سکوتون لذتی بئینیمه یاییلیب. اوچ مین مئترلیک زیروه‌دن آیاغیمین آلتینا باخیرام. گؤز گؤره‌سی یاشیللیقدیر. آنا یئر یاشیل، آتا گؤی ماوی. من ایسه طبیعتین گئنیش‌لییینده یاشیللیق ایله ماوی‌لییین اورتاسیندا دایانمیش، گؤزه گلمه‌ین بیر وارلیغام.
تپه‌نین دؤنومونده دایاندیم نفس دریم. کئچی‌قیران تپه‌لرین دؤنوم‌لری قورخویلا لذت هیجانینی بیر آندا یاشادیر اینسانا. دؤنومو یوخاری قالخدیغیمدا او یئنی یئمه اوغلانلارین قوردوغو اوجاقدان قاباق توستونون اییسینی دویدوم. اوغلانلارین قیرخیلمیش باشلاری شوش قولاقلارینی اولدوغوندان دا بؤیوک گؤستریر. اوچو ده یاشید نظره گلیر. توستودن قارالمیش چایدانی اوجاق اوسته گؤرونجه، بئینیم بیر باشا لذت گؤلونه جومدو. سورغو- سوال‌سیز اوجاق باشیندا أیلشدیم.
«منه بیر چای وئرین.»
سورمه‌ای کؤینکلی سوروشدو: «هانسی لیواندا؟»
اوجاغین قیراغیندا یاشیل، ساری و قیرمیزی رنگلی اوچ پلاستیک لیوان یئره دوزولموشدو.
«قیمت‌لری‌نین فرقی وار یا صاحاب‌لاری‌نین؟»
سورمه‌ای کؤینکلی اوغلان اورتادا أیلشمیش یاشیل کؤینکلی‌نی گؤستریب دئدی: «بونون لیوانی کیچکدی. چایی دا مین بئش یوز اولار، بیزیمکی‌لر بؤیوک اولدوغونا گؤره ایکی‌میندی.»
اونون سؤزو منده درین تاثیر بوراخدی، اؤزلویومده دئدیم: «او یوخاری‌دا أیلشنلر عدالت تره‌زیسینی سیزین کیمی اوشاقلارا تاپشیرمالیدی‌لار.»
اوغلانلار گؤزلرینی اوزومه میخلامیش، منیم جوابیمی گؤزله‌ییرلر. منسه فیکیرلشیرم هانسی لیواندا چای آلیم کی، عدالتسیزلیک اولماسین.
«بئله کی گؤرورم توکان- بازاریز، حساب- کتابیز بیربیریندن آیریدی. ایندی کی بئله‌دی هر اوچ لیواندا چای ایستیرم، آمما هر اوچونه ده او کیچیک لیوان اؤلچوسونده چای سوزون.»
یاشیل کؤینکلی ساغ سولونداکی اوغلانلارا باخیب گولدو.
بیرینجی چایی ایچیرکن داشین دیبینه سینمیش قهوه‌ای کؤینکلی دؤردونجو اوغلانی گؤردوم. اونون دا باشی دیبدن قیرخیلمیشدی. آمما قیرخیلمیش باشیندا یارا ایزلری وار. سورمه‌ای کؤینکلی یئنه دیلمانج کیمی اورتایا آتیلدی: «خانیم او چای ساتمیر. آناسی اونا فتیر وئریب ساتسین.»
یاشیل کؤینکلی دئدی: «باشینا چئچل دوشوب. اوننان فتیر آلما. سنه ده بولاشار.»
اوغلان تای- توشلاری‌نین سؤزلرینی ائشیدینجه داشین دالیسینا چکیلیب، گؤزدن ایتدی. چای بوغازیما قاچیب، چئچیدیم. دالبادال اؤسگوردوم. دییه‌سن یئنه ده ظاهری گؤرونتولره آلدانمیشام. دئمک اوشاقلارین دا صاف- ساده دونیاسیندا عدالتسیزلیک وار ایمیش!
دیلمانج اوغلان آرتیردی: «خانیم ممو باشی‌نین یارالاریننان اوتانیر. اونا گؤره گیزله‌نیر. اوتانجاغیننان درسه ده گلمیر.»
یئریمدن قالخیب داشا ساری گئدیب، داشین دیبینده‌کی فتیر بوقچاسینی آچدیم. بوقچادا ایکی فتیر وار ایدی. داشین دالینا أییلیب دئدیم: «منه اوش دنه فتیر وئر.»
اوغلان سؤزومو ائشیتمه‌میش کیمی داشین دیبیندن ترپنمه‌دی. دیلمانج اوغلان اوجادان سسلندی: «اووووی ممو، گیزلنمه، چیخ ائشییه، بویون آللاهین وئریب هااا.»
اوغلان داشین دالیندان ترپنمه‌‌یینجه یاشیل کؤینکلی اوجا سس ایله اونو چاغیردی.
«اوووی مموووو … قولاخلاریوا دا چئچل دوشوب؟ ائیشتمیسن؟ چیخ ائشییه، فتیرلریوه مشتری تاپیلیب.»
هر اوچو ده گولوشدولر. ممو ایسه داشین دالیندان سورونوب، دینمز- دانیشماز فتیر بوقچاسینی منه ساری اوزالتدی. یئنه دیلمانج اوغلان آرتیردی: «بیری ایکی مین تومندی.»
فتیرلری آلیب، بئل چانتامدان پول چیخاراندا اوغلانلارین اوچو ده یئرلریندن قالخیب بیزه ساری گلدیلر. دیلمانج اوغلان دئدی: «نییه ایکی فتیر آلدین اوش فتیر پولو وئردین.»
دئدیم: «اوش چای، اوش فتیر … منیم عادتیمیدی، گاهدان ایکینی اوش گؤره‌رم.»
منیم سؤزومه ممونون دوداغی قاچدی.
یولوما دوام ائتمه‌دن دوربونو چیخاریب، دئدیم: «دوزولون بیر یئره سیزدن یادیگارلیق بیر عکس سالیم.»
یاشیل کؤینکلی دئدی: «بیز اونون یانیندا دورساخ بیزیم ده باشیمیزا چئچل دوشر.»
ممو یئنه داشین دالینا چکیلدی. ألیمی اونا ساری اوزالدیب یئریندن قالدیردیم: «دور آیاغا سندن بیر عکس سالیم.»
ممو ألیمدن توتوب، یئردن قالخیب داشا دایاندی. گؤزلری بیر جوت سؤنوک فانار کیمی ایدی دوربونون ایچینده. سونرا دوربونو اونا وئریب، دئدیم: «گل سنه اؤیردیم هم کؤشن‌لریندن بیر عکس سال، منه یادیگارلیق قالسین.»
یئنه ممونون دوداغی قاچدی….
97.۴.۱۹
2 پاسخ
آخیجی بیر نثری وار ایدی بو حکایه نین. لذت آلدیم اوخوماغیندان.
گوزل قلم. ای کاش عکسی ده گوریدوخ