کانادالی شاعر و یازیچی «آن کارسون» ۲۰۲۶-جی ایل ادبیات اوزره نوبئل موکافاتینا لاییق گؤرولوب.
ایسوئچ آکادئمیاسی طرفیندن وئریلن بیاناتدا بیلدیریلیر کی، موکافات یازیچی‌یا «کلاسیک عنعنه‌لرله اویناق دیالوق قوراراق معاصر ادبیات اوچون یئنی فورمالار یاراتدیغینا و جسارتلی، یارادیجی اثرلرینه گؤره» تقدیم اولونوب.
موکافاتی تقدیم ائده‌‌ن قوروم جومعه آخشامی، اوکتیابرین ۸-ده اعلان ائدیب کی، موکافاتین مبلغینی ۱۲ میلیون ایسوئچ کرونو (تخمیناً ۱،۲ میلیون دوللار) تشکیل ائدیر.
شاعر، ترجومه‌چی و کلاسیک ادبیات تدقیقاتچیسی اولان «آن کارسون» ۱۹۵۰-جی ایلده تورونتودا آنادان اولوب. او، پوئزیا، نثر، فلسفه و قدیم یونان میفولوگیاسینی ادبی فورمالاردا بیرلشدیرمه‌سی ایله تانینیر. اونون ان مشهور اثرلری آراسیندا «قیرمیزی آوتوبیوقرافیا» (۱۹۹۸)، «بیر ائولیلیگین حئکایه‌سی»، ۲۹ تانقو فورماسیندا نقل ائدیلن «ارین گؤزللیگی» (۲۰۰۱) و «نوکس» (۲۰۱۰) کیتابلارینی آد چکمک اولار.
قئید ائده‌ک کی، ادبیات اوزره نوبئل موکافاتی ۱۹۰۱-جی ایلدن بری هر ایل ایسوئچ آکادئمیاسی طرفیندن ادبیات ساحه‌سینده ان گؤرکملی و ایدئالیست اثر یاراتمیش یازیچی و یا شاعره تقدیم اولونان دونیانین ان نفوذلو موکافاتلاریندان بیری‌دیر.