والتر بریگس
جان آپدایک
چئویرن: فیروز رفاهی
ترجمه: فیروز رفاهی
فیروز رفاهی
00:00
00:00

بوستون‌دان ائوه قایـیداندا، جک ماشینی سوروردو. اؤنده کؤرپه اوغلو بیر گری- گوت بئشییینده یاتمیشدی، آرخادا ایسه کـئلئر ایکی یاشینداکی قـیزلارینا شعر اوخویوردو.

– یای آچیلاندا قوش‌لار باشلادیلار..؟

– اویـناماغا- کؤرپه دئدی.

– بئله بیر دادلی بوشقابی کیمین قاباغـینا قویماق اولماز؟

– سولتانـین!

– دوغرو دئدین.

– بورنو اوزون قوشون شعرینی اوخو گؤروم.

– بورنو اوزون قوشون شعرینی؟ من بورنو اوزون قوشون شعرینی بیلمیرم. سن بورنو اوزون قوشون شعرینی اوخویوردون. او، نـئجه باشلانـیر؟

– نئجه باشلانـیر؟

– من سندن سوروشورام. کیم سنه بورنو اوزون قوشون شعرینی اوخویاردی؟ میس دونی بو ایشی گؤرمزمی‌دیر؟

جو بو کؤهنه ظارافاتا گولدو ؛ «میس دونی» سؤزو ائله بئله بیر گون آغزیندان چیخمیشدی. ایندی سوروشور: «میس دونی کیم‌دیر؟»

– من بیلمیرم میس دونی کیم‌دیر. یالنـیز سن بیلیرسن میس دونی کیم‌دیر. او، هاچان سنه بورنو اوزون قوشون شعرینی اؤیره‌تدی.

قـیزجـیغاز شن بیر سسله اوخوماغا باشلادی: «بورنو اوزون، بورنو اوزون تاق، تاق، تاق».

– نه گؤزه‌ل شعردیر! کاش میس دونی منه ده بو شعری اؤیره‌دیدی.

جک دئدی:

– بو قاراقوش شعری‌نین ایکینجی بندی‌دیر. قاراقوش آشاغی ائـنیب بورنونو قاپدی.

کـئلئر پیچیلدادی:

– من ایندییه‌جن هئچ واخت بو شعری اونا اوخومامیشام.

– سن اونو بیلیرسن. بو سنین قانـیندادیر.

گلدیکلری یول، بیر اون دقیقه‌دن سونرا اللی کیلومتری آشاجاقدی. اوشاق یاتمیشدی. کـئلئر اونون آغـیرلـیغی آلتـیندا بیر آز اؤزونو یـئر به‌ یـئر ائله‌دی. سونرا، آنا دونوندان قادین دونونا کئچرک، انگینی جکین اوتوردوغو اوتوراجاغـین آرخاسینا، چییـنی‌نین یانـینا دایایـیب، اونون ساغ بوینو طرفیندن نفسینی اؤتوردو.

– قوناقلـیق‌دا کیمدن داها چوخ خوشون گلدی؟- او سوروشدو.

– دوغروسو، هئچ بیلمیرم. دئمک چتین‌دیر. لانکموردان دئـیه بیله‌رم؛ آخی او شئرمان آدامز حاقـقـیندا دئدیکلریمی باشا دوشدو.

– هامی سنی باشا دوشدو؛ آنجاق اونلارین فیکرینجه سؤزلرین بیر آز یونگول ایدی.

– هئچ ده بئله دئـییلدی.

– سنجه کیم داها یاخشی ایدی، لانکمور، یوخسا فاکسی؟ – او سوروشدو. بو، کیم یاخشی‌دی؟

اویونو اوزون واختی بیرگه سوووشدورماق اوچون، اونلارین نـئچه مئـتودلاریـندان بیری سایـیلـیردی. چوخ ضعیف اویون ایدی؛ اوندا، جکی هیجانا گتیرمک اوچون هئچ ابتدایی عنصورلر ده یوخ ایدی.

– منجه لانکمور- کـئلئر بیر آز دوشونندن سونرا دئدی.

– یازیـق فاکسی، آرخادان پیچاقلا وورورسان. او نه قده‌ر سنی سئویر.

– او چوخ مهربان‌دیر آنجاق، منیم اوندان آجـیغـیم گلیر. بئله، سنجه فاکسی یاخشی‌دیر یا او اینجه چنه‌لی، یالواریش گؤزلو اوغلان؟

– یالواریش گوزلو ‌اوغلان- او همن جاواب وئردی.

– اه، هئچ ده جانا یاتان دئـییلدی. آدی نه ایدی؟

– کـئراولی؟ کـئر- کـئراکـئرز؟

– اونا اوخشار ایدی. گـئراهام کـئراکـئرز. یانـیندا اولان قـیزین آدی نه ایدی، او یـئکه قولاق‌لارلا نـئجه ده ایسته‌ملی ایدی؟

– یازیق قـیز، بیلمیرم نییه دوشونوردو کی، او یـئکه قاراچی قـیزیل اوزوکلر اونا چوخ یاراشیرلار؟

– آنجاق قولاق‌لاریندان اوتانمیردی، فخر ائدیردی. دئـییر بس اونلار یاراشیـقلی‌دیر. بئله‌دیر- ایسته‌ملی قـیز ایدی. گؤره‌سن اونو بیر داها گؤرمه‌یه‌جم.

– آدیندا «و» واریدی.

– اورلاندو، اووووو- اورلاندو، کؤپوکه اوخشار ملکه.

– سن ده یوخ.

اوتوبان یولون قـیراغـیندا اوزاق‌دان گؤرونن ایشیق‌لار بیر آغ هیرم یاراتمیشدی؛ موتورون خورولتو سسی منظم دئـییلدی و هردن گازوئیل قوخوسو بیردن ماشینـین ایچینه هجوم ائدیردی. یاناجاق پومپو، دوشوندو و گؤز قارشی‌سینا آتاسی‌نـین بؤیوک (مودئل‌لی) ماشینـینی خاطـیرلاتدی کی، یاناجاق اونون لوله‌سیندن توز کیمی ائشییه پوسکوروردو. اونون کؤهنه بؤیوکونون یاناجاغـینا همیشه زیر- زیبیل قاریشیردی و ماشین یولدا هیقانـیردی. – بو ماشین یاواش- یاواش بیزه خرج آچاجاق- دئـییردی، آنجاق بیر جاواب آلمازدی. آناسی ماشینی‌ساتماقدان خوشلانمـیردی. دوغرودور دؤرد ایل اولاردی کی، اونا صاحیب ایدیلر، یـئنه ده اونون آچـیق گؤی رنگینه آلـیشمامیشدی. او سرعت گؤستریجی‌سینه باخدی و دئدی: – ایییرمی اوچ مین کیلومـتر بیزه یول گئدیب- سونرا علاوه ائـتدی:

– بورنو اوزون، بورنو اوزون تاق، تاق، تاق.

کـئلـئر فیکیرلشدییی شئـیه بیردن- بیره گولدو. – بیلدیم. آروآیلنده اولان او کؤک کیشی کی، بوتون یایی آدادا قالـیب بیریج اویـنایـیردی و بالـیقچی‌لارین پاپاغـینی باشینا قویاردی، آدی نه ایدی؟

اری ده کیشی‌نی خاطـیرلایاراق گولدو. دوز بئش ایل بوندان قاباق، ائولندیکلری ایلک اوچ آیی نیوهمشایـیر گؤلونون بیر عاییله‌وی دوشرگه‌سینده وای.ام.سی.ا- دا کئچیردیلر. جک اوندا ثبت کارمندی ایدی و اونون گلینی دوشرگه‌نین دوکانـینی ایداره ائدیردی. «والتر» او چوخ اینام‌لا دئدی. سونرا ایکی هئجالی ایدی. او بوتون واختـینی کیشی چادیرلاری سیراسیندا بالـیق توتماق ایله مشغول ایدی. بیز اورایا گـئدیب، اورادان دؤننده او، هله اورادا ایدی. یاردیم اوچون دمیرلرین باشیندان توتاردی. – کیشی حاقـقـیندا هر شئیی یاخشی خاطـیرلایـیردی: پیشییه اوخشار گولوشو، باشی‌نـین پئـیسرینده ساچ‌لاری‌نـین شیشمه‌سی، سسلی قارین آغری‌سی، اونون شوکولات بز‌کلی تی‌شئرتی و پارچادان تیکیلمیش باشماق‌لاری.

– میس یانگـین کیچیک آدینی منه دیء- کـئلـئر دئدی.

سیغاری بیر- بیری‌نین آرخاسیندان توستوله‌ین اردم‌سیز یانگ دوشرگه‌نین مسئولو ایدی. آروادی اینجه، قـیسا بویونلو، اوزون دؤرد بوجاغا اوخشایان، یاشیل قورخودوجو گؤزلری ایله بیر چوخ «یاخشی» کیشی‌لرین قادین‌لاری کیمی آجـیدیجی دیلی وار ایدی. بیر دفه او، اوشاق‌لاری ایله اوردودا اولاندا مئـیلن‌دن جکه تـئلفون ائـتدی و جکین ایشی چوخ اولدوغو اوچون اونوتدو کی، دارتمونداکی اوغلانا بونو دئسین. آرواد بیر ساعات‌دان سونرا تـئلفون ائدیب، دئیـه‌ن‌ده کی، اونلار هله ده بو اونودولموش اوشاق‌لارلا مئیلن‌ده گؤزله‌ییرلر جک اونا تـئلفوندا جاواب وئردی – نه قورخولو!- (سوآلتی تـئلفون خطّی ایش‌دن چیخمیشدی). اوندان سونرا بوتون یایی آروادی اونو – نه قورخولو- چاغـیریردی. ایش یـئرینه گیره‌ن کیمی دئـییردی: – هن، بیزیم یاخشی، نه قورخولو قوجا نـئجه‌دیر؟ و جک قـیزاراردی.

– گـئورگـئن- او دئدی.

– یاخشی، بس اونلارین ایکی قـیزی- کـئلئر دئدی.

– بیری مافی ایدی، او، سؤز دینله‌ین ایدی و او بیری…

– بیلیرم.

– گؤزله گؤروم. مافی- بونا هم قافیه ایدی. مافی و تافی.

– اودری. اونون قاباق دیش‌لری یـئکه و ایتیجی ایدی.

– چوخ یاخشی. ایندی گل او کؤک کیشی حاقـقـیندا دوشونک. او، «ب» ایله باشلانـیردی. بئینس، بادس، بایرون. اونلار بیرگه دئـییلیردی، بونا گؤره اونو بیر آد کیمی خاطـیرلامیرسان. والتر بوه. بوه! آدامی حیرصلندیرمیر؟

– بایرون اونا یاخـین‌دیر. یادیندادیر نه قده‌ر او، شافلبورد اویونوندا اوستا ایدی و ‌هر آخشام بو اویونا یاریش تشکیل ائدیردی؟

– گئجه‌لر سالوندا پاسور اویـنایـیردی. قهوه‌یی رنگیلی، بوکولن، دمیر صندلی اوستونده اوتورماسی ائله بیل لاپ گؤزومون قاباغـیندادیر.

– او، ایلین قالان چاغ‌لارینی فلوریدادا یاشایـیر؟ کـئلـئر، فیکیرلشنده کی، بوتون ایل بویو واخـتـینی استراحت یـئرلرینده کـئچیردیر، گولومسه‌دی، نییه کی، اگر ایسته سن بئله بیر تنبل آدامی تصوّور ائده‌سن، او آدام والتردن باشقا کیم اولا بیلردی؟

جک قلبه چالمیش بیر آدام کیمی دئدی:

– او، قارماق وزنه‌سی‌نین جیهازلاریـنی ساتـیردی. بازنشسته ایدی. – آنجاق بو خیاوان‌ دا باشقالاری کیمی اونون آدی گیزلنمیش مقدس یـئرینه چاتمیردی. – من ایش‌لرینی خاطـیرلاییرام، آنجاق آدلارینی یوخ- او دئدی. یالنـیز ایسته‌ییردی بیر شئی دئسین، چونکی حیس ائدیردی آروادی اونو قاباقلایـیر و بو اویوندا اوندان ایره‌لی گئدیر. – گر‌ک کی، هامی‌سینی یاخشی خاطـیرلایـیم- او دئدی، – هامی‌سی‌نـین آدینی پاسورلارین آرخاسیندا یازمیشام.

– سؤزسوز یازمیسان. او قـیز کی، آدادا هامی‌یا داش آتـیردی، ائله بونا گؤره ده آدانی ترک ائـتمه‌لی اولدو، کیم ایدی؟

– وای آللاه! باشی ایشله‌میردی و ‌نـئجه ده گؤزه‌ل ایدی. چوخ آز دانـیشیردی.

– آغاج‌لارین آلتـیندا گیزلنیب دایانـیردی.

– آتونن، نه قده‌ر یانگ اونا اوره‌یی یانـیردی! او، آیریجا موضوع کی، همیشه قاطار ایله آدایا گلیب و دئـییردی کی، قارداشی ائسپیرینک‌فیلدده پولونو وئره‌جک و یانگ دا بو مخصوص کـئره‌دیتی قبول ائدیب و سانـیردی کی، هر شئی اونون‌چوندور.

– او شاهماتی چوخ سئویردی. چئکر اویونچولاری. ظنّیمجه سن چالـیشیردین اونا شاهماتی اؤیره‌ده‌سن.

– هر نه‌یی کی، سن تاختا اوزه‌رینده گؤستریردین دئـییر، نه یاخشی، یا دا، سن چوخ هوشلو- باشلی‌سان.

– سن هر نه دئـییردین همین سنی باشا دوشوب و هیستـریک گولوردو. اؤزو ده اوجادان. او، بیزی سئویردی چونکی بیز اونا قارشی چوخ مهربان ایدیک.

– روبئرت.

– روی، جانـیم؛ نـئجه اولار سن رویو اونوداسان؟ بیر ده پئک گـئریئس واریدی.

– پئک، گـئریئس. او یـئکه گؤزلریله.

– و او اوزون بورون کی، بورون دئشیک‌لری ایت بالـیغـینا اوخشایـیردی. – کـئلـئر دئدی. ایندی، اونون شیرین اوزلو اوغلان دوستونون آدینی دیء.

– ساریشـین، پاریلدایان ساچ ایله. لورد، بلکه آدینی یاخشی یادا سالا بیلمه‌ییم. او، آنجاق بیر هفته اورادا قالدی.

– من اونون یالنـیز گول‌دن چیممکدن گلمه‌سینی خاطیرلایـیرام. اورون آغ بدنی‌نی و خـیردا قارا اوزمک گـئـییمینی. چوخ سئکسی ایدی. اوف.

– چوخ آغ ایدی. آنجاق جانایاتان ایدی. یاخشی‌ یاددا قالان‌دیر. جک اعـتناسیز دئدی: من هامی‌سینی بیندیم، بیر او قـیوریم ساچلی آلماندان باشقا. آپبازخانا گده‌سی. دئـییردی بس چوخ آغـیل‌لی‌دیر. چنه‌سی جوجه‌یه اوخشایـیردی.

– او منه چوخ گؤز یـئتیردییینه گؤره سن اونو خوشلامیردین.

– ائله‌می‌دیر؟ یاخشی فیکیرلشنده گؤرورم ائله ایدی. منی اویوندا یامان اوددوغونا گؤره اوندان زهلم گئدیر. سونراکی، او پرولی اونو اوددو، اوره‌ییم یاخشی ساکیت‌لشدی، سئویندیم.

– ائسکوبار.

– آدینی بیلیرم. او ائله همیشه چالـیشیردی باشی ایله بسکـئـت‌بول اویناسین.

– بیر ده باربارا؛ او‌شوشکه، بوشانمیش کیشی.

– والتر باربارا. والتر، با، به، بو، بی، بؤ. یایـین سونوندا خرج‌لری اوچون اوزون بیر حاق- حـساب اونا وئردیلر.

کـئلـئر آرتـیق او گؤی کیشی‌نی گؤزله‌میردی. او، تـئز- تـئز ایره‌لی‌یه قاچـیردی و او اوزون تورانلی خاطیره‌لرین تجروبه‌سینده، بویالاردا ایزلر آختاریردی؛ ایتالیالی عاییله‌نی و اونلارین بوش پیوه قوتولارینی، اوزون بویلو قولاغی آغـیر کیشی‌نی کی، آیاق‌یالـین آیاق‌لاری بیر گؤتک آغاج‌دان یارالانمیشدی. اود قالاق‌لارینی کی، آوگوست یاغـیشی سؤندوردو، آدادا بو گونه قده‌ر گؤرمه‌میش مارالی. ماراللار قـیش‌دا شاختادا بورایا گلیب و باهار اونلاری اورادا اسلاتدی. بونلار کیشی‌نی پاخـیللادیردی- آروادین جور به جور آنـیت‌لاری و خاطیره‌لری. آرواد قوملاقدا «بئریل- بئریل» چاغـیریشی و ‌دادلی دوندورمالارلا اوشاق‌لار کی، مورای گمیسی‌نین قوللوقچولاری اونلارا بخش ائدیردیلر. آنجاق قادین ائله سرعتله بو آنـیت‌لاردا سئـیر ائدیردی کی، او ائپیزود باشی تـئز- تـئز گولوب، هردن ده قاه- قاه چکیردی. آخی اونلار بو آنلاری بیرگه یاشامیشدیلار و او فرح‌لنیردی کی، یاخشی بئله بیر اویونا باشلایـیب‌لار و بیلمیردی کی، بوندان باشقا آیری بیر اویون نئجه اولا بیلردی. اونلار تانـیش بیر یولا چـیخدیلار و آنلاری قـیسالتماق اوچون یاخشی سوروجولوک ائـتمیشدی.

ائوده اوشاق‌لاری یاتاق‌لارینا داشیدیلار – کـئلـئر اینجه کاغـیذ کیمی خـیردا کؤرپه‌نی و جک آغـیر، اتلی قـیزی. قـیزی یاتاغا اوزادان کیمی او، قارانلـیقدا بیر آن گؤزلرینی آچدی.

– ائوده‌ییک- او قـیز دئدی.

– ویزادرت پالچـیق‌لاری؟ ائولری‌نین یاخـین‌لـیغـیندا یـئـنی بیر یول سالـینـیزدی و قـیز چوخ خوشلانـیردی کی، تورپاغـین یـئر به یـئر اولماسینی گؤرسون.

– پالچـیغا سحرده- جک دئدی و جو بونا راضی قالدی.

آشاغی‌دا ایکی یاشلی آدام بوزدولابدان جینجر چیخاردیب و یـئرلی تـئلـئویزیوندا گـئجه یاریسی خبرلرینی سئـیر ائـتمه‌یه باشلادیلار. فرماندار بورکولو و کـئشیش کوشین خروشچوو و ناصیر قاریشمیشدی. بونا گؤره اونلار دا اوشاق‌لار اونلاری سحر تـئزدن اویاندیراجاغی اوچون یاتماغا گـئـتدیلر. کـئلـئر یاتاغا گیرمه‌میش یاتدی. آخی بوتون گونو اونلاری ایـلندیرمیشدی.

جکه ائله گلیردی کی، او اؤزونو یاخشی گؤستره بیلمه‌میشدی. کـئچمیش گونلر قادینا داها پارلاق گؤرونوردو و گؤرونوردو کی، اونون اوچون اونلار داها دیرلی ایدی. قادینـین خاطـیرلادیغی بیر شئی اونو یامان اینجیدیردی. آلمانلی اوغلانـین اونا گؤز یـئـتیرمه‌سی. بو دا سبب اولدو کی، او یاواش- یاواش آروادینی یادا سالسین؛ اونون یاشـیل پالتار و قهوه رنگینده باجاق‌لاری و ال- اله اوتاق‌لاریـندان چـیخـیب اوزون توز- تورپاقلی دار یولدا سحر یـئمه‌یینه گـئـتمک‌لری. جیب ماشینـین تکرلری‌نین ایزلری هله یـئرده قالمیشدی. کـئلـئر ده قولاغی آغـیر کیشی کیمی آیاق یالـین ماشین ایزلری‌نین اوستوندن آددیم‌لایـیردی. ال‌لری، بویو آلچاق گؤرونوردو و یوروشو اونا چوخ قریبه گلیردی. قادین همیشه یـئمک اوچون اوزاق‌دان چالـینان زنگ سسینی ائشیدیردی. اونلارین قالدیغی اوتاق هر شئی‌دن اوزاق ایدی و یـئگانه ایشیق‌لاری شمع ایشیغی ایدی. هر گون‌اورتادان سونرا (بازار ائرته‌سیندن باشقا کی، کیشی اؤز توپ یولداش‌لاری ایله اویـنایـیردی) ناهار و آخشام یـئمک‌لری آراسیندا، ایچری‌ده آرواد یـئرلرینی حاضیرلایاندا، او تاختا صندلی‌سینده اوتوروب و آلا توراندا دون‌کیشوتی اوخویاردی و سئپتامبر آیـیندا، اوندا کی، سانچو اؤز سروری ایله اؤلوم یوخوسوندان قالخـیب دولسییانـین بو گؤزه‌ل، نجابت‌لی خانـیمین آرخاسیندا گـئـتمه‌لی ایدیلر، او یامان آغلادی. اونلارین قالدیقلاری اوتاق‌لارین اطرافـینی دهشتلی رقابت موباریزه‌سی بوروموشدو. اونا ائله گلیردی کی، اوتاق‌لارین پنجره‌سی یوخدور. تاخچانـین اؤنونده، کول جوسون ایچینده دایانمیشدی و بیردن- بیره گؤزله‌نیلمه‌دن ایسته‌دییی شئـیی تاپدی. او، یـئرینده دیک اوتوردو و دئدی: – کـئلـئر- و اونو اویاتماق ایسته‌مه‌دییی اوچون آستاجا دئدی: – بریگس، والتر بریگس.

(سون)

………………………..

 ایضاح: جان آپدایک ۱۹۳۱-نجی ایل‌ده پئنسیلوانیا شهرینده آنادان اولموشدور. اونون آتاسی ریاضیات معلیمی و آناسی حئکایه و ‌رومان یازیچی‌سی ایدی. آپدایک ۱۹۵۴-نجی ایل‌ده هاروارد دانیشگاهـینی قورتاریب‌دیر. او، آمئریکانـین ایییرمینجی عصیر ادبیاتی‌نـین ان مشهور یازیچی‌لاریندان بیری سایـیلیر. بو گونه قده‌ر اوچ دفه پولییـئـتزئر جایزه‌سینی قازانمیش آپدایک فـیرانسا، ایتالیا و بیر نـئچه آوروپا اؤلکه‌لری‌نین ده اؤدول‌لرینه صاحیب اولا بیلمیشدیر. اونون اللی‌دن چوخ اثری وار کی، بیر نـئچه‌سی‌نین اساسیندا فیلیم‌لرده چکیلیب‌دیر. آپدایک- ین اثرلری اساسن عاییله و کیشی- قادین موناسیبت‌لری‌نین پئسیکولوژییاسینا حصر اولونور. اونون شخصییت‌لری ساده آمئریکالی عاییله عضولری‌دیرلر. ۲۰۰۴-نجی ایل‌ده تکرار پولییـئـتزئر موکافاتـینا لایـیق گؤرونن آپدایک، ۲۰۰۹ینجی ایلده سرطان خسته‌لیگیندن وفات ائتمیشدیر.

جان آپدایک
چارلز باکستئر | ترجمه: 
چارلز باکستئر | چئویرن: 
فیروز رفاهی
ارنست همینگوی | ترجمه: 
ارنست همینگوی | چئویرن: 
فیروز رفاهی
اشتراک گذاری در print
چاپ
اوخوماق زامانی: 7 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
باشقا اثرلری

والتر بریگس

فیروز رفاهی
www.ishiq.net

آذربایجان ادبیات و اینجه‌صنعت سایتی