مطباخدان قرارلیجا اوتاغا گئدیرم، نئچه ثانیه چکمیر، اوتاغین اورتاسیندا دوروب مایماقجاسینا یان- یؤره‌مه باخیرام. ایشین ایچینده بورایا گلمه‌ییمی باشا دوشمورم. بیر آز فیکیرلشندن سونرا، مطباخا دؤنمه‌لییم دئیه، قاییدیرام. اورادا یادیما دوشور، یئنی‌دن اوتاغا دؤنوب ایشیمی گؤرندن سونرا بیر داها قاییدیرام.
هر گون آزی اون دؤنه بوجور گئدیب قاییتمام اولور، بیر آز اوشونوب بیر آزدا سئوینیرم! آخی «گابریل گارسیا مارکز»ین «حوزنلو فاحیشه‌لریم» کتابینین بیر یئرینده، راوی ده سئوینیر. او دئییر:
«محض همین واختلاردا کیمسه دئدی کی، قوجالیغین ایلک سیمپتومو – اینسانین اؤز آتاسینا اوخشاماغا باشلاماسیدیر. من، یقین کی، ابدی گنج‌لییه محکومام، – دئیه او زامان دوشوندوم، چونکی آت صیفتیم هئچ زامان آتامین سرت غراییب جیزگی‌لرینه اوخشامایاجاق. نه ده رُما ایمپراطورونون، یعنی آنامین جیزگی‌لرینه.» (۱)
من ده سئوینیرم، چونکی اونلارین هئچ بیری اونوتقانلیق توتمامیشدیلار. ائله بیل من ده مارکزین راوی‌سی کیمی ابدی گنج‌لییه محکومام. سونرا اؤز اؤزومه دوشونورم، اولا: او رمان راوی‌سی‌دیر. ثانیا: ابدی گنج‌لییین اونوتقانلیقلا برابر اولماسینین نه فایداسی؟ عؤمرونون چوخونو یالاندان بو اوتاق‌دان او اوتاغا، مطباخدان اوتاغا، اوتاق‌دان مطباخا… یئریییب گیجلله‌نه‌جکسن! بلکه ده آدام هئچ اؤلمه‌دی. بلکه‌ده آدام تئز ایشدن دوشدو!
آخی همین بو راوی قیرخ ایکی یاشینداایکن بئل آغریسینا گؤره حکیمه گئدیب بئله دئییر:
«… حکیم آغریلاریما اهمیت وئرمه‌دی، دئدی کی، بو یاشینیز اوچون نورمال‌دیر.
– بئله اولان حالدا یاشیم آنورمال‌دیر، – دئیه اونا اعتیراض ائله‌دیم.
حکیم منه یازیق- یازیق باخیب گولومسه‌دی:
– گؤرورم فیلسوفسونوز، – دئدی.» (۲)
ایندی ایه‌ر من آلتمیش ایکی یاشیمدا گئتسه‌م او حکیمین یانینا یقین دئیر: بالا سن اییرمی ایلدیر اؤلوبسن، گؤتوره‌نین یوخدور. گئت کفنینی حاضیرلا، قالانلار دردسره دوشمه‌سین.
بلکه ده اونلارین قیرخ ایکی یاشینداکی‌لار بیزیم دوخسان یاشلی‌لاریمیزلا برابر گلیر؟ آدام دئییر بس یالنیز بورانین حکیم‌لری آغیزلارینا گله‌نی دانیشیرلار. پس لاتین آمریکادا دا بئله اتی‌آجی حکیم‌لر وار! بلکه ده اتی‌آجیلیق‌دان دئمیرمیش، ائله اونا اینانیرمیش! بیلمیرم اؤزونون نئچه یاشی وارمیش؟ هر نئچه یاشیندا اولسا دا اصلن اونون یانینا گئتمه‌رم. کئشکه آدینی دا یازاردی، بیلمه‌میش اونون یانینا گئتمه‌یئیدیم، آمما ائله ده یاشا ربطی اولمایاجاق!
آخی همین بو کیتابدا راوی ائله لاپ کیتابین باشلانغیجیندا دوخسان یاشلی اولماسیندان دانیشیر:
«دوخسان یاشیمین تامام اولدوغو گون اؤزومه بیر هدیه دوشوندوم….» (۳)
هله اؤزونه دوخسان یوبلئیی توتماق ایسته‌ییر، یوبلئیینه ده بیر باکیره قیز ایسته‌ییر. آمما تئز قضاوت ائله‌مه‌یین، اونا ده‌یمه‌میش پولو قویور بالیشینین اوستونه، یاواشجادان دالی قاپیدان چیخیر گئدیر.
بو اوزدن حکیم ائله بئله بیر سؤز دئییب دا! قیرخ ایکی یاش هارا، دوخسان یوبلئیی هارا؟
(۱)، (۲) و (۳): حوزنلو فاحیشه‌لریم/ گابریل گارسیا مارکز/ مترجم: عزیز رضازاده
