گول عطیرلی بئشیگیمده منه لای لای‌دی دیلیم
آنام اؤز کؤرپه‌سینه وئردیگی خوش پای‌دی دیلیم
هره‌نین اؤز دیلی شیرین‌دی مثل وار اؤزونه
افتخارلا دئیه بیللم کی بالا تای‌دی دیلیم
دوستا بالدان دا شیرین دوشمنه حنظلدن آجی
حؤرمتین بیلمییه‌نه توی گئجه‌سی وای‌دی دیلیم
وطنه، خلقه محبت دئیه ایلهام وئره‌نیم
گوندوزو شن گونشیمدیر، گئجه‌سی آی‌دی دیلیم
اؤز دیلیمده باکیلی قارداشیما آیریلیغین-
دردینی بوللو یازاردیم آزاد اولسایدی دیلیم
قوچ کوراوغلو دیلینی سوسدورا بیلمز هئچکس
ده‌لی نعره‌مدی، دؤیوش گونلری های- های‌دی دیلیم
دیلیمه باغلی ازلدن بری شاعر بابایام
منه هر جمله‌سی، هر کلمه‌سی اوخقای‌دی دیلیم
شهریور ۱۳۶۵
