ای تانری، سن آلله سئوه‌نی قورو!
سئومه‌ین کیمسه‌یله اؤزون بیلرسن.
چؤره‌یین دوست ایله بؤله‌نی قورو!
بؤلمه‌ین کیمسه‌یله اؤزون بیلرسن.
آیاقدان چکن وار، الدن توتان وار،
هانی یوللار هله یوللانسین هامار؟
یاخشی- پیس فرقینی بیله‌نی قورو!
بیلمه‌ین کیمسه‌یله اؤزون بیلرسن.
هامی‌نین پیس گونو، یاخشی گونو وار،
دی گل کی، یاخشی- پیس بد‌ده سینانار،
وطن چاغریشینا گله‌نی قورو!
گلمه‌ین کیمسه‌یله اؤزون بیلرسن.
منیم خواهیشیمه فیکیر وئر بیر آز،
آند اولسون آدینا دونیا داغیلماز؛
ملتین نامینه اؤله‌نی قورو!
اؤلمه‌ین کیمسه‌یله اؤزون بیلرسن.
