چوخ تاسفله یاییلان خبرلره استنادا، آذربایجانین آغ‌ساققال شاعرلریندن و «اوسکو» ادبی موحیطینین سؤز اوستادلاریندان اولان، «نیسگیل» تخلص‌لو «حاج‌آقا رجایی اسکویی»، مهر آیینین ۱۸-ینده اوسکو شهرینده دونیادان کؤچوبدور.
اوستاد شهریارین یاخین دوستلاریندان اولان مرحوم، ۱۳۰۳-جو ایلده آنادان اولموش و ۱۰۲ یاشیندا قوجالیق سببی ایله حیاتلا ابدی ویداعلاشمیشدیر.
قوجامان شاعرین جنازه‌سی، مهر آیینین ۲۰-سی (یکشنبه)، اوسکو شهرینین «باغ رضوان» مزارلیغیندا تورپاغا تاپشیریلدی.
«ایشیق»- آذربایجان ادبیات و اینجه صنعت سایتی امکداشلاری آدیندان قوجامان شاعرین ایتگیسینی آذربایجان ادبی اجتماعیاتینا، مرحومون حؤرمتلی عائله‌سینه، سئونلرینه و قلمداشلارینا باش ساغلیغی وئریر، خاطیره‌سینی عزیزله‌ییریک.
«ایشیق»- آذربایجان ادبیات و اینجه صنعت سایتی
۱۹ مهر ۱۴۰۵
