هردن اؤز شعریمی جوانلیقدا من-
چمنده بولبوله، گوله وئرمیشم.
چیرپینان قلبیمی «سئویرم!» دئین-
قایماق دوداقلارا، دیله وئرمیشم.
گاه دمیر چاریقلی، گاه آیاق‌یالین،
آردینجا قاچمیشام بؤیوک آمالین؛
تاپدیغیم شؤهرتین میثقال- میثقالین-
ائلیمدن قازانیب، ائله وئرمیشم.
دفتریم قالخانیم، قیلینجیم قلم،
نامردم یوردوما جان اسیرگه‌سم؛
شاعرلیک بورجومو گئرچکدیر دئسم:
آنام دانیشدیغی دیله وئرمیشم.
ازلدن شعاریم انترناسیونال،
دونیا گؤروشلودور منده‌کی احوال؛
صولحه جان آتمایان شعریمی، درحال-
یاندیریب، کولون ده یئله وئرمیشم.
قاجارین تسبئحی، چارین عینکی
آرازین بیر قلبین ایکی بولمه‌گی،
ساراسیز چوبانام دئییب گولمه‌گی-
هیجران چایلاریندا سئله وئرمیشم.
سئوگی‌دیر جهاندا یاشادان منی،
هردم آلیشدیران، اوشودن منی،
زمانی ساچیمین آغاران دنی-
عؤمرومون بورجودور، ائله وئرمیشم.
1354
