بال یوخوما زه‌هر قاتدی غریبلیک،
نه دینجلدیم نه ده یاتدیم گئجه‌لر.
وطن دئیه، سیزیلدادیم صوبحه‌دک،
آهیم ایله عرشه چاتدیم گئجه‌لر.
گوندن گونه سولدو گولو قلبیمین،
بایاتی‌یا دؤندو دیلی قلبیمین،
آیریلیقدان غصه دولو قلبیمین-
غمین یئدیم، باشین قاتدیم گئجه‌لر.
خیال گزدی یللی‌نین آغ داشیندا،
شیش قایالار اوزدو دیدم یاشیندا،
الیم قالدی اوره‌ییمین باشیندا
اوشاق کیمی دیله توتدوم گئجه‌لر.
هر نه داددیم آغزیم اولدو آغی‌لی،
غربت آلدی باشیمداکی عاغیلی؛
کئچمیشیمین، شیرین عؤمرون ناغیلی-
قیسالدیقجا من اوزاتدیم گئجه‌لر.
هیجران دردی سیغماز اولدو یئر- گؤیه،
اومیدیم ده جان آتیردی گئتمه‌یه
«زمانی»یم سنسیز اؤله‌رم دئیه-
آیاغینا لئچک آتدیم گئجه‌لر.
یای فصلی- ۱۳۶۲
