ایتییی ایتمیشدی، هارالاردان آختاریب، تاپاجاغینی بیلمیردی؛ چوخ آختارمیشدی، هئچ یئردن تاپا بیلمه‌میشدی، نه ائشیکده‌ایدی نه ائوده، نه تلویزیادا، نه پنجره دالیسندا، نه یاتاق‌دایدی نه دوراق‌دا، نه یاستیق آلتیندایدی نه ده ....
اوره‌یینده تیکه قالان کیمی بئینینده دویونلنمیشدی، نه آچیلیردی، نه رد اولوردو، اومموشدو سانکی، اومسایدی دا بیلمیردی ندن. پری ده یوخ‌ایدی بیر تیکه توتوب گیزلیجه، بیردن کوره‌یینین اورتاسیندان چالیب، دئیه، اومدوغون بو اولسون، بو دا قورخا، اومماق یادیندان چیخا، کورک آغریسی چکه.
قورخوردو، چوخ قورخوردو، یئنه چوخلو ایتیره‌جه‌یی اولمایایدی؟ گؤره‌سن هامی منیم تک فیرتینادان بئله قورخورموش؟ ناغافیل اؤلومدن نئجه؟ اؤزوندن سوروشدو. گولی دئیردی قورخولو باش سلامات اولار، پری ده دئیردی هئچ نهدن قورخما، هر نهدن قورخسان، گلر باشیوا. بیلمیردی گولی دوز دئییر یا دا پری.
بوندان اولکی فیرتیناداکی ایتیردیک‌لرین هله ده تاپانمامیشدی. آخی گولی دئیردی ایتمیش‌لری تزده‌دن راحات تاپماق اولار. ائله بیل پری دوز دئیرمیش، ایندیکی سؤزلرین ده اثری یوخدی. فیرتینادان بتر قورخوردو، بیر ایش گؤرمه‌میش، ال چکمزدی، آرخایین‌ایدی. چوخ قورخولو بیر زاد هامیسی‌نین یولونو گؤزلوردی؛ چوخ قورخولو.
بو دیلسیز، آغیزسیز، جانسیزـ جانلی طبیعتین دینه‌نی یئنه بتر توتولموشدو؛ دولوایدی؛ پیچاق وورسایدین، باتمازدی. اوره‌یین بوشالتماسایدی هیرسی سویومازدی. اونون اوره‌یی‌نین ده بوشالماسی بونلارا چوخا باخاردی!
اوندا دا نئچه گون فیرتینا اولموشدو، چوخ قورخموشدو، پری‌یه دئمیشدی، یئنه بو طبیعتین باشینا نم نه اویون گلیب، دینه‌نی چوخ بتر هیرسله‌نیب، زلزله‌دن، سئل‌دن زاددان گتیرمه‌یه بیردن؟ اودا گولوب دئمیشدی، ال چک بو سؤزلریندن، طبیعتین دیلماجی اولوبسان بلکه‌ده خبریمیز یوخدی. جاوابین وئرسه‌ایدی، داها الیندن قورتارمازدی، لاغا قویوب گولردی، سوسموشدو. صاباحی‌سی اهرـ ورزقان دا زلزله اولموشدو. آدی گلدی اؤزو گلمه‌سین، دئیه‌رک، یومروغون دؤنه ـ دؤنه اؤز کوره‌یینه ووروب بیز ائششک اتی یئمیشیک دئدی. نه قدر یئر تیتره‌میشدی زلزله‌دن سونرا. ایندیه‌دک بئله بیر زاد گؤرمه‌میشدی. ایندی ده یادینا دوشنده بوتؤو گؤوده‌سی تیتره‌ییردی. پری زنگ آچیب دئمیشدی آی بالا کؤینه‌ییندن بیر تیکه ده بیزه ساخلا، گولموشدولر.
ایندی ده چوخ قورخوردو، یئنه فیرتینادان دانیشیردی، بیرده قورخوسوندان. گؤرن نه‌لر اولاجاق، بیلمیرم. ائشیتمه‌میسن اردبیله گلن بورولغانی؟ ائولری وئران قویوب، دمیر دیره‌ک‌لری ائله تیتره‌دیرمیش، آز قالا یئریندن چیخاردا، بیری دئدی. اینانیب ـ اینانماز حالدا باشلادی دانیشماغا، بیلیرسیز نه وار، بئواخت اولمامیش اؤزوموزو بو قورخولو دوروم‌دان چیخارتماق گره‌ک، بونا دا یالنیز بیر یولوموز وار، یالنیز بیر یول. طبیعتین آنالیق حققینی یئرینه یئتیرمک، تزه‌دن اونون قوجاغینا قاییتماق، اونو دوشونمک، اونلا دوست اولماق، ... اونلا دوشمنلیک ائیله‌مک مه‌یه‌ر بو راحاتلیقدادی، مه‌یه‌ر اونونلا باجارماق اولار؟ یقین بیلین اولماز. ائله بیر فیرتینا سالار کی فیرتینا اولسون، بورولغان ائیلر، سئل‌لر، سولار آشدیریب، داشدیرار، یئری ائله تیتره‌در، بؤلوم ـ بؤلوم ائیلر، یئکه تیکه‌سی گؤزه گؤرونمز، داغلاری ییخار، بو بینالار بیر زاد ده‌ییر اونون الینده، ایکی اولمامیش یئره یئتیرر بو اویونجاق‌لاری؛ گؤیدن داش یاغدیرار...
بتر باش آلیب گئدیرسن، خاطا اولمادی، یئنه بیر بورولغاندان دانیشدیم، آغزیوا داش‌ـ تورپاق، بسدی داها، گؤزلریوی آچ، هامی گئدیب، من‌ده گئدیرم، دئدی.
گؤزلرین آچاندا، بیلمه‌دی هاواختدان تک باشینا قالیب، اؤز ـ اؤزونه دانیشیردی. گؤزللیک‌لردن داها دانیشانمادی. کیمسه قالمامیشدی اوردا.
حیکایه‌سین بوردا قورتاریب، آتمیشدی بیر یانا؛ بیر ایکی گون قالسین، دم آلسین، سونرا اوخویوب بیر آز ال دولاندیریب یوللارام، دئمیشدی. سحریسی نپالین آغیر زلزله‌سین ائشیتدی، توپراق آلتیندا قالانلاردان اولدو، نفسی داها یوخاری گلمیردی. صاباحی‌سی دا پاکستانین فیرتیناسین، فیرتینایلا، سئل‌ایله گئدن‌لره قاریشدی. ایتیک‌لری گونو گوندن چوخالمامیش، حیکاسینین لاپ سون نقطه‌سینی قویمالی‌ایدی…
