یئره آتدی.
قادین، باشینی اوتوراجاغا سؤیکه‌ییب گؤزلرینی یومدو. ماشینین شوشه‌سیلن‌لری دایانمادان گئدیب، قاییدیردیلار. شوفرین ساری کؤینه‌یی جیم- جیلاق ، ایسلانمیشدی.
مهر ۸۷
یک پاسخ
قلمینیز آخار و یازی طبعینیز همیشه جوشار اولسون…….گؤزل ایدی.