آیاقلادیب ازمیشم «قیرآت»یملا بیر زامان
خوتکارلارین، شاه‌لارین طمطراقلی بورکونو.
آنجاق زحمت نامینه ساخلامیشام او واخدان
چال پاپاقلی بابامین یاز احواللی کورکونو.
حؤکمونه باخ زامانین نه چوخ تاج‌لار موزه‌ده
اوستونده نیسان توزو «یی‌یه وای!» دئیه قالمیش.
فقط فحله بابامین آجی حیات سورسه ده
شن نوه‌لر باشیندا بورکو ایندی‌یه قالمیش.
داشییاراق یوردومون شان- شرفلی یوکونو
آرزولارام دونیادا صلح اولسون، غم اولماسین.
«ری» مولکونه وئرمه‌رم «تبریز»ین بیر توکونو
اود یوردومون سایه‌سی باشیمدان کم اولماسین.
آلنی ترلی بابامین الینده‌کی قابارلار
تورپاغا جان وئردی کی مین جور نعمت یارادا.
ایندی شرف ساییلان هم ده منه افتخار
اونون عمل‌لری‌دیر یالنیز اونون دونیادا.
آلنی آچیق، مهربان دوز چؤره‌کلی بابامین
قوناق‌پرورلیگی ده هر اؤلکه ده دئییلیر.
سینه‌سی سازلی سؤزلو، صاف اوره‌کلی بابامین
نغمه‌لری «قاطار»دا، «شیکسته»ده دئییلیر.
دیلیمده آخشام، سحر یئنی باهار نغمه‌سی
قانیم‌لا، ایمانیم‌لا اؤز خلقیمه باغلی‌یام.
«ستارخان»ین قارداشی، «نسیمی»نین نوه‌سی
ظالمه قان اوددوران «بابک»ین نر اوغلویام!
1359
