پاییزلا گؤروش!
ع . ن ” چاپار “
بوگون پاییز
کوچه‌میزدن گلیب کئچدی.
اوشوتدو منی …
خیشیلتیلی سینه‌سیندن
آغیر – آغیر نفس آلدی.
دولغون – دولغون گؤزلریله
کوچه‌میزه نظر سالدی.
کوچه‌میزین هئیکلینه
سرین – سرین اوفوردو او !..
سارالتدی باغچانی
گولو – چمنی
اوشوتدو منی …
اؤز باغرینا آلدی بوتون شه‌هری،
من ده –
هئیکلینده قوجوندوم اونون.
سویوندوردو منی،
کوچه‌نی،
باغچانی،
گولو – چمنی.
سردی اوستوموزه
ساریمتیل دونون …
من ده –
هئیکلینده قوجوندوم اونون.
یاز دا،
اسروک‌له‌دیک.
یای دا،
کئهله‌د‌یک.
یامان آزغین دوشدوک
چؤلده – باییردا !..
ایندی
بو سارسینتی-
بوغونتو دوروم،
ساریمتیل گؤرونور گؤزلریمیزده!
اوره‌ک ده تیتره‌ییر
ال،
آیاق،
دیز ده …
سارالیریق هامی!..
کوچه‌میز،
باغچامیز،
من ده –
چاییر دا!..
یامان آزغین دوشدوک
چؤلده – باییردا !..
بوگون پاییز
کوچه میزدن گلیب کئچدی.
اوشوتدو منی …
سارالتدی باغچانی
گولو – چمنی…
یک پاسخ
چاپارین قلبی ساوالان قده ر صفالی وصمیمیدیر ، قارلی -قیروولو پاپاعینا عشق اولسون .
آهای … ، جاهانگیری اؤله ن آینالار
منی بوغور منصور بوینونداکی دار
ایکی پادشاهی بیرله شن روزگار
ایپی بوغازیمدان آتمایاجاقدیر
الیم یاخاسینا چاتمایاجاقدیر.