بو گئجه یئنه‌ده برباد کیمی‌یم،
خزر گؤزلریمه دولماغا گلیر.
آتالی، آنالی گونلریم بو گون
ائله بیل جانیمی آلماغا گلیر.
ائله بیل باتلاقدا باتیبدی گمیم،
نه گئده‌ن، نه گلن اونو گؤرنمز.
قولومدان توتان دا تاپیلسا، منیم –
باتدیغیم باتلاغا کیمسه گیرنمز.
رؤیالار ایچینده خولیالاردایام،
حیسسیمی، دویغومو بیلن تاپیلماز.
حالیما بیر کره آغلایانیم یوخ،
اؤزوم تک اؤزومه گولن تاپیلماز.
بیر ایچیم سو آلیب ایچه بیلمیرم،
خزر اود می، سو می سئچه بیلمیرم؛
حسرتیم گئجه‌نی قالماغا گلیر،
نئجه گلسه اوندان کئچه بیلمیرم.
بو گئجه یئنه‌ده برباد کیمی‌یم،
خزر گؤزلریمه دولماغا گلیر.
آتالی، آنالی گونلریم بو گون
ائله بیل جانیمی آلماغا گلیر.
