ایلیق اسن بو کولک هاردان اسیر گؤره‌سن؟!
نه سنلی نفسی وار،
نه منلی‌دیر هاواسی؛
هاردان اسیر گؤره‌سن؟

اوزاق- اوزاق یوللاردان یورغون- یورغون گلسه ده،
توتاق کی باشقاسینا بام- باشقا گؤرونسه ده،
قیزیل اؤزن چایی‌نین اوستوندن اسه- اسه،
قافلانتی ذیروه ‌سینه یؤن آلماییب دئیه‌سن؛
آنامین مزارینا،
آتامین باش داشینا،
اوز توتماییب دئیه‌سن.
یوخسا بئله اسمزدی،
اوره ییمی اوزمزدی،
امیدیمی کسمزدی.

نه گیلاوار هاوا‌لی،
نه خزری‌دیر بو کولک.
هاردان اسیر بو کولک؟
هاردان اسیر گؤره‌سن؟!